ފަލަސްތީނު-އިސްރާއީލު މައްސަލާގައި އޮސްޓްރޭލިއާގެ އެތެރޭގައި އޮތް ބައިބައިވުން ނައްތާލުމަށްޓަކައި އޮސްޓްރޭލިއާގެ ސަރުކާރުން ކުރިއަށް އޮތްތާ އެމައްސަލާގައި ގެންގުޅޭ ބަސްމަގު ހަރުކަށިކުރުމަށް ނިންމާފައިވާކަން އެގައުމުން ހާމަކޮށްފިއެވެ.
އެގޮތުން، ފަލަސްތީނުގެ ވެސްޓު ބޭންކުގައި ގަދަކަމުން ވަޒަންވެރިވެ އުޅޭ އިސްރާއީލުގެ މީހުންނަކީ ”ގާނޫނާއި ގަވާއިދާއި ޚިލާފަށް“ އުޅޭ ބައެއް ކަމަށާއި، އެ ސަރަހައްދުތަކަކީ ”ގަދަބާރުން އަތުލައިގެންފައިވާ“ ސަރަހައްދުތަކެއްކަމަށް އޮސްޓްރޭލިއާއިން ބުނެފައިވެއެވެ.
އިސްރާއީލާއި އެއްކޮޅު ފަރާތްތަކުން އޮސްޓްރޭލިއާ ސަރުކާރުގެ މި ނިންމުމަށް ފާޑުކިޔައި ނުރުހުން ފާޅުކުރިއިރު، ފަލަސްތީނާއި އެއްކޮޅަށް ތިބި ފަރާތްތަކުން މި ނިންމުމަށް މަރުހަބާ ކިޔައި، އެ މަސައްކަތް އިތުރަށް ކުރިއަށް ޖެއްސުމަށް ލޭބަރއަށް ގޮވާލިއެވެ.
އޮސްޓްރޭލިއާއިން މިގޮތަށް ނިންމާފައި މިވަނީ ލޭބަރގެ ގައުމީ ބައްދަލުވުމުގެ ދެ ހަފްތާކުރިންނެވެ. ފަލަސްތީނުގެ ސްޓޭޓްހުޑަށް ލޭބަރގެ ސިޔާސަތުތަކުން ތާއީދުހޯދުމަށް އެކްޓިވިސްޓުން މަސައްކަތްކުރަމުން އަންނައިރު، މި ކޮންފަރަންސަކީ އެފަދަ މަސައްކަތަށް ބޮޑު ފުރުސަތެއްކަމަށް އެފަރާތްތަކުން ގަބޫލުކުރެއެވެ.
