ހުޅަނގު އެފްރިކާގެ ނައިޖަރގައި ހިންގި ބަޣާވާތަކީ އިމްޕީރިއަލިޒަމަށް ދިން ބޮޑު ހަމަލާއެކެވެ. ބީބީސީގެ ސެކިއުރިޓީ ކަރެސްޕޮންޑަންޓެއްގެ ގޮތުގައި މަސައްކަތްކުރާ ފްރޭންކް ގާޑްނާ ބުނީ އެފްރިކާގެ އެސަރަހައްދުގައި އޮތް ހުޅަނގުގެ ބާރު ”ހޫނު ދުވަހެއްގައި ފެންގަނޑު ހިކިގެންދާ އުސޫލުން ބާރަށް ހިކިގެންދަނީ“ ކަމަށެވެ.

ބުދަ ދުވަހު ހިންގި ބަޣާވާތެއްގައި ރައީސް މުޙައްމަދު ބަޒޫމް ހިފަހައްޓާފައިވަނީ އޭނާގެ ރިޔާސީ ގާޑުންނެވެ. ދެން ސިފައިންގެ ބޮޑު ބަޔަކުން އެކަމަށް ތާއީދުކޮށް އެއްބާރުލުން ދީފައިވެއެވެ. ޖެހިގެން އައި ދުވަހު ނައިޖަރގެ ވެރިކަންކުރާ ނިއަމޭގައި އެތައް ސަތޭކަ ބަޔަކު އެއްވެ، ރަޝިއާގެ ދިދަ ވިހުރުވިއެވެ.

އަބްދުއްރަޙްމާން ޗިއާނީ އިސްވެ ހުރެ ހިނގި މި ބަޣާވާތުގައި، އޭނާވަނީ ރައީސް ބަޒޫމް ރިޔާސީ ގެކޮޅުގައި ބަންދުކުރުމަށްފަހު އިސްތިއުފާދިނުމަށް މަޖުބޫރުކޮށްފައެވެ.

ހުކުރު ދުވަހު ޓީވީއަށް އަރައި ޗިއާނީ ވަނީ ނައިޖަރގެ ވެރިކަން އޭނާގެ ބާރުގެދަށަށް ގެނެސްފައިވާކަން އިއުލާނުކޮށްފައެވެ. ރަޝިއާގެ ވެގްނަރ ގްރޫޕްގެ އިސްވެރިޔާ، ޔެވްގެނީ ޕްރިގޯޖިންވަނީ މި ބަޣާވާތަށް މަރުހަބާކިޔައި، ބަޣާވާތުގެ އިސްވެރިންނަށް އޭނާގެ އަސްކަރީ ގުރޫޕުގެ އެހީތެރިކަން ވެދުމަށް އަރުވާފައެވެ.

އެފްރިކާގެ ގައުމުތަކުގަޔާއި ދުނިޔޭގެ އެހެން ގައުމުތަކުގައިވެސް ޚުދުމުޙުތާރުވެރިކަމަށް ތާއީދުކުރާ އިނގިރޭސިވިލާތުގެ ސަރުކާރުން ”ނައިޖަރގައި ހިނގައިދިޔަ ނޭދެވޭ ކަންކަމަށް ނިމުމެއް އައިސް، އެގައުމުގެ މަގާމުތަކަށް ޑިމޮކްރަސީގެ އުސޫލުތަކުގެ މަތީން ހޮވިފައި ތިބި ފަރާތްތައް އެފަރާތްތަކުގެ މަގާމުތަކަށް އިއާދަވާތަން“ ދެކެން ބޭނުންވާކަމަށް ވަނީ ބުނެފައެވެ.

ފްރާންސްގެ ބޮޑު އަސްކަރީ ބޭސްއެއް ނިއަމޭގައި ހުންނައިރު، ނައިޖަރގެ ސިފައިން ތަމްރީނުކުރަނީ ޖަރުމަނުވިލާތުންނެވެ. އަގަދޭޒްގެ ހަނަފަސް ސަހަރުގައި ހުންނަ އެމެރިކާގެ ޑްރޯން ބޭސް ހިމެނޭގޮތަށް އެމެރިކާގެ ދެ ޑްރޯން ބޭސް ނައިޖަރގައި ހުންނައިރު، 1100 ސިފައިންވެސް އެގައުމުގައި އެބަތިއްބެވެ.

ހުޅަނގުގެ ގައުމުތަކުގެ ބޭނުމަކަށްވީ ނައިޖަރ ބޭނުންކޮށްގެން އެސަރަހައްދަށް އަތްގަދަކޮށް ރަޝިއާއާއި ޗައިނާގެ ބާރު ކުޑަކުރުމެވެ. ދުނިޔޭގެ ޔުރޭނިއަމްގެ 5 އިންސައްތައަކީ ނައިޖަރގައި އުފައްދާ ޔުރޭނިއަމްކަމުގައި ވާއިރު، ނިއުކްލިއާ ހަތިޔާރުތައް އުފެއްދުމަށް އެންމެ ބޭނުންތެރި އެކައްޗެވެ. އެހުރިހައި ޔުރޭނިއަމެއް ނައިޖަރއިން ބޭރުކުރަމުން ގެންދިޔައީ ފްރާންސަށެވެ. އަދި ފްރާންސުގެ 70 އިންސައްތަ ކަރަންޓު އުފައްދަނީ ނިއުކްލިއަރް މަސްދަރުތަކުންނެވެ.

ހުޅަނގުގެ ގައުމުތަކުން ނައިޖަރގެ ގުދުރަތީ ވަސީލަތްތަކުގެ ބޭނުންތަކުން ލިބޭ މަންފާތައް އެއްވެސް ހުރަހަކާއި ނުލައި ބޭނުންކޮށް އާންމު ރައްޔިތުން ފަގީރުކަމާއި ނިކަމެތިކަމުގެ ތެރެއަށް ވައްޓާލާފައިވާކަމަށް ބުނެ ނައިޖަރގެ އާންމުން ޝަކުވާކުރާތާ އެތައް ޒަމާނެއްވެއްޖެއެވެ.

ނައިޖަރގެ ބަޣާވާތް އައިސްފައިމިވަނީ ސަހާރާ ސަހަރުގައި ހުޅަނގުގެ ބާރުދެރަކޮށްލުމަށް 2021 އާއި 2022 ގައި އަވައްޓެރި މާލީ އާއި ބުރްކީނާ ފަސޯގައި ހިނގައިދިޔަ ބަޣާވާތްތަކަށްފަހުގައެވެ.

މާލީގެ ބަޣާވާތަށްފަހު ގެނައި އައު ވެރިކަމުން އެގައުމުގައި ތިބި ފަރަންސޭސީ ސިފައިން އެގައުމުން ބޭރުކޮށްލުމަށްފަހު، ރަޝިއާގެ ވެގްނަރ ގްރޫޕާއެކު އެއްބަސްވުމެއް އެކުލަވާލިއެވެ.

ރަޝިއާ-އެފްރިކާ ސަމިޓުގައި ވާހަކަދައްކަވަމުން ބުރްކީނާ ފަސޯގެ ރައީސް އިބްރާހީމް ތްރައޯރޭ ވިދާޅުވީ، އެފްރިކާގެ ގައުމުތަކުން އެތައް އަހަރެއް ވާންދެން ކޮލޯނިއަލިޒަމް އަދި އިމްޕީރިއަލިޒަމްގެ އަނިޔާވެރި ވަކިތަކުގެ ޝިކާރައަކަށް ވެފައި ތިބެއްޖެކަމަށާއި، މިއީ ”ޒަމާނީ އަޅުވެތިކަމުގެ ވައްތަރެއް“ ކަމަށެވެ.

”އެކަމަކު، މިނިވަންކަމަށްޓަކައި މަސައްކަތްނުކުރާ އަޅެއްގެ އެއްވެސް އަގެއް ނެތް. އެފްރިކާގެ ގައުމުތަކުގެ ވެރީންނަކީ އިމްޕީރިއަލިސްޓުން ބޭނުންހާކަމެއް ކުރަން ގެންގުޅޭ ބުދުތަކަކަށް ވެގެންނުވާނެ.“ އޭނާ ވިދާޅުވިއެވެ.