ކުރިއަށް އޮތް ރިޔާސީ އިންތިޚާބުގައި ވާދަކުރަން އިދިކޮޅު ޕީއެންސީން މިއަދު ނިންމައިފިއެވެ.
އެ ގޮތަށް ނިންމީ ޕީއެންސީން މިހާރު ކުރިއަށްގެންދާ މަޝްވަރާ މަޖިލީހުގެ ބައްދަލުވުމުގައެވެ.
ޕީއެންސީގެ މަޝްވަރާ މަޖިލީހުގެ ބައްދަލުވުމުގައި ބައިވެރިވި 47 މެންބަރުންގެ ތެރެއިން 44 ވޯޓުގެ އަޣުލަބިއްޔަތުން ފާސްކުރީ
ކުރިއަށް އޮތް ރިޔާސީ އިންތިޚާބުގައި އެ ޕާޓީން ވާދަކުރުމަށެވެ.
މިއާއެކު ދެން އޮންނާނީ ޕްރައިމަރީގައި ވާދަކުރަން ބޭނުންވާ ފަރާތްތަކަށް އެ ފުރުސަތު ހުޅުވައިލުމެވެ.
މައުލޫމާތު ލިބިފައިވާ ގޮތުން ޕީއެންސީގެ ރިޔާސީ ޓިކެޓަށް ޝައުގުވެރިކަން ފާޅުކުރައްވައިފާ ބޭފުޅުންގެ ތެރޭގައި ޕީޕީއެމްގެ ނައިބު ރައީސް ޑރ.މުޙައްމަދު މުޢިއްޒާއި ޕީއެންސީގެ ނައިބު ރައީސް އާދަމް ޝަރީފް ޢުމަރު ހިމެނިވަޑައިގަންނަވައެވެ.
ނަމަވެސް އެއިން އެއްވެސް ބޭފުޅަކު ރަސްމީކޮށް އަދި މިކަން ހާާމައެއް ކުރައްވައިފައެއް ނުވެއެވެ.
ޕީއެންސީން ރިޔާސީ ކެނޑިޑޭޓަކު ނެރެން ނިންމީ ޕީޕީއެމްގެ ރިޔާސީ ކެނޑިޑޭޓް ރައީސް ޔާމީން ޢަބްދުލްޤައްޔޫމަށް ވާދަނުކުރެއްވޭ ހާލަތެއްގައި އެ ތަން ފޫބެއްދުމަށެވެ. އީސީން ވަނީ ޔާމީންގެ ކެންޑިޑެސީ ބަލައިނުގަންނަން ނިންމައިފައެވެ. އެ މައްސަލަ ސްޕްރީމް ކޯޓަށް ހުށަހަޅާފައިވާއިރު އެ ކޯޓުން މިހާރު ވަނީ ޖަވާބުދާރީވުމަށް އީސީއަށް އަންގައިފައެވެ.
