އެމެރިކާގެ ސެކްރެޓަރީ އޮފް ސްޓޭޓް، އެންޓަނީ ބްލިންކެން މިދިޔަ ހަފްތާގައި ސަޢޫދީ ޢަރަބިއްޔާއަށް ކުރެއްވި ދެ ދުވަހުގެ ރަސްމީ ދަތުރުފުޅުގައި ސަޢޫދީގެ އިސް އޮފިޝަލުންނާއި ބައްދަލު ކުރެއްވިއިރު، ހަތް އަހަރަށްފަހު އެ ގައުމުގައި އިރާނުގެ އެމްބަސީއެއް ހުޅުވުމަށް ރިޔާދުގައި ހަފްލާއެއް ބާއްވާފައިވަނީވެސް މިދިޔަ ހަފްތާގެ ތެރޭގައެވެ. ޗައިނާގެ އެއްބާރުލުމާއެކު މެދު އިރުމަތީގެ ގައުމުތަކުން އީރާނާއެކު ކުރިން އޮތް ގުޅުން ބޭއްވުމަށް މާރިޗު މަހު ވަނީ އެއްބަސްވެފައެވެ.

ފާއިތުވެދިޔަ އަހަރު ތެރޭގައި ޗައިނާއާ ދެކޮޅުވެރި އެތައް ސިޔާސަތުތަކެއް އެމެރިކާއިން އެކުލަވާލައި ކުރިއަރުވާފައިވެއެވެ. އަދި ރަޝިއާއާއި ޗައިނާ ގުޅިގެން އަސްކަރީ އެއްބަސްވުމެއްގައި ސޮއިކުރި ފަހުން އެމެރިކާގެ މި މަސައްކަތްތައް އިތުރުކޮށްފައިވާކަން ފާހަގަކުރެވެއެވެ.

ޗައިނާއިންވަނީ މެދުއިރުމަތީގެ ގައުމުތަކުން ހަރުކަށިކަމާއި، އަނިޔާވެރި ގޮތްތައް ދޫކޮށްލައި، ސުލްހަވެރިކަމާއި އަމަންއަމާންކަން ގާއިމުކޮށް، އެހެން ގައުމުތަކުން އެ ސަރަހައްދުގެ ވިޔަފާރިތަކާއި އިގުތިސާދު ބިނާ ކުރެވޭނެ އެހެނިހެން ފުރުސަތުތައް ހޯދައި ދިނުމަށް ގޮވައިލާފައެވެ.

ފާއިތުވެދިޔަ އަހަރުތަކުގައި މެދުއިރުމަތީގެ ގައުމުތަކުގެ މެދުގައި އޮތް ބައިބައިވުމާއި ހަމަނުޖެހުމުގެ ބޭނުން ހިފައި އެ ސަރަހައްދަށް ބޭނުންތެރި މީޑިއޭޓަރެއްގެ ގޮތުގައި އެމެރިކާގެ ބާރުވަނީ ގަދަކޮށްފައެވެ. އެހެންނަމަވެސް، ހުޅަނގުގެ ވާދަވެރިޔާ ގެންގުޅުނު ސިޔާސަތުތަކާއި މުޅިން ތަފާތު ސިޔާސަތުތަކެއް ހުށައަޅާ، މަދު ދުވަސްކޮޅެއްގެ ތެރޭގައި ޗައިނާއިން ވަނީ މެދު އިރުމަތީގައި އެމެރިކާގެ ރޯލު އަދާކުރަން ފަށާފައެވެ.

މިދިޔަ އަހަރުގެ ޖުލައި މަހުގައި ރައީސް ޖޯ ބައިޑެން ސައޫދީ ކުރެއްވި ރަސްމީ ދަތުރުފުޅުގައި ބްލިންކެން ވަނީ ރައީސް އަރިހު ސައުދީއަށް ގޮސްފައެވެ. އެހެންނަމަވެސް ފަހުގެ އަހަރުތަކަށް ބަލާއިރު، ދެ ގައުމުގެ ގުޅުންތަކަށް ބުރޫ އަރާފައިވާއިރު، މެދުއިރުމަތިން އެމެރިކާއަށް ލިބެމުންދިޔައީ ފިނި ޖަވާބުތަކެކެވެ. އަދި ޖޫން 6 އިން 8 އަށް ބްލިންކެން ސައުދީއަށް ދަތުރުކޮށްފައިވަނީ ރިޔާޟުގައި ބޭއްވުމަށް ހަމަޖެހިފައި އޮތް އަރަބް-ޗައިނާގެ ވިޔަފާރި ކޮންފަރަންސް ފެށުމަށް އެ ގައުމުން ތައްޔާރުވެފައިވަނިކޮށެވެ.

ކުއަލަ ލަމްޕުރްގައި ހުންނަ އޭޝިއާ މިޑްލް އީސްޓް ސެންޓަރުގެ އިސް ފެލޯއެއްގެ ގޮތުގައި މަސައްކަތްކުރައްވާ މުޢާދު ޒަކީ ވިދާޅުވީ، ފަހުގެ އަހަރުތަކުގައި ޚާރިޖީ ގުޅުންތަކުގައި ސައުދީގެ ތަދުބީރީ މިނިވަންކަން ހޯދާފައިވާ ކަމަށާއި، ސައުދީ ވަލީއުލް އަޙްދުގެ ގޮތުގައި ހުންނަވާ އަމީރު މުޙައްމަދު ބިން ސަލްމާން ދައްކަވާފައިވާ ވެރިކަމުގެ މިސާލަކީ އެމެރިކާގެ ޚާރިޖީ ސިޔާސަތުތަކުގެ ބޭނުންހިފާ ވިސްނުންފުޅެއް ނޫންކަމަށެވެ.