ހަ އަހަރުގެ މެދުކެނޑުމަކަށްފަހު އެކުވެރި އަރަބި އިމާރާތާއި ޤަތަރާއި ދެމެދު އޮތް ގުޅުން ބަދަހިކުރުމަށްޓަކައި ދެ ގައުމުގެ އެމްބަސީތައް އަލުން ހުޅުވާފައިވާކަން އެ ދެ ގައުމުން ހާމަކޮށްފިއެވެ.
ހޯމަ ދުވަހު ދެ ގައުމުން ނެރުނު ބަޔާނުގައި ބުނެފައިވާގޮތުގައި އަބޫ ދާބީގައި ޤަތަރުގެ އެމްބަސީއަކާއި، ދުބާއީގައި ޤަތަރު ކޮންސުލޭޓެއް މިހާރު ހުޅުވާފައިވާއިރު، ދޯހާގައި އެކުވެރި އަރަބި އިމާރާތުގެ އެމްބަސީއެއް ވެސް މިހާރު ވަނީ ހުޅުވާފައެވެ.
2017 ވަނަ އަހަރު، އެކުވެރި އަރަބި އިމާރާތުންވަނީ ސަޢޫދީ ޢަރަބިއްޔާއާއި، ބަހްރޭން އަދި މިޞްރާއެކު ބައިއަތުހިފައި ޤަތަރު ބޮއިކޮޓްކޮށްފައެވެ. އެގައުމުތަކުން ބުނެފައިވަނީ ޤަތަރު ބޮއިކޮޓް ކުރަންޖެހުނީ ބިރުވެރިކަމާއި ނާމާންކަން ފަތުރާ ޓެރަރިސްޓް ޖަމާއަތްތަކަށް ދޯހާއިން ދޭ އެއްބާރުލުމާ ގުޅިގެން ކަމަށާއި ޤަތަރުން އިރާނާއި މުސްލިމް ބްރަދަހުޑާއި އޮންނަ ގުޅުން ވަރުގަދަކުރުމުން ކަމަށެވެ.
