ޕީއެންސީގެ ރިޔާސީ ޓިކެޓަށް ކުރިިމަތިލުމުގެ ފުރުސަތު ހުޅުވާލައިފިއެވެ.
ޕީއެންސީން މިއަދު ހެނދުނު ބޭއްވި މަޝްވަރާ މަޖިލީހުގެ ބައްދަލުވުމުގެ އަޣުލަބިއްޔަތުން ވަނީ އަންނަ ރިޔާސީ އިންތިޚާބަށް ކެނޑިޑޭޓަކު ނެރެން ނިންމައިފައެވެ.
އެއާއެކު ރިޔާސީ ޓިކެޓަށް ކުރިމަތިލުމުގެ ފުރުސަތު ވަނީ ހުޅުވައިލާފައެވެ. ކުރިމަތިލުމުގެ މުއްދަތު ހުޅުވާލައިފައިވަނީ މިއަދު މެންދުރުފަހު 14:00 އަށެވެ.
ކުރިމަތިލާ ފަރާތްތަކުގެ ތެރެއިން ރިޔާސީ ކެނޑިޑޭޓް ކަނޑައަޅަން ހަމަޖެހިފައިވަނީ މިއަދު 16:00 ގައި ބާއްވާ މަޝްވަރާ ބައްދަލުވުމުގައެވެ.
މައުލޫމާތު ލިބިފައިވާ ގޮތުން ޕީއެންސީގެ ރިޔާސީ ޓިކެޓަށް ޝައުގުވެރިކަން ފާޅުކުރައްވައިފާ ބޭފުޅުންގެ ތެރޭގައި ޕީޕީއެމްގެ ނައިބު ރައީސް ޑރ.މުޙައްމަދު މުޢިއްޒާއި ޕީއެންސީގެ ނައިބު ރައީސް އާދަމް ޝަރީފް ޢުމަރު ހިމެނިވަޑައިގަންނަވައެވެ.
ރިޔާސީ ޓިކެޓަށް ކުރިިމަތިލެއްވުމަށްޓަކައި ޑރ.މުޙައްމަދު މުޢިއްޒު މިހާރު ވަނީ ޕީއެންސީއަށް ސޮއިކުރައްވައިފައެވެ.
މުޢިއްޒު ވިދާޅުވި ގޮތުގައި ޕީއެންސީގެ ރިޔާސީ ޓިކެޓަށް ކުރިމަތިލައްވަން ނިންމެވީ ޕީޕީއެމްގެ ރިޔާސީ ކެނޑިޑޭޓް ރައީސް ޔާމީން ޢަބްދުލްޤައްޔޫމަށް އިންތިޚާބުގައި ވާދަނުކުރެއްވޭ ހާލަތެއްގައި އޭނަ އިންތިޚާބުގައި ވާދަކުރައްވައި ކާމިޔާބު ކުރެއްވުމަށްފަހު ރައީސް ޔާމީން ޖަލުން މިނިވަން ކުރެއްވުމަށްޓަކައެވެ.
