ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމަށް ޖަލްސާ ބޭއްވުމުގެ ހުއްދަ އަންނަ މަހުގެ ދެވަނަ ދުވަހު ދޭން ނިންމައިފިއެވެ.
ދަ ޑިމޮކްރެޓްސް ރަޖިސްޓްރީކުރަން 3,560 މީހުންގެ ސޮޔާއެކު އިލެކްޝަން ކޮމިޝަނަށް ހުށަހެޅީ މި މަހުގެ 01 ވަނަ ދުވަހުއެވެ. އެ ފޯމުތަކުގެ ތެރޭގައި ސައްހަ 3,000 ފޯމު ހުރިކަމަށް އީސީގެ ރައީސް ފުއާދު ތައުފީޤު ވިދާޅުވި ނަމަވެސް އެ ކޮމިޝަނުގެ ބައެއް މެންބަރުން ބޭނުންވެވަޑައިގަމޮތީ ހުއްދަ ދިނުމުގެ ކަންކަން ތިން މަސް ދުވަހަށް ދިގު ދަންމައިލުމަށެވެ. އެއާއެކު ޑިމޮކްރެޓްސްއިން ވަނީ އީސީއަށް ބޮޑެތި ތުހުމަތުތަކެއް ވެސް ކޮށްފައެވެ.
ކޮމިޝަނުގެ ނައިބު ރައީސް އިސްމާޢީލް ޙަބީބް މިއަދު ކުރެއްވި ޓުވީޓެއްގައި ވިދާޅުވީ ޑިމޮކްރެޓްސް އުފެއްދުމަށް ޖަލްސާ ބޭއްވުމުގެ ހުއްދަ ޖުލައި 2 ވާ އާދީއްތަ ދުވަހު ދިނުމަށް ކޮމިޝަނުން ނިންމާފައިވާ ކަމުގައެވެ. އަދި ޕާޓީ އުފެއްދުމުގެ ހުއްދަ އަށް އެދިވަޑައިގެންނެވި ހެންވޭރު ހުޅަނގު ދާއިރާގެ މެންބަރުވޙަސަން ލަތީފަށް މިހާރު އެކަން އަންގާފައިވާ ކަމަށް ޙަބީބް ވިދާޅުވިއެވެ.
ޕާޓީ ރަޖިސްޓްރީ ކުރުމުގެ ހުއްދަ ދިނުން ލަސްވާތީ ޑިމޮކްރެޓްސްއިން ވަނީ ވަރަށް ބޮޑަށް ނުރުހުން ފާޅުކޮށް ވާހަކަ ދައްކައިފައެވެ.
ސެޕްޓެމްބަރުގައި އޮންނަ ރިޔާސީ އިންތިޚާބަށް ކެންޑިޑޭޓަކު ނެރޭނެކަން ޑިމޮކްރެޓްސްއިން އިއުލާނުކޮށްފައިވާއިރު, އެ ޕާޓީން ވަނީ ހުއްދަ ނުދިނަސް ކެމްޕޭން ފަށާނެ ކަމަށް ވެސް ބުނެފައެވެ.
