ދިވެހިރާއްޖެއާއި ރިޕަބްލިކް އޮފް ސީޝެލްސްއާ ދެމެދު ހަތަރު އެއްބަސްވުމެއްގައި މިއަދު ސޮއިކުރައްވައިފިއެވެ.

މި އެއްބަސްވުންތަކުގައި ސޮއިކުރެއްވީ ރައީސް އޮފީހުގައި މިއަދު ބޭއްވި ރަސްމިއްޔާތެއްގައެވެ.

މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ސީޝެލްސްގެ ރައީސް ވޭވަލް ރާމްކަލާވަން ވެސް ބައިވެރިވެވަޑައިގެންނެވިއެވެ.

މިއަދު ސޮއިކުރެވުނު އެއްބަސްވުންތައް:

އެގްރީމެންޓް ބިޓްވީން ދަ ގަވަރންމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރންމަންޓް އޮފް ދަ ރިޕަބްލިކް އޮފް ސީޝެލްސް އޮން ޝޯޓް ސްޓޭ ވިސާ ވެއިވަރ

އެގްރީމެންޓް ބިޓްވީން ދަ ގަވަރންމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރންމަންޓް އޮފް ދަ ރިޕަބްލިކް އޮފް ސީޝެލްސް ކޮންސަރނިންގ އެއަރ ސަރވިސަސް

ޕްރޮޓޮކޯލް ބިޓްވީން ދަ ގަވަރންމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރންމަންޓް އޮފް ދަ ރިޕަބްލިކް އޮފް ސީޝެލްސް އޮންދަ ކޯޕަރޭޝަން ޓު ކޮމްބެޓް ޓްރާންސިޝަނަލް އޯގަނައިޒްޑް ކްރައިމް އެންޑް އަދަރ މެރިޓައިމް ސެކިއުރިޓީ އެންޑް ސޭފްޓީ ތްރެޓްސް

މެމޮރަންޑަމް އޮފް އަންޑަރސްޓޭންޑިންގ ފޮރ ޔޫތު ޑިވެލޮޕްމަންޓް ކޯޕަރޭޝަން ބިޓްވީން ދަ މިނިސްޓްރީ އޮފް ޔޫތު، ސްޕޯޓްސް އެންޑް ފެމިލީ އޮފް ދަ ގަވަރންމަންޓް އޮފް ދަ ރިޕަބްލިކް އޮފް ސީޝެލްސް އެންޑް ދަ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އޮފް ދަ އޮފް ގަވަރންމަންޓް އޮފް ދަ ރިޕަބްލިކް އޮފް މޯލްޑިވްސް

ފޮރިން މިނިސްޓަރު ޝާހިދު ވިދާޅުވީ ވިސާ ވެއިވަރ އެއްބަސްވުމުގެ ދަށުން ވިސާ ނެގުމާ ނުލައި ދިވެހިންނަށް 30 ދުވަހުގެ މުއްދަތަކަށް ސީޝެލްސްއަށް ދަތުރުކުރެވޭނެ ކަމަށެވެ. އަދި މިކަމުގެ ސަބަބުން ދެ ގައުމުގެ ރައްޔިތުންގެ ދެމެދުގައި ގުޅުން ބަދަހިވެ ސީޝެލްސްއާއި ދިވެހިރާއްޖެއާ ދެމެދު އޮންނަ ގާތް ރަހުމަތްތެރިކަމުގެ ގުޅުމާއި ވިޔަފާރިއާއި އިގުތިސާދީ ގުޅުން އިތުރަށް ތަރައްގީކުރުމަށް މަގުފަހިވާނެ ކަމަށެވެ.

މީގެއިތުރުން އެއަރ ސަރވިސަސް އެއްބަސްވުމުގެ ދަށުން ދެ ގައުމުގެ ދެމެދުގައި ވައިގެ މަގުން ސީދާ ދަތުރުތައް ފެށިގެންދާނެ ކަމަށާއި މިކަމުގެ ސަބަބުން ދެ ގައުމުގެ ރައްޔިތުންގެ މެދުގައި ގުޅުން ބަދަހިވެ ވިޔަފާރިއާއި ފަތުރުވެރިކަމުގެ ދާއިރާއަށްވެސް މިކަމުގެ މަންފާކުރާނެ ކަމަށް ޝާހިދު ވިދާޅުވިއެވެ.

ޓްރާންސްނޭޝަނަލް އޯގަނައިޒްޑް ކްރައިމް ހުއްޓުވުމާއި ކަނޑުމަގުން ކުރިމަތިވާ އެހެނިހެން ނުރައްކާތަކާ ގުޅޭގޮތުން ދިވެހި ސަރުކާރާއި ސޭޝެލްސް ސަރުކާރާ ދެމެދު އެކުލަވާލާފައިވާ ޕްރޮޓޮކޯލްއާ ގުޅިގެން ޝާހިދު ވިދާޅުވީީ މިއީ ސަރަހައްދީ ސަލާމަތާއި ރައްކާތެރިކަން ކަށަވަރުކުރުމަށްޓަކައި ގުޅިގެން ކުރެވޭ މަސައްކަތްތައް އިތުރުކުރުމަށް އެޅުނު މުހިންމު ފިޔަވަޅެއް ކަމަށެވެ.

“އަޅުގަނޑުމެން އެންމެންގެ އެއްބާރުލުމާއެކު ކަނޑުގެ މަސްލަހަތުތައް ހިމާޔަތްކުރަން މަސައްކަތް ކުރުމަކީ މުހިއްމު ކަމެއް.“ 

ޝާހިދު އިތުރަށް ވިދާޅުވީ ޒުވާނުން ބިނާކުރުމުގެ ދާއިރާއިން މިއަދު ސޮއިކުރެވުނު ފަހުމުނާމާގެދަށުން ޒުވާނުންގެ ތަރައްގީއަށާއި ހުނަރުވެރިކަން އިތުރުކުރުމަށް ދެ ގައުމުން ގުޅިގެން ދިގު މުއްދަތަކަށް މަސައްކަތްތަކެއް ކުރެވިގެންދާނެ ކަމަށެވެ.