ހަޔާތުގެ ގިނަދުވަސްތައް ޗައިނާގެ ބެއިޖިންގައި މަސައްކަތްކުރުމުގައި ހޭދަކުރުމަށްފަހު، އުމުރުން 70 އަހަރުގެ ޕޯލް މޯސްލީ ހުރީ އޭނާގެ އަންހެނުންނާއެކު ”އިނގިރޭސިވިލާތުގެ ފެހި އަރާމު ފަސްގަނޑަށް“ އެނބުރި ދިޔުމަށް ކެތްމަދުވެފައެވެ. އެހެންނަމަވެސް އޭނާގެ ގައުމަށް ދިޔުމުގައި އެންމެ ބޮޑު ހުރަހަކީ ވާރުތަ މުދަލުން ދައްކަންޖެހޭ ޓެކްސްގެ ކަންބޮޑުވުމެވެ.
މޯސްލީ ބުނީ އޭނާގެ އިންވެސްޓްމަންޓްތަކުންނާއި ޕެންޝަނުން ލިބޭ އާމްދަނީއިން ނަގާ ޓެކްސްއަކީ ދައްކަންޖެހޭ އެއްޗެއްކަމަށް ގަބޫލުކޮށް އެއިން ސަރުކާރަށް އަދާކުރަންޖެހޭ މިންވަރު ދެއްކުމާއިމެދު އެއްވެސް ޝަކުވާއެއް ނެތްކަމަށާއި، އެހެންނަމަވެސް، އޭނާގެ އަންހެނުން މަރުވުމަށްފަހު އޭނާގެ ވާރުތަ މުދަލުން 40 އިންސައްތަ ސަރުކާރަށް ހިލޭ ހަދިޔާއެއްގެ ގޮތުގައި އިސްރާފުކުރުމަށް ދިނުމަކީ އޭނާ އެއްގޮތަކަށްވެސް ކުރަން ބޭނުންވާ ކަމެއް ނޫންކަމަށެވެ.
މޯސްލީއަކީ އެސެކްސްއަށް ނިސްބަތްވާ މީހެކެވެ. އޭނާ ޗައިނާއަށް ގޮސްފައިވަނީ 1970 ގެ އަހަރެއްގައި އިންޖިނިއަރިންގް ކިޔަވަމުންދިޔަ ޕީއެޗްޑީ ދަރިވަރެއްގެ ހައިސިއްޔަތުންނެވެ. އަދި އޭރު އެހެން ގައުމުތަކަށް ދިރިއުޅުން ބަދަލުކުރާ ގިނަ މީހުން ފަދައިން ވަޒީފާދިން ފަރާތުން އޭނާ އެގައުމުގައި ދިރިއުޅުމުގެ ހަރަދުތައް ބަލަހައްޓާ ދޭތީ ޗައިނާގައި މަޑުކުރީއެވެ.
ވަޒީފާގެ ކުރިއެރުންތައް ފުލުފުލުން ލިބެމުންދިޔަ ކަމަށާއި، އެހެންކަމުން ޗައިނާގައި ވަޒަންވެރިވީ ކަމަށް މޯސްލީ ކިޔައިދިނެވެ. އަދި 2003 ވަނަ އަހަރުގެ ނިޔަލަށް ބެއިޖިންގެ އިއާދަ ކުރަނިވި މައިނިންގް ކުންފުންޏެއްގެ ޖެނެރަލް މެނޭޖަރުގެ މަގާމު އަދާކުރަމުން ގެންދިޔަކަމަށް އޭނާ ބުންޏެވެ.
1980 ގެ އަހަރެއްގައި، ޝިއާމޯ ނަމަކަށް ކިޔާ ޗައިނާގެ އަންހެނަކާ ކައިވެނިކޮށް، ދެމަފިރިންގެ މާދަރީ ބަހުން ވާހަކަ ދައްކާ އާއިލާއެއް މޯސްލީ ބިނާކުރިއެވެ. އަދި ކެޕިޓަލް ގެއިންސްގެ ގޮތުގައި ނަގާ ޓެކްސްގެ ބިރެއްނެތި ލިބުނު އާމްދަނީ އެކި ކަންކަމަށް އިންވެސްޓްކޮށްފައިވާނެ ކަމަށް މޯސްލީ ބުންޏެވެ.
މަރުވުމަށްފަހު އޭނާގެ މުދަލުގެ 40 އިންސައްތަ ސަރުކާރުން ނަގާނެކަން ޔަގީންވާތީ، އަދިވެސް ޔޫކޭގެ ރައްޔިތެއްގެ ގޮތުގައި އޮތް މޯސްލީ މިހާރުވަނީ އޭނާގެ މުދާ އޭނާގެ އަންހެނުންގެ ނަން މައްޗަށް ބަދަލުކޮށްފައެވެ. އޭނާގެ އަންހެނުންގެ އުމުރުން މިހާރު 63 އަހަރެވެ.
ޝިއާމޯ މޯސްލީވަނީ އޭނާގެ ފައިސާ އިނގިރޭސިވިލާތާއި ގުޅުމެއް ނެތް ބޭރު ވިޔަފާރިތަކުގައި އިންވެސްޓްކޮށްފައެވެ.
