ސްޕްރީމް ކޯޓްގައި މިއަދު އަޑުއަހަމުންދާ މައްސަލައިގާ ރައީސް ޔާމީނު ވިދާޅުވީ ސާބިތު ދަރަނީގެ މައްސަލަ ވަނީ އިސްތިޢުނާފ ްކޮށްފައި ކަމަށާއި އެ މައްސަލަ ލަސްވުމަކީ އެމަނިކުފާނުގެ ކުށެއް ނޫން ކަމަށް ބެެއްލެވުމަށެވެ.
11 އަހަރަށް ޖަލަށްލާންށާއި 5 މިލިޔަން ޑޮލަރުން ދެއްކުމަށް ހުކުމް ކުރެވިފައި ވާއިރު އެ ޙުކުމާއެކުގައި ބުނާ ފަސް މިލިއަން ޑޮލަރުގެ ޖޫރިމަނާ ދައްކަންވައިފާ ނުވާކަމަށް ބުނެ އީ.ސީގެ ވަކީލު ކުރެއްވު ސުވާލަަށް ޖަވާބުދާރިވެ ޔާމީން ވިދާޅުވިއެވެ. އެ މައްސަލަ ޔާމީންގެ ފަރާތްޕުޅުން ހައިކޯޓުގައި އިސްތިއުނާފް ކޮށްފައިވާއިރު އިސްތިއުނާފީ މައްސަލަ މިހާރު އޮތީ ސަރުކާރުގެ ނޫފޫޒުން މަޑުޖެހިފައި ކަމަށް ވަކީލުންގެ ޓީމުން ބުނެފައިވެއެވެ.
ރިޔާސީ އިންތިހާބުގައި ވާދަކުރުމުގެ ޝަރުތުތަކުގެ ތެރޭގައި ސާބިތު ދަރަންޏެއް އޮތްނަމަ ޙުކުމާއި އެއްގޮތަށް ފައިސާ ދައްކަމުން ގެންދިއުން ހިމެނެއެވެ. އެ ދަރަނި ޔާމީން ދައްކަވާފައި ނުވާ ކަމަށް އިލެކްޝަންސް ކޮމިޝަނުން މިއަދު ވަނީ ސުޕްރީމް ކޯޓުގެ ޝަރިޢަތުގައި ބުނެފައެވެ.
ޔާމީންގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމި ނިންމުމާއި ގުޅިގެން ސުޕްރީމް ކޯޓަށް ޕީޕީއެމްގެ ހުށައަޅާފައިވާ ދުސްތޫރީ މައްސަލާގައި ވާހަކަ ދައްކަވަމުން ޔާމީން ވިދާޅުވީ މި ފައިސާ ނުދެއްކުމުގެ އެއްވެސް ގަސްދެއް ނެތް ކަމަށާއި އެކައިމާ ގުޅޭ ނޯޓިހެއް ވެސް އައިސްފައި ނުވާއިރު އެ ފައިސާ ދެއްކުމުގެ މުއްދަތު ހަމަވެގެން ފައިސާ ހޯދަން ކޯޓަށްދާ ވާހަކައެއް ވެސް ދައުލަތުގެ އެއްވެސް އިދާރާއަކުން އަދި އަންގާފައި ނުވާކަމަށެވެ.
”ފަސް މިލިއަން ޑޮލަރެއް ނޫން އަޅުގަނޑަށް ކުރި މުޅި ޙުކުމް. އެއީ ޖަލު ޙުކުމާއި ޖޫރިމަނާގެ ޙުކުމް މި ދެ ހުކުމް ވަނީ ހައިކޯޓަށް އިސްތިޢުނާފަށް ވައްދާފައި. އެއީ ކުށުން ބަރީއަވުމަށް އަޅުގަނޑަށް ލިބޭ އަސާސީ ހައްގެއް ދެއްތޯ،“ ޔާމީން ވިދާޅުވި އެވެ.
ޔާމީން ވިދާޅުވީ ހައިކޯޓަށް މައްސަލަ ވެއްދުމުން ވަރަށް އަވަހަށް މައްސަލަ ނިންމައިދޭނެ ކަމަށް ހައިކޯޓުން ބުނެފައިވާ ކަމަށާއި އެގޮތުން މި މައްސަލަ ވަރަށް އަވަހަށް ނިމޭނެ ކަމަށް އުންމީދު ކުރެއްވި ކަމަށެވެ.
ނަމަވެސް އެ މައްސަލައިގައި ބާކީ އޮތީ އެންމެ އަޑުއެހުމެއް ކަމަށާއި ނަމަވެސް އެ އަޑުއެހުން ނުބޭއްވި އެއް މަސް ދުވަސްވެފައިވާ ކަމަށް ޔާމީން ވިދާޅުވި އެވެ.
ޖަލު ޙުކުމުގެ އިސްތިއުނާފް ކާމިޔާބު ވާނެ ކަމަށް އުއްމީދު ކުރެއްވި ކަމަށާއި އަދި އިސްތިޢުނާފީ މައްސަލަ ފައިސަލާ ކުރެވެންދެން ޖޫރިމަނާގެ ފައިސާ ދެއްކުން ފަސްކުރުމުގެ އަމުރެއް ނެރެދިނުމަށް އެދިފައިވާނެ ކަމަށް ޔާމީން ވިދާޅުވި އެވެ. އަދި ހައިކޯޓުން އެކަމުގައި ގޮތެއް ނުނިންމަވާ އޮތީ ވެސް ވަކިން އެކަމަށް އަމުރެއް ނެރެދޭން ޖެހޭނެ ކަމަށް ނުބެލެވޭތީ ކަމަށް ގަބޫލުކުރެވޭ ކަމަށްވެސް ޔާމީން ސަރިޢަތުގެ މަޖިލިސްގައި ވިދާޅުވިއެވެ.
މީގެއިތުރުން ޔާމީން ވަނީ ޖޫރިމަނާ ފައިސާ ދެއްކުމުގެ މުއްދަތު ހަމަވާ ތާރީޙް ވެސް ނޭނގޭ ކަމަށާއި އެނގޭނަމަ މުއްދަތު ހަމަވުމުގެ ކުރިން ފައިސާ ދައްކަވާނެ ކަމަށްވެސް ވިދާޅުވެފައެވެ.
”އަޅުގަނޑު މި އުޅެނީ މުޅި މައްސަލަ އިސްތިއުނާފް ކޮށްގެންނޭ. އިސްތިޢުނާފް ނުހިނގުމަކީ އަޅުގަނޑުގެ ކުށެއް ނޫނޭ،“ ޔާމީން ވިދާޅުވި އެވެ. ބެލެވޭގޮތުގައި މިރޭ މައްސަލައިގެ އަޑުއެހުންތައް ނިންމާލާނެއެވެ.
