ރައްޔިތުންގެ މަޖިލީހުގެ ދާއިމީ ކޮމިޓީތައް އަލުން އެކުލަވާލައި ނިމެންދެން މަޖިލީހުގެ މި ހިނގާ ދައުރު ދިގު ދަންމައިލަން އެމްޑީޕީގެ ޕާލަމެންޓްރީ ގުރޫޕުން ހުށަހަޅާފައިވަނިކޮށް އެެއަށް ގޮތެއް ނުނިންމައި މަޖިލިސް ޗުއްޓީއަށް ހިނގައްޖެއެވެ.
މަޖިލީހުގެ ރައީސް މުޙައްމަދު ނަޝީދާއި ނައިބު ރައީސް އީވާގެ އިތުބާރު ނެތްކަމުގެ މައްސަލައެއް ހުށަހަޅާފައިވާތީ ރިޔާސަތު ބަލަހައްޓަން ދެ ބޭފުޅުން ވެސް އުޒުރުވެރިވެވަޑައިގަތުމުން ވޭތުވެދިޔަ ދުވަސްތަކުގައި މަޖިލިސް އޮތީ ހުއްޓިފައެވެ.
އެހެންވެ ރިޔާސަތު ބަލަހައްޓަވަމުން އައީ ވިލިފުށި ދާއިރާގެ މެންބަރު ޙަސަން ޢަފީފެވެ. ނަމަވެސް ރައީސާއި ނައިބު ރައީސް ނޫން އެހެން ބޭފުޅަކަށް ރިޔާސަތު ބެލެހެއްޓެވޭނީ ވިދިވިދިގެން ތިން ޖަލްސާއަށް ކަމަށްވާތީ ފާއިތުވި ދެ ދުވަހު ޖަލްސާ ބާއްވާފައެއް ނުވެއެވެ.
މަޖިލިސް ހުއްޓިފައި އޮތުމަށްފަހު މަޖިލީހުގެ ރައީސް އަލުން ރިޔާސަތާ ހަވާލުވެވަޑައިގެން މިއަދު ވަނީ ޖަލްސާ ބާއްވަވައިފައެވެ.
މިއަދުގެ ޖަލްސާއަށް އެޖެންޑާކޮށްފައި އޮތީ ދާއިމީ ކޮމިޓީތައް އެކުލަވައިލުމުގެ މަސައްކަތް ނަމަވެސް ވޯޓަށް އެހުން އެޖެންޑާކޮށްފައެއް ނުވެއެވެ. އެހެންވެ ދައުރު ދިގު ދަންމާލައި އެ މަސައްކަތްތައް ނިންމުމަށް އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ހުށަހެޅުއްވިއެވެ.
ނަމަވެސް އެކަން ކުރެއްވޭނީ ރިޔާސަތުން ހުށަހަޅައިގެން ކަމަށް ވިދާޅުވެ ނަޝީދު އެދިވަޑައިގަތީ މެންބަރުން އެޖެންޑާއަށް ހުރުމަތްތެރިކޮށް ހިއްތެވުމަށެވެ.
ނަޝީދު ވިދާޅުވީ އެޖެންޑާއާ ޚިލާފަށް ވާހަކަ ދައްކަވައި ކަންކަން ހުށަހަޅުއްވައިގެން ނުވާނެ ކަމުގައެވެ.
މެންބަރުން ބަހުސް ކުރެއްވުމަށް އެޖެންޑާގައި އޮތް ދެ ގަޑިއިރު ހަމަވުމުން ދައުރު ދިގު ދަންމައިނުލައި ނަޝީދު ވަނީ މަޖިލިސް ޗުއްޓީއަށްދިޔަ ކަން އިއުލަާނު ކުރައްވައި ދައުރު ނިންމަވާލައްވައިފައެވެ.
One Response
މިއަދު ނަޝީދަށް އެންމެ ހަޔާތްގޮވާ އެމްޑީޕީގެ މެމެބަރުނަކީ ނަޝީދު ފަސްބައިގާ އެލިގެން އެވަރެއްނެތިގެން އުޅުނުމީހުނެވެ. ދުނިޔޭގައި ދައްކަވަން ހުރިއެއްޗެއް ދައްކަވާފަ ގެންދަވާނީ. އަދުން ހުސޭނު، ރޮޒެއިނާ، ފަލާ، މީކާޅު، ލަދުހަޔާތް ނެތުމަކީ ދުނިޔޭގައި އުޅެން ވަރަށް ފަސޭހަގޮތެކެވެ. ނަޝީދަށްވެސް ފިލާވަލެއް ލިބިއްޖެކަމަށް ހީކުރަމެވެ.