ދުނިޔޭގައި މިހާތަނަށް ހިންގި އެންމެ ބޮޑު ވެކްސިނޭޝަން ކެމްޕޭނުގައި، ކޮރޯނާ ވައިރަހުން ރައްކާތެރިވުމަށް ތައްޔާރުކުރި ވެކްސިން ޖެހުމުގެ ސަބަބުން ހަށިގަނޑަށް ނޭދެވޭ އަސަރުކުރި ފަރާތްތަކުން ޖަރުމަނުގެ ކޯޓުތަކަށް ހުށައެޅި މައްސަލަތައް ހޯމަ ދުވަހުންފެށިގެން ކޯޓުތަކުގައި ހިނގަންފަށާނެއެވެ.
2020 ވަނަ އަހަރުގެ ކުރީކޮޅު ހަލުވިކަމާއެކު ފެތުރުނު އާލަމީ ވަބާގައި، ދުނިޔޭގެ ބޯޑަރުތައް ބަންދުވެ، ފުރަބަންދުތައް އިއުލާނުކުރުމާއެކު އެތައް މިލިއަން މީހުން އެމީހުންގެ ގޭގޭގައި މަޑުކޮށްގެން ތިބެން ޖެހުނެވެ. އަދި ކޯވިޑުން ދިފާއުވުމަށް އުފެއްދި ވެކްސިންތައް ވެގެންދިޔައީ ފުރާނަ ސަލާމަތްކުރުމަށް ލިބުނު އައު ބާރަކަށެވެ.
މީގެކުރިން އަލަށްވެސް އެހެން ވެކްސިނެއް ބޭނުންކުރުމަށް ހުއްދަ ނުލިބޭހައި އަވަހަށް ކޯވިޑް-19 އަށް ވެކްސިން އުފައްދާ، ހުއްދަލިބި ބޭނުންކުރަން ފެށި ވެކްސިންގެ އެތައް މައްސަލައެއް، ފްރާންސާއި، އިނގިރޭސިވިލާތް ހިމެނޭގޮތަށް ދުނިޔޭގެ ގިނަ ގައުމުތަކެއްގެ ކޯޓުތަކުގައި މިހާރު އަންނަނީ ބަލަމުންނެވެ. މައްސަލަ ހުށަހެޅި ފަރާތްތަކުން ބުނެފައިވާގޮތުގައި ވެކްސިނުން ސިއްހީ ގިނަ މައްސަލަތަކެއް ކުރިމަތި ކުރުވާފައިވާ ކަމަށެވެ.
ޖަރުމަނުގެ ވެކްސިން އުފައްދާ ބަޔޯއެންޓެކްއާއި އެމެރިކާގެ ފައިޒާ ގުޅިގެން އުފެއްދި ފުރަތަމަ އެމްއާރްއެންއޭ ވެކްސިން ކަމުގައިވާ ކޯމިރްނަޓީގެ މައްސަލާގައި، ބަޔޯއެންޓެކްއާއި ދެކޮޅަށް ހިންގާ މިފަދަ ފުރަތަމަ މައްސަލަ ބެލުމަށް ހަމަޖެހިފައިވަނީ ޖަރުމަނުގެ ހެމްބާގުގައި ހުންނަ ކޯޓަކުންނެވެ.
މި މައްސަލާގައި ދައުވާކުރާ ފަރާތުން ބުނެފައިވަނީ ވެކްސިން ޖެހުމަށްފަހު މަތީ ހަށިގަނޑުގެ ރިއްސުމާއި، ގުނަވަންތައް ދުޅަވުމާއެކު، ވަރުބަލިކަމާއި، ނިދުމުގެ މައްސަލަތަކާއި ކުރިމަތިލާން ޖެހުނުކަމަށެވެ. އަދި އޭނާވަނީ ”މެޓީރިއަލް ޑެމޭޖަސް“ ގެ ގޮތުގައި 150،000 ޔޫރޯ ނުވަތަ 162،000 އެމެރިކާ ޑޮލަރުގެ ބަދަލެއް ހޯދުމަށް ކޯޓުގައި އެދިފައެވެ.
