މ.މުލީގެ ބިން ހިއްކުމާއި އެއާޕޯޓެއް އެޅުމަކީ ރައީސް ޔާމީން ޢަބްދުލްޤައްޔޫމްގެ ތަސައްވުރެއް ކަމަށާއި އޭނާގެ ވެރިކަމެއްގައި އެ މަސައްކަތް ބާރަށް ކުރިއަށް ގެންގޮސް ނިންމައި އެކަމުން ރައްޔިތުންނަށް އުފާވެރިކަން ހޯއްދަވައިދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.
މުލީގައި ބޭއްވި ޖޯލިފަތި ބައްދަލުވުމުގައި މުޢިއްޒު ވިދާޅުވީ މުލީގެ ބިން ހިއްކުމާއި އެއާޕޯޓެއް އެޅުމަކީ ރައީސް ޔާމީން ޢަބްދުލްޤައްޔޫމްގެ ތަސައްވުރެއް ކަމަށެވެ. އެކަން ކުރުމަށްޓަކައި 2018 ވަނަ އަހަރުގެ ބަޖެޓުގައި ހިމަނުއްވައިގެން މަސައްކަތް ވެސް ފެށްޓެވި ކަމަށާއި ނަމަވެސް އެކަން ކުރިއަށް ނުދާ ކަމަށް މުޢިއްޒު ވިދާޅުވިއެވެ.
މުޢިއްޒު ވިދާޅުވީ މި ސަރުކާރަކީ ވަރަށް ވެސް ލަހުން ތަރައްގީގެ ކަންކަން ކުރިއަށްގެންދާ ސަރުކާރެއް ކަމަށެވެ.
“އެ މަޝްރޫއަކީ އިރާދަކުރެއްވިއްޔާ އަޅުގަނޑުމެންގެ ސަރުކާރެއްގައި ވަރަށް ބާރަށް ގެންގޮސް ނިންމާ އެކަމުން އުފާވެރިކަން ތިބޭފުޅުންނަށް ހޯދަދޭން މަޝްރޫއުއެއް ކަމުގައި އަޅުގަނޑު ދަންނަވަން.“
މުޢިއްޒު ވިދާޅުވީ މުލީގައި ހުރި ހޮސްޕިޓަލަކީ މިހާރު ތަރައްގީކުރަން ޖެހިފައިވާ ހޮސްޕިޓަލެއް ކަމަށާއި ޒަމާނީ ފެންވަރުގެ އާ ހޮސްޕިޓަލެއް ހަދަންޖެހޭ ކަމަށެވެ.
“އެހެންވީމާ ދެވަނައަށް އެންމެ އިސްކަމެއްދީގެން އަޅުގަނޑުމެން ކުރާނެ ކަމަކީ އެ މަޝްރޫއު ކުރިއަށް ގެންދިއުން. މުލީގައި ޒަމާނީ ފެންވަރުގެ އާ ހޮސްޕިޓަލެއް އިރާދަކުރެއްވިއްޔާ އަޅުގަނޑުމެން ގާއިމުކޮށްދޭނަން.“
މީގެއިތުރުން ތާރު އަޅައިގެން ޒަމާނީ ފެންވަރަށް މަގުތައް ތަރައްގީކުރައްވާނެ ކަމަށް ވެސް މުޢިއްޒު ވިދާޅުވިއެވެ. އަދި ޓޫރިޒަމަށް ޚާއްސަ ސަރަހައްދެއް ކަނޑައަޅައި އެކަމަށް
ސަރުކާރުން އެހީތެރިކަން ދީ, ޓޫރިޒަމްގަ އިންވެސްޓް ކުރަން ބޭނުންވާ ޒުވާނުންނާއި އެކި އުމުރުފުރައިގެ ފަރާތްތަކަށް ވަދެވޭނެފަދަ ލުއި ގޮތްތައް ހަމަޖައްސައިދީ އޭގެ ސަބަބުން ވަޒީފާގެ ފުރުަސަތުތައް ލިބި ޖީބަށް ބަރުވާނެ ގޮތް ހަދައި ދިނުމަކީ “އިރާދަކުރެއްވިއްޔާ އަޅުގަނޑުމެން ތިބޭފުޅުންނަށް ހާސިލުކޮށްދޭނެ ހަގީގަތެއް“ ކަމަށް މުޢިއްޒު ވިދާޅުވިއެވެ.
