މާލޭގެ އެންމެ ބޮޑު ހޮސްޕިޓަލް ކަމަށްވާ އައިޖީއެމްއެޗަށް ގިނަ އަދަދެއްގެ ނަރުހުން ހޯދަން ޢިއުލާންކޮށްފި އެވެ.
ޢިއުލާން ބުނާގޮތުން އެ ހޮސްޕިޓަލަށް ބޭނުންވަނީ 29 ރެޖިސްޓަރޑް ނަރުހުންނެވެ. އެ މަގާމުތަކަށް ޝައުގުވެރިވާ ނަރުހުން ވަޒީފާއަށް އެޕްލައި ކުރުމުގެ ފުރުސަތު މި މަހުގެ 15 އާ ހަމައަށް ވަނީ ހުޅުވާލެވިފައެވެ. އިންދިރާގާންދީ މެމޯރިއަލް ހޮސްޕިޓަލް (އައި.ޖީ.އެމް.އެޗް) އިން ބުނެފާވަނީ ވަޒީފާއަށް ކުރިމަތިލާ ފަރާތްތަކުން އިންޓަވިއު ކުރުން މި މަހުގެ 18 އިން އަންނަ މަހުގެ 15 އާ ދޭތެރޭ އޮންނާނޭ ކަމަށެވެ.
ރަޖިސްޓާޑް ނަރުހުންގެ އަސާސީ މުސާރައަކީ މަހަކު 11428ރުފިޔާއެވެ. މަގާމުގެ އެލަވަންސްގެ ގޮތުގައި މަހަކު 5،333 ރުފިޔާ އާއި އަދި ޙާޒިރީ އިނާޔަތުގެ ގޮތުގައި މަސައްކަތަށް ޙާޒިރުވާ ދުވަހަކަށް 144 ރުފިޔާ ލިބޭނެއެވެ.
މީގެ އިތުރުން ސިވިލް ސާވިސްގެ މުވައްޒަފުންނަށް ހަމަޖެހިފައިވާ އުސޫލުން އިތުރު ގަޑީގެ ފައިސާ އާއި ބަންދު ދުވަހުގެ ފައިސާ ވެސް ލިބޭނޭކަމަށެވެ.
