”އާންމު އަޚްލާޤީ ހަމަތަކާއި، އިޖްތިމާޢީ އާދަކާދަތައް“ ރައްކާތެރިކުރުމަށްޓަކައި ކުވައިތުގައި ”ބާބީ“ ފިލްމުދެއްކުން މަނާކޮށްފިއެވެ.
ކުވައިތުގެ މިނިންމުން އައިސްފައި މިވަނީ އެފިލްމުން ”އެއްޖިންސުން ގުޅުން ހިންގުން“ ކުރިއަރުވާކަމަށް ބުނެ ލުބުނާނުގެ މިނިސްޓަރަކު އޭނާގެ ގައުމުގެ ސިނަމާތަކުގައި ފިލްމު އެޅުވުނަ މަނާކުރުމަށް ގޮވާލިތާ ދުވަސްކޮޅެއް ފަހުންނެވެ.
”އެ ފިލްމުގައި އެއްޖިންސުން ގުޅުން ހިންގުމާއި، ޖިންސު ބަދަލުކުރުން ކުރިއެރުވުމުގެ އިތުރުން، ބަފައިމީހާގެ ބެލެނިވެރިކަން ދޫކޮށްލުމަށް ގޮވައިލާ، ކުދިން ބޮޑެތިކުރުމުގައި މައިމީހާގެ ދައުރަށް ފުރައްސާރަކޮށް، ކައިވެނިކުރުމާއި އާއިލާ ބިނާކުރުމުގެ މުހިންމުކަމާމެދު ސުވާލު އުފައްދާ.“ ލުބުނާނުގެ އާދަކާދައާއި ބެހޭ މިނިސްޓަރ، މުޙައްމަދު މުރްތަޟާ ވިދާޅުވިއެވެ.
މިހާތަނަށް ބިލިއަނަކަށްވުރެ ގިނަ ފައިސާ އުފައްދާފައިވާ ވާނާ ބްރަދަރސްގެ ”ބާބީ“ ފިލްމު އެގައުމުގައި މަނާކޯށްފައިވާކަން އިއުލާނުކޮށްފައިވާކަމަށް ކުވައިތުގެ މިނިސްޓްރީ އޮފް އިންފޮމޭޝަންގެ އޮފިޝަލަކާއި ހަވާލާދީ އެގައުމުގެ ކޭޔޫއެންއޭ ނިއުސް އޭޖެންސީއިން ވަނީ ރިޕޯޓުކޮށްފައެވެ.
”އެފިލްމުގައި ކުވައިތުން ގަބޫލުކުރާ ގަބޫލުކުރުންތަކާއި، ކުވައިތުގެ އާންމު ހަމަޖެހުމާއި އަޚްލާޤީ މިންގަނޑުތަކަށް ހަޖޫޖަހާ“ ކަމަށް އޭނާ ބުންޏެވެ. އެއާއެކު، މެދު އިރުމަތީގައި މި ފިލްމު ދެއްކުން މަނާކުރި ގައުމުތަކުގެ ދިގު ލިސްޓަށް ކުވައިތުގެ ނަން އިތުރުވީއެވެ. މިކަން ފަށާފައިވަނީ ލުބުނާނުން އެ ފިލްމު ދެއްކުން މަނާކުރުމާއެކުގައެވެ.
