ބޮޑުވަމުންދާ އިންފްލޭޝަންގެ ސަބަބުން ޕާކިސްތާނުގެ މިސްރާބުހުރީ ސްރީލަންކާގައި ދިމާވިފަދަ އިޤްތިޞާދީ ކާރިސާއަކާއި ދިމާއަށްކަން ހާމަވެއްޖެއެވެ.
ޕާކިސްތާން ބޭންކްރަޕްސީއަކާއި ހަމައަށް ހިނގައްޖެނަމަ، ސްރީލަންކާއަށްވުރެ އެތައް ގުނައެއް ހާލަތު ގޯސްވާނެކަމަށް ގިނަ ފަރާތްތަކުން ލަފާކުރެއެވެ. ޕާކިސްތާނަކީ ސްރީލަންކާއަށްވުރެ އެތައް ގުނައެއް ބޮޑު އަދި އެތައް ދަރަޖައެއް ފަގީރު ގައުމެކެވެ.
ޕާކިސްތާނުގެ ފައިސާގެ އަގު ދުނިޔޭގެ ބާޒާރުގައި ވެއްޓެމުން އަންނައިރު، ފާއިތުވެދިޔަ ހަފްތާގައި އެކަނިވެސް 14 އިންސައްތަ ވަނީ ވެއްޓިފައެވެ. އިންފްލޭޝަން މަތިވެ ބޯމަތީގައި އޮތްއިރު، އެގައުމުގެ ބޭރުފައިސާގެ ރިޒާވްގައި ހުރީ ކާބޯތަކެއްޗާއި ތެޔޮ ހިމެނޭގޮތުން، ތިން ހަފްތާގެ މުދަ އެތެރެކުރެވޭހާ މިންވަރެކެވެ.
ދުނިޔޭގެ ބާޒާރަށް އަންނަމުންދާ ބަދަލުތަކުގެ ނޭދެވޭ އަސަރުތައް އެންމެ ބޮޑަށްކުރަމުންދަނީ ދުނިޔޭގެ ނިކަމެތި ފަގީރުންނަށެވެ. އަސާސީ ކާބޯތަކެތީގެ އަގުތައް އަތްނުފޯރާ ފަށަށް ގޮސްފައިވާއިރު، ރަށްފުށު ސަރަހައްދުތަކުގެ މަސައްކަތްތެރިންނާއި ދަނޑުވެރީން އަދިވެސް އަންނަނީ މިދިޔަ އަހަރުގެ ފެންބޮޑުވުމުގެ ކާރިސާގެ ސަބަބުން ލިބުނު ގެއްލުންތަކުން އަރައިގަތުމަށް މަސައްކަތްކުރަމުންނެވެ.
