އަންނަ ރިޔާސީ އިންތިޚާބުގައި ވާދަކުރައްވަން ނިންމަވާފައިވާ ތިން ކެންޑިޑޭޓެއްގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅުއްވައިފިއެވެ.

މިއަދު ހެނދުނު 09:00 ގައި ހުށަހެޅުއްވީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙްގެ ކެންޑިޑެސީ ފޯމެވެ.

އޭގެފަހުން 10:00 ޖެހިއިރު މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓް މުޙައްމަދު ނާޒިމް ކެންޑިޑެސީ ފޯމު ހުށަހަޅުއްވާފައިވާއިރު މީގެ އިރުކޮޅެއް ކުރިން  ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ ކެންޑިޑެސީ ފޯމު ވަނީ ހުށަހަޅުއްވާފައެވެ.

މި އިންތިޚާބުގައި ވާދަކުރެއްވި ކެންޑިޑޭޓުންގެ ތެރެއިން އެންމެ ކުރިން ކެންޑިޑެސީ ފޯމު ހުށަހެޅުއްވީ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމެވެ. ނަމަވެސް އީސީން ނިންމީ އެމަނިކުފާނުގެ ކެންޑިޑެސީ ބަލައިނުގަތުމަށެވެ.

އެ މައްސަލަ ސްޕްރީމް ކޯޓަށް ހުށަހެޅުއްވުމުން އެ ކޯޓުން މިއަދު ނިންމީ ކެންޑިޑެސީ ބާތިލުކުރަން އީސީން ނިންމި ނިންމުން ރަނގަޅު ކަމަށެވެ.