މަޖިލިހުގެ ރައީސް މުޙައްމަދު ނަޝީދު މަގާމުން ވަކިކުރަން އެމަނިކުފާނުގެ ޕާޓީ އެމްޑީޕީ އިން ހުށަހަޅާފައިވާ މައްސަލައިގެ 14 ދުވަހުގެ ނޯޓިސް އެ މަނިކުފާނަށާއި މެމްބަރުންނަށް މަޖިލިހުގެ އިދާރާ އިން ފޮނުވައިފި އެވެ. ނަޝީދުއަކީ މިއަދުވެސް އެމްޑީޕީގެ ރައީސް ވެސްމެއެވެ.
އިތުބާރުނެތްކަމުގެ މައްސަލަ އެމްޑީޕީ އިން މިދިޔަ ބުދަ ދުވަހު ރައްޔިތުންގެ މަޖިލީހަށް ހުށަހަޅާފައިވަނީ 54 މެންބަރުންގެ ސޮޔާއި އެކުގައެވެ. ރައްޔިތުންގެ މަޖިލީހުގައި އެމްޑީޕީއަށް ނިސްބަތްވާ 56 މެންބަރުން ތިއްބަވަ އެވެ. އެއީ ނަޝީދުވެސް ހިމެނިގެނެވެ.
މަޖިލިސްގެ އިރުބާރު އެމަނިކުފާނަށް ގެއްލިފައިވާކަމަށް ސޮއިކޮށްފައިވާ 54 މެންބަރުންގެ ތެރޭގައި ހިމެނެނީ އެމްޑީޕީއަށް ނިސްބަތްވާ 50 މެންބަރުންނާއި ކާށިދޫ ދާއިރާގެ މެމްބަރު އަބްދުއްލާ ޖާބިރު، ނޮޅިވަރަމް ދާއިރާގެ މެމްބަރު މުޙައްމަދު ނަޝީދު, ތުލުސްދޫ ދާއިރާގެ މެމްބަރު އިބްރާހިމް ނަސީމް އަދި ދ. މީދޫ ދާއިރާގެ މެމްބަރު ސަން ސިޔާމް އެވެ.
މަޖިލީހުގެ ރައީސްކަމުން ނަޝީދު ވަކިކުރަން ހުށަހެޅީ މަޖިލީހުގެ ރައީސްކަމުގައި ނަޝީދު އިންނަވައިގެން އިތުރަށް މަޖިލީހުން ކުރަންޖެހޭ މަސައްކަތްތައް ކުރިއަށް ނުގެންދެވޭނެ މިންވަރަށް ކަންކަން ގޯސްވެފާވާ ކަމަށް ބުނަމުންނެވެ.
އެގޮތުން މަޖިލީހުގެ ދާއިމީ ކޮމިޓީތައް އެކުލަވައިނުލެވި ގިނަދުވަސްތަކެއް ވެއްޖެކަމުގެ ޝަކުވާތަކެވެ. ނަމަވެސް ނަޝީދު ވިދާޅުވަނީ އެމަސައްކަތްތައްނުކުރެވި އޮތީ ސިޔާސީ ޕާޓީތަކަށް އެކަމުގައި އެއްބަސް ނުވެވިގެން ކަމަށެވެ.
ނަމަވެސް އެމްޑީޕީގެ ޕާލަމެންޓަރީ ގުރޫޕްގެ ބޮޑުން އެމް.ޕީ އަސްލަމްކަހަލަ ބޭފުޅުން ތުޙުމަތު ކުރާ ގޮތުގައި ކޮމިޓީތައް އެކުލަވާލުން ލަސްކުރަމުންދަނީ މަޖިލީހަށް ހުށަހަޅާފައިވާ މަޖިލީހުގެ ނައިބު ރައީސް އީވާ ގެ އިތުބާރު ނެތްކަމުގެ މައްސަލަ އަށް ނަޝީދު ހުރަސް އެޅުއްވުމުގެ ގޮތުންނެވެ.
މިދެބޭފުޅުންގެ އިތުބާރުނެތްކަމުގެ މައްސަލަ އެކުއެކީގައި އެމްޑީޕީ އިން ވެއްދުމަކީ މަޖިލިސް ހުށްޓުމަކަށް އައި ސަބަބުކަމުގައި އީވާ ވަނީ ވިދާޅުވެފައެވެ. މިކަމުގައި ގާނޫނު ބުނަނީ ކީކޭ؟
“ މަޖިލީހުގެ ރައީސްގެ މަގާމުކން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހަށްޓާނީ މަޖިލީހުގެ ނައިބު ރައީސްއެވެ. މިގަވާޢިދުގެ 206 ވަނަ މާއްދާގެ ދަށުން މަޖިލީހުގެ ނައިބު ރައީސްގެ މަގާމުން ވަކިކުރުމުގެ ގަރާރެއް މަޖިލީހަށް ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާއެއްގެ ރިޔާސަތު ބަލަހަށްޓާނީ މަޖިލީހުގެ ރައީސްއެވެ.“
ގިނަބަޔަކު ދެކޭގޮތުގައި މަޖިލިސް ހުށްޓިފާމިވަނީ ބަޔަކު ގަސްދުގައި މި މާއްދާ ދެނެތިބެ އެގޮތަށް ޢަމަލުކުރުމުން މަޖިލީސް ހުށްޓުމަކަށް އަންނެކަން އެނގޭތީ މަޖިލިސް ހުށްޓުވާލުމަށެވެ. ދެން މި މައްސަލަ ޙައްލުކުރެވޭނެ ގޮތެއްކަމަށް ބައެއް ފުންނާބުއުސް ވަކީލުން ލަފާދެއްވަނީ ސްޕްރީމްކޯޓުގެ ލަފަޔަކަށް މަޖިލީހުން އެދި ގޮތެއް ނިންމުމެވެ.
One Response
ދެކެ ދެނެތިބެ ދަންނާށެވެ!! ކުރިޔަށް ދާށެވެ!!
ރައްޔިތުންގެ މަޖިލިސް ކުރިޔަށް ގެންދިއުމަކީ އަމީނުލްއާމްގެ ޒިންމާއެކެވެ. އިހްމާލުނުވެ ޖަލްސާތައް ގަވައިދުން ކުރިޔަށް ގެންދާށެވެ!!
މަޖްލިސް އިދާރީ އޮނގަނޑު ތެރެއިން ގާނޫނީހައްލެއް ނުހޯދޭ ނަމަ، ސުޕްރީމްކޯޓުގެ ކުއްލި ލަފައެއް ހޯދައިގެން ނަމަވެސް ޖަލްސާތައް ކުރިޔަށް ގެންދާށެވެ. ބަޔަކުބޭނުން ވީމާ މަޖިލިސް ހުއްޓުވިގެން ނުވާނެއެވެ!!
ރައްޔިތުން މަޖިލިސް ގައި އަމީނުލްއާންމެއް ބެހެއްޓުމަށް ހަމަޖެއްސީ ކަންކަން ކަރުދާސްކޮށް ލަސްކުރާކަށް ނޫނެވެ. ކަންކަން އަވަސްކޮރުމާ އެކު މަޖިސްގެ ޖަލްސާތައް ކުރިޔަށް ގެންދާށެވެ!!
އޭ! އަމީނުލްއާންމެވެ! މަސްއޫލިއްޔަތު އުފުއްލަވާށެވެ. އަނބުރާ މަޖްލިސް ރައީސަށް ސިޓިލިޔެ ސަލާން ޖަހާކަށް ނުޖެހެއެވެ. އަވަސްލަފާ ހޯއްދަވައިގެން ކުރިޔަށްދާށެވެ! ދައުލަތް ހުއްޓުމުކަށް ނުގެންދާށެވެ!!
ދިވެހިރާއްޖެ….ދިރިދެމިއޮންނާނެ!!
🇲🇻⚔️🇲🇻