ރައީސް ޔާމީން ޢަބްދުލްްޤައްޔޫމުގެ ރަނިންމޭޓެއްގެ ގޮތުގައި ކަނޑައެޅުއްވި ކުރީގެ ނައިބު ރައީސް ޑރ.މުޙައްމަދު ޖަމީލް އަޙްމަދުގެ ފުރިހަމަ ތާއީދު ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް އޮންނާނެ ކަމަށް ޖަމީލު މިއަދު ވިދާޅުވެއްޖެއެވެ.

ޖަމީލު މިހެން ވިދާޅުވީ ޑރ.މުޢިއްޒު މިއަދު އޭނާގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހެޅުއްވުމާ ގުޅިގެން ކުރެއްވި ޓުވީޓެއްގައެވެ.

’އަޅުގަނޑުގެ ފުރިހަމަ ތާއީދު ތިޔަ ކެނޑިޑޭޓުންނަށް ލިބިވަޑައިގަންނަވާނެއެވެ.“ ޑރ.މުޢިއްޒަށާއި އޭނާގެ ރަނިންގމޭޓް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފަށް މަރުހަބާ ވިދާޅުވެ ކުރެއްވި ޓުވީޓެއްގައި ޖަމީލު ވިދާޅުވިއެވެ.

މާފުށީ ޖަލުގައި 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ރައީސް ޔާމީން އިންތިޚާބުގައި ވާދަނުކުރެއްވޭ ގޮތްވުމުން ލީޑާޝިޕަށް އެންގެވީ އިިންތިޚާބު ބޮއިކޮޓް ކުރުމަށް ނަމަވެސް އެކަމާ ގުޅިގެން ޕީޕީއެމް/ޕީއެންސީގެ ސެނެޓަރުންގެ މެދުގައި ނެގި ވޯޓުން ފާސްވީ އިންތިޚާބުގައި ވާދަކުރުމަށެވެ.

ނަމަވެސް އެ ނިންމުން ގަބޫލު ނުކުރައްވާކަން ރޭގެ ވަގުތެއްގައި ރައީސް ޔާމީން ވަނީ ލީޑާޝިޕަށް އަންގަވައިފައެވެ.

ޕީޕީއެމްއިން މިއަދު ބުނީ ޕްރޮގެސިވް ކޮންގްރެސް ކޯލިޝަނަށް އަދި ދިވެހި ރައްޔިތުންނަށް އެންމެ ރަނގަޅު ގޮތަކީ ޕްރޮގްރެސިވް ކޮންގްރެސް ކޯލިޝަންގެ ސެނެޓާއި އާންމު މެމްބަރުންނާއި ލައްކައަކަށްވުރެ ގިނަ ދިވެހި ރައްޔިތުންގެ އެދުމާ އެއްގޮތަށް ކޯލިޝަންގެ ފަރާތުން ކެންޑިޑޭޓަކު އިންތިޚާބުގައި ވާދަކުރެއްވުންކަމާއި ސެނެޓްގެ ވިސްނުމާއި އެއްގޮތަށް ރައީސްޔާމީން އެމަނިކުފާނުގެ ވިސްނުންފުޅު ބަދަލު ކުރައްވައި ޕީއެންސީއިން ނެރޭ ރިޔާސީ ކެންޑިޑޭޓަށް ތާއީދުކުރެއްވުމަށް ނިންމަވައިފި ކަމަށެވެ.