ބްރިކްސްގެ ގައުމުތަކާއެކު ކުރާ މުއާމަލާތްތަކުގައި އެމެރިކާ ޑޮލަރު ބޭނުންކުރުން މިޞްރުން ހުއްޓާލަން ނިންމާފައިވާކަމަށް މިޞްރުގެ ސައިޕްލައި މިނިސްޓަރު، ޢަލީ މޮސެލީ ވިދާޅުވެއްޖެއެވެ.
މީގެއިތުރުން، ޑޮލަރުގެ މަޅީން ސަލާމަތްވުމަށް އެތައް ގައުމަކުން ގުޅިގެން ކުރަމުންދާ މަސައްކަތުގެ ދަށުން، ބްރިކްސްގެ ގައުމުތަކާއެކު ކުރިއަށް އޮތް މަސްތަކުގައި މިގައުމުތަކުންވެސް ޑޮލަރު ބޭނުންކުރުން ދޫކޮށްލުމަށްވަނީ ނިންމާފައެވެ.
މޮސެލީއާ ހަވާލާދީ ރޮއިޓަރސްރިން ރިޕޯޓުކޮށްފައިވާ ގޮތުގައި، އިންޑިއާ، ރަޝިއާ އަދި ޗައިނާއިން އެތެރެކުރާ މުދަލުގެ އަގު ދެއްކުމަށް މިޞްރުން ދެން ބޭނުންކުރާނީ އެގައުމުގެ ފައިސާއެވެ. އަދި އިންޑިއާއާއެކު ލޭންދޭނުގެ އުސޫލުން މުދާ ގަތުމުގެ މަޝްވަރާތަކެއް ކުރިއަށްދާކަން ފާހަގަކޮށް، ”އެއްވެސް ކަމެއް ނުނިންމާކަމަށާއި، އަދި ކުރިއަށްދަނީ މަޝްވަރާތައް“ ކަމުގައި މޮސެލީ ބުނެފައިވެއެވެ.
ބްރިކްސްގެ ގައުމުތަކުން އިޤްތިޞާދީ ބޭނުންތަކަށް ބްރިކްސް ކަރަންސީ ބޭނުންކުރަން ފަށަން އުޅޭކަމުގެ ޚަބަރަކީ ގިނަބައެއްގެ ޝައުގުވެރިކަން ހޯދި ހަބަރެކެވެ. އަދި ދުނިޔޭގެ ބާރުގަދަ ގައުމުތަކުގެ މެދުގައި ބާރުތައް ބެހިގެންދާގޮތަށް އޭގެ ސަބަބުން އަސަރުކުރާނެ ނިންމުމެއްކަމަށްވެސް ބެލެވެއެވެ.
