އެއްޖިންސުން ގުޅުންހިންގުމާއި ޖިންސު ބަދަލުކުރާ މީހުންގެ ދިރިއުޅުމުގެ ވައްޓަފާޅިއަކީ ހިމާޔަތްކުރަންޖެހޭ އެއްޗެއްކަމަށް ބުނެ އެ ފަރާތްތަކުގެ ޕްރޮޕަގެންޑާ ކުރިއަރުވާ ސަޕޯޓަރުންނަށް ތުރުކީގެ ވެރިކަންކުރާ ޖަސްޓިސް އެންޑް ޑިވެލޮޕްމަންޓްގެ ފަރާތުން އިސްތަންބުލް ތަމްސީލުކުރައްވާ މަޖިލިސް މެންބަރެއް ކަމަށްވާ ރުމޭސާ ކަޑަކް ރައްދުދެއްވައިފިއެވެ.
”މީގެ ކުރިންވެސް އެއްވެސް ފަރާތެއްގެ ދިރިއުޅުގެ ވައްޓަފާޅިއާއި ނަފްސުގެ މިނިވަންކަމާއި އަޅުގަނޑުމެން ނުބެހެން. އަދި އެމީހަކު ދިރިއުޅުމަށް ގަސްދުކުރާ ގޮތަކަށް ދިރިއުޅުމުގެ ހައްޤަކީ ގާނޫނުން ކޮންމެ މީހަކަށް ލިބިދީފައިވާ ހައްޤެއް.“ ކަޑަކް ނެރުއްވި ބަޔާނެއްގައި ބުނެފައިވެއެވެ.
އެ ބަޔާނުގައި އިތުރަށް ބުނެފައިވަނީ އެލްޖީބީޓީކިއު އަކީ ދިރިއުޅުމުގެ ވައްޓަފާޅިއެއް ނޫންކަމަށާއި، އެއީ ވަރަށް ރޭވުންތެރިކަމާއެކު ހިންގާ މަގުފުރެއްދުމާއި އާބާދީ އިތުރުވިޔަ ނުދިނުމުގެ އަމަލެއް ކަމަށެވެ. ގައުމުގެ ޒުވާނުން މިފަދަ ކަމެއްގެ ޝިކާރައަކަށް ހެދުމަކީ ނަފްސުގެ މިނިވަންކަމުގެ ބޭނުންހިފުން ނޫންކަމަށާއި، އެއީ ރާވައިގެން ހިންގާ އެޖެންޑާއެއް ކަމަށެވެ.
އޭގެއިތުރުން އެއީ އެމީހަކު އެދޭގޮތް ކަމަށާއި، އޭނާގެ ނަފްސުގެ މިނިވަންކަން ކަމުގައި ބުނެ ބަރީއަކުރާ މި އަމަލަކީ ބިރުވެރިކަން ފެތުރުމުގެ ނުރައްކާތެރި، ޓެރަރިޒަމްގެ އަމަލެއްކަމަށް ވެސް ކަޑަކްގެ ބަޔާނުގައިވެއެވެ. އެއީ ވަކިވަކި މީހުންގެ އަމިއްލަ ނިންމުމެއްކަމަށް ބުނާއިރު، އެލްޖީބީޓީކިއު ފިކުރުގެ މައުލޫމާތު ފަތުރައި އެކަމަށް ތާއީދުކުރާ ޖަމާއަތްތަކަށް ބޮޑެތި އަދަދުތަކުން ފައިސާގެ އެހީ ފޯރުކޮށްދެނީ ކީއްވެތޯ ވެސް އޭނާ ސުވާލު އުފެއްދެވިއެވެ. އަދި އެތައް ބިލިއަން ޑޮލަރުގެ އަދަދުތަކެއް އިސްތިހާރު ބަޖެޓުގެ ގޮތުގައި ކަނޑައަޅައި، ޒުވާނުންގެ ޝައުގުވެރިކަން އަތުލައިގަންނަން މަސައްކަތް އެކުރަނީ ކީއްވެތޯ ވެސް ކަޑަކް ސުވާލުކުރެއްވިއެވެ.
One Response
ވަރަށްވެސް ބޮޑު ތެދުފުޅެކެވެ. އެހެނީ އެފްރިކާއައި ވަރަށް ގިނަ ގައުމުތަކުގައި ބަނޑުހައިހޫނުކަމުގައި މަރުވަމުންދާ ނިކަމެތި ގޮތެއްނެތިފާވާ ކުޑަކުދިންނާއި ޅަދަރިމައިންނާއި މުސްކުޅިންނަށް އެފައިސާއިން އެނހީތެރިކަން ނުކުރަނީ ކީއްވެގެން ހެއްޔެވެ. ހަމަސީދާ ލޫތުގެ ފާނުންގެ ގައުމު ނުރައްކާތެރި ބަލިފެތުރުމަށެވެ. އެކަން އެގޮތަށް ވިޔަ ދީގެން ނުވާނެއެވެ.