ސީ. އެން. އެން. އިން. ޚަބަރު ދީފައިވާގޮތުގައި މިދިޔަ އާދީއްތަދުވަހު ގުރީކުގެ ކަރަގޮނޑަށް ފެތުނު މަސްބޯޓުން ދަތުރުކުރި މީހުންގެ ތެރެއިން ކަނޑަށް ޣަރަގުވެގެން މަރުވި މީހުންގެ ތެރޭގައި ޕާކިސްތާނުގެ 300 އަށްވުރެން ގިނަ މީހުންވެސް ހިމެނޭކަން އެނިއްޖެއެވެ.
އެހެންނަމަވެސް ގުރީކު ސަރުކާރުން އަދި މިހާތަނަށް މަރުވިމީހުންގެ އަދަދު ހާމައެއް ނުކުރެއެވެ. މިބޯޓުން ދަތުރުކުރި މީހުންނަކީ ސިޔާސީ ޙިމާޔަތް ހޯދުމަށާއި ބަނޑުހައިހޫނު ކަމުން ސަލާމަތް ވުމަށާއި ގައުމުތަކކުގައި ހިނގަމުންދާ ސިޔާސީ އަދި މަޒުހަބީ ދެކޮޅުވެރިކަމުން ސަލާމަތް ވުމަށްޓަކައި ގޮތެއް ފެނޭތޯ ކަނޑުމަގުން ޔޫރަޕްގެ ގައުމުތަކަށް ދެވޭތޯ ދަތުރުފަށައިގެން އުޅުނު ބައެކެވެ.
ކޮންމެ އަހަރަކުވެސް އެފަދައިން އެތައް ބަޔަކު ޔޫރަޕުގެ ގައުމުތަކަށް ދެވޭތޯ މަސައްކަތް ކުރަމުން ދާއިރު ގިނަ އަދަދެއްގެ ބަޔަކު ކަނޑުވެ މަރުވެގެންދާކަންވެސް ވަނީ ފާހަގަ ކުރެވިފައެވެ.
މިފަހަރުގެ ޙާދިސާ މެދުވެރިވި ބޯޓަކީ 750 މީހުންނާއެކު ލީބިޔާއިން އިޓަލީއަށް ދަތުރުކުރި ބޯޓެކެވެ. އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިންވެސް ހިމެނެއެވެ.
މިބޯޓުގެ ޙާދިސާގައި މަރުވެދިޔަ މީހުންގެ މަޢުލޫމާތު ހާމަކުރަމުން ޕާކިސްތާން ސެނޭޓުގެ ރައީސް މުޙައްމަދު ސާދިގް ސަންޖްރާނީ އެމީހުންގެ ޢާއިލާތަކަށް ތަޢުޒިޔާ ވިދާޅުވެ މަރުވެދިޔަ މީހުންނަށް ހެޔޮދުޢާ ކުރެއްވިއެވެ.
ޔުނައިޓެޑް ނޭޝަންސްގެ ރެފިއުޖީންނާއިބެހޭ އިދާރާއިން ހާމަކޮށްފައިވާ ގޮތުގައި މިފަހަރުގެ ޙާދިސާއަކީ މެޑިޓެރޭނިއަން ކަނޑުގައި ރެފިއުޖީންނަށް މެދުވެރިވި އެންމެ ހިތާމަވެރި އެފަދަ ޙަދިސާއެވެ.
އެތައް ގައުމެއްގައި އެކި ސަބަބުތަކާހުރެ ދިރިއުޅެވޭނެ ގޮތެއް ނެތުމުން ކަނޑުވެ މަރުވެގެން ދިޔަސް ހެޔޮކަމަށްދެކި އެހެން ގައުމުތަކަށް ހިޖުރަކުރާ މީހުންނާއި ދޭތެރޭ ޔޫރަޕްގެ ގައުމުތަކުން ގެންގުޅޭ އަނިޔާވެރި ސިޔާސަތާއިމެދު ވިސްނާ ފިކުރުކުރަން ވަނީ ޖެހިފައެވެ.
މިދިޔަ ހަފްތާގެ ހާދިސާގައިވެސް ތުޙުމަތުގެ އިނގިލި ދިއްކުރެވެނީ ގުރީކުގެ ކޯސްޓްގާޑުން ކަންތައްކުރި ގޮތާމެދުގައެވެ. ބުނެވޭގޮތުގައި އެބޯޓު ބަންޑުންޖަހާލަން މެދުވެރިވީ ގްރީކްގެ ކޯސްޓްގާޑުން ކަންތައްކުރި ގޮތުންނެވެ. ޙާދިސާ މެދުވެރިވި ބޯޓުގައި ތިބި ބައެއްމީހުންގެ ތިމާގެ މީހުންގެ ފަރާތުން ސީ އެން އެން އަށް މަޢުލޫމާތު ދީފައިވާގޮތުގައި ބޯޓު ބަންޑުން ޖަހާލީ ކޯސްޓުގާޑުން ބޯޓު ކަފުޖަހައިގެން ދެމުމުގެ ތެރޭގައެވެ.
އެހެންނަމަވެސް ގުރީކު ސަރުކާރުން އެވާހަކަތައް ދޮގުކޮށް ކޯސްޓުގާޑުން އެބޯޓާ ހަމަޔަށް ދިއުމުގެ ކުރިން ބޯޓުއޮތީ ބަންޑުންޖަހާލާފައި ކަމަށް ބުނެއެވެ.
ޕާކިސްތާނުން މިހާރު ގުނަމުންގެންދަނީ މީގެކުރިން ދުވަހަކުވެސް އެ ގައުމުން ދެކެފައިނުވާފަދަ އިގްތިސާދީ ދަތި ދުވަސްތަކެކެވެ.
މިހާލަތުން އަރާގަނެވިދާނެ ކަމުގެ އުންމީދެއްވެސް ނެތިފައިވާއިރު ގައުމުގައި އުފެދިފައިވާ ސިޔާސީ ހަލަބޮލިކަމުގެ ސަބަބުން ގައުމުގެ ރައްޔިތުންނަށް އިތުރު މުސީބާތްތަކަކާއި ކުރިމަތިލާން ޖައްސައިފިއެވެ. 220 މިލިއަން މީހުން ދިރިއުޅޭ ޕާކިސްތާނުގައި ކޮންމެހެން ބޭނުންވާ ކާބޯތަކެތި ލިބުން ދަތިވުމުގެ ސަބަބުން ކާބޯތަކެތި ވިއްކާ ތަންތަނުގައި މީހުންކިއޫޖެހި ތާށިވެ ބޮޑެތި އަނިޔާތައްލިބި މަރުވުމުގެ ބިރާ ކުރިމަތިލާން ވަނީ ޖެހިފައެވެ.
މެޑިޓެރޭނިއަން ކަނޑުގައި މެދުވެރިވި މިޙާދިސާގައި މަރުވެދިޔަ ޕާކިސްތާނުގެ ރައްޔިތުންގެ މައްސަލަ ތަޙްގީގުކުރަން އަންގަވައި މި ދިޔަ ހޯމަ ދުވަހަކީ ގައުމީ ހިތާމައިގެ ދުވަހެއްގެ ގޮތުގައި ބޮޑުވަޒީރު ޝާހްބާޒް ޝަރީފް ވަނީ ހަމަޖައްސަވާފައެވެ.
އަދި އެމީހުން ގައުމުން ބޭރަށް ފޮނުވުމުގައި ބައިވެރިވި ހުރިހާ މީހުން ޝަރީޢަތުގެ ކުރިމައްޗަށް ގެނެވޭނެ ކަމަށް ވަޢުދުވެ ވަޑައިގެންނެވިއެވެ.
One Response
ސުބުޙާނަﷲ. ގައުމުގައި ނުލަފާ މީހުން ވެރީންގެ ގޮތުގައި އިސްކުރެވުމުގެ ހިތާމަޔަކީ މިއީއެވެ. އެ އިސްކުރެވުނު ޚާދިމުކަލޭގެ އުފަލާއަރާމުގައި ބޭނުންގޮތަކަށް އުޅޭލާއިރު ގައުމުގެ ރައްޔަތުން ބަނޑުހައިހޫނު ކަމުގައެވެ. ހެޔޮވާނީ ކިހިނެއްތޯއެވެ. މާތްﷲ އެމީހުންގެ ފާފަފުއްސަވާ ސުވަރުގޭގެ އަހުލުވެރީންކަމުގައި ލައްވާށިއެވެ. އާމީން!