އިދިކޮޅު ޕީއެންސީގެ ރިޔާސީ ކެނޑިޑޭޓް މާލޭގެ މޭޔަރު ޑރ.މުޙައްމަދު މުޢިއްޒުގެ ރަނިންގމޭޓަކަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް (ސެންބެ) ހަމަޖައްސައިފިއެވެ.
ޕީއެންސީގެ ރިޔާސީ ޓިކެޓަށް ކުރިމަތިލެއްވީ ޕީއެންސީގެ ނައިބު ރައީސް އާދަމް ޝަރީފާއި މާލޭގެ މޭޔަރު ޑރ.މުޙައްމަދު މުޢިއްޒެވެ.
ރިޔާސީ ކެންޑިޑޭޓް ކަނޑައެޅުމަށް ޕީއެންސީގެ މަޝްވަރާ މަޖިލީހުގެ 48 މެންބަރުންގެ މެދުގައި ނެގި ސިއްރު ވޯޓުގައި މުޢިއްޒަށް 25 ވޯޓު ލިބިވަޑައިގެންނެވިއިރު އާދަމް ޝަރީފަށް ލިބިވަޑައިގަތީ 23 ވޯޓެވެ.
ޑރ.މުޢިއްޒު މިއަދު ކުރެއްވި ޓުވީޓެއްގައި ވިދާޅުވީ ރައީސް ޔާމީނަށް ވާދަކުރެއްވުމުގެ ފުރުސަތު ނުދީފިނަމަ އެމަނިކުފާނު ދެއްވާފައިވާ އިރުޝާދާއެކު ވާދަކުރާނޭ ”ބެކްއަޕް“ ކެނޑިޑޭޓެއްގެ ގޮތުގައި އޭނާ ހޮވުމުން ރަނިންގމޭޓުގެ ގޮތުގައި ބޭފުޅަކު ހަމަޖައްސައި އެޕްލިކޭޝަން ތައްޔާރުކުރުމަކީ އޭނާގެ ޒިންމާއެއްކަމަށްވާތީ ރަނިންގމޭޓްގެ ގޮތުގައި މެންބަރު ޙުސައިން މުޙައްމަދު ލަޠީފް ހަމަޖައްސަން ނިންމާފައިވާ ކަމަށެވެ.
“ އޭނާއަކީ ޒުވާން ތައުލީމީ ގާބިލް ޚިދްމަތްތެރިއެއް“ ކަމަށް ވެސް މުޢިއްޒު ވިދާޅުވިއެވެ.
ނަމަވެސް ދުއާއަކީ 7 އޯގަސްޓުގެ ވަގުތު ހަމަވުމުގެ ކުރިން އަޅުގަނޑުމެންގެ ކެނޑިޑޭޓް ރައީސް ޔާމީނަށް ވާދަކުރުމުގެ ފުރުސަތު ލިބިގެން ދިޔުން ކަމަށާއި އަދި މި ތައްޔާރުކުރެވޭ ބެކްއަޕް އެޕްލިކޭޝަން ލާންނުޖެހުން ކަމަށް މުޢިއްޒު ވިދާޅުވިއެވެ.
