އިނގިރޭސި ބަހުން އިސްލާމް މާއްދާ ކިޔަވައި ދިނުމަކީ ގައުމިއްޔަތު ގެއްލުވައިލަން ކުރާ ކަމެއް ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ހއ.އިހަވަންދޫގައި ރޭ ބޭއްވި ޖަލްސާގައި ޑރ.މުޢިއްޒު ވިދާޅުވީ އިސްލާމްދީނާއި ދިވެހިބަހަކީ ދިވެހި ގައުމިއްޔަތާ އެންމެ ބޮޑަށް ގުޅިފައިވާ ދެ އަސާސް ކަމަށެވެ. ގައުމުގެ މުސްތަގުބަލާއި މިނިވަންކަން ސަލާމަތްކުރަން ބޭނުންނަމަ އެ ދެ އަސާސް ރައްކާތެރިކުރަންޖެހޭނެ ކަމަށް މުޢިއްޒު ވިދާޅުވިއެވެ.
“މިހާރު މި އިވެނީ ދިވެހިބަހުގެ ބަދަލުގައި އިނގިރޭސިބަހުން އިސްލާމް މާއްދާއާއިި މި ހުރިހާ އެއްޗެއް ކިޔަވައިދޭން އުޅޭ ވާހަކަ. ގައުމިއްޔަތު ގެއްލުވައިލުމުގެ މަސައްކަތް ވަނީ ފެށިފައި.“
މުޢިއްޒު ވިދާޅުވީ ރާއްޖޭގެ މިނިވަންކަމާއި ގައުމިއްޔަތުގެ ވާހަކަ ދައްކައި އެ މަގުން މަސައްކަތްކުރާ ފުރަތަމަ ޕާޓީއަކީ ޕީޕީއެމްއެވެ. އަދި ގައުމު ސަލާމަތް ކުރެވޭނެ ހަމައެކަނި މަގަކީ ޕީޕީއެމްއަށް ވެރިކަން ހަވާލު ކުރުން ކަމަށާއި މިހާރު ކަންކަން ވަމުންދާ ގޮތަށް ދާން ދޫކޮށްލައިފިނަމަ ގައުމުގެ މިނިވަންކަމާާއި ގައުމިއްޔަތު ގެއްލިގެންދާނެ ކަމަށް ވެސް މުޢިއްޒު ވިދާޅުވިއެވެ.
