ގދ.ތިނަދޫ ބަނދަރުގައި އޮތް ތެޔޮ ބޯޓެއްގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފްއިން ބުނީ ގދ.ތިނަދޫ ބަނދަރުގައި އޮތް ބޯޓެއްގައި އަލިފާން ރޯވެފައިވާކަމުގެ ރިޕޯޓު ލިބުނީ މިއަދު 11:30 ހާއިރު ކަމަށާއި މިހާރު އަލިފާން ނިއްވާލައިފައިވާ ކަމަށެވެ.
“ގދ.ތިނަދޫ ބަނދަރުގައި އޮތް ބޯޓެއްގައި އަލިފާން ރޯވެގެން އެމްއެންޑީއެފް ސަދަން އޭރިއާ ކޮމާންޑް ތިނަދޫ ފަޔަރ ސްޓޭޝަނުގެ ފަޔަރމަނުން ހަރަކާތްތެރިވެ ނިއްވާލައިފި. މި ހާދިސާގެ ރިޕޯޓް ލިބިފައިވަނީ މިއަދު 11:30 ހާއިރު“ އެމްއެންޑީއެފްއިން ކުރި ޓުވީޓެއްގައިވެއެވެ.
ނަމަވެސް މި ހާދިސާއާގުޅޭ އިތުރު މައުލޫމާތެއް ހިއްސާއެއް ނުކުރެއެވެ.
ބައެއް ރިޕޯޓުތައް ބުނާ ގޮތުން އަލިފާން ރޯވީ ޓޭންކަން ތެޔޮ އަޅަން ބޭނުންކުރި ހޮޅީގައެވެ.
މި ހާދިސާ ހިނގުމާ ގުޅިގެން އެ ސަރަހައްދުގައި ހަރަކާތްތެރިވި މީހަކަށް އަނިޔާވެ ޑރ.ޢަބްދުއްޞަމަދު މެމޯރިއަލް ހޮސްޕިޓަލުގައި ދަނީ ފަރުވާދެމުންނެވެ. އޭނާގެ ހާލު ސީރިއަސް ނޫންކަމަށް ހޮސްޕިޓަލުން މައުލޫމާތު ދެއެވެ.
