ފިޝަރީޒް މިނިސްޓަރ ޑރ.ޙުސައިން ރަޝީދު ޙަސަން ރައްޔިތުންގެ މަޖިލީހުގެ މަސައްކަތަށް ހުރަސް އަޅުއްވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މިއަދު ނުރުހުން ފާޅުކުރައްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ނުރުހުން ފާޅުކުރައްވައި ނަޝީދު ވާހަކަފުޅު ދެއްކެވީ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކުރެއްވި ތިން ސުވާލަށް މިނިސްޓަރު ލިޔުމުން ދެއްވި ޖަވާބާ ގުޅިގެންނެވެ.

ބޮންޑޭގެ ފުރަތަމަ ސުވާލު: މިފްކޯއިން ތައިލެންޑަށް ވިއްކާ ަގަނޑުކުރި ކަޅުބިލަމަހާއި ކުދި ކަންނެލި މަހުގެ ރިޖެކްޓް ލެވެލް ފާއިތުވި ތިން އަހަރު މފްކޯ އިންވޮއިސްތަކުން ޑިސްކައުންޓް ކުރެވިފައިވާނަމަ ނުވަތަ ހިލޭ ދޫކޮށްލެވިފައިވާނަމަ އެ ފައިސާގެ ޖުމްލަ އަަދަދަކީ ކޮބައިތޯ؟ މިގޮތުން، 2016، 2017 އަދި 2018 ގައި ހުރި މިންވަރުގެ ތަފުސީލަކީ ކޮބައިތޯ؟  

ލިޔުމުން ފޮނުއްވި ޖަވާބުގައި މިނިސްޓަރު ވިދާޅުވެފައިވަނީ މެމްބަރު އެދިވަޑައިގެންފައިވާ މައުލޫމާތަކީ އެ މިނިސްޓްރީން އެއްކޮށް ބަލަހައްޓަމުންދާ މައުލޫމާތެއް ނޫން ކަމަށާއި އެ މައުލޫމާތަކީ މިފްކޯގެ ފަރާތުން ބަލަހައްޓާނެ ކަމަށް ބެލެވޭ, އެ ކުންފުނީގެ ވިޔަފާރިއާބެހޭ މައުލޫމާތު ކަމަށެވެ. އަދި މިފްކޯއަކީ އެ މިނިސްޓްރީގެ ބެލުމުގެ ދަށުގައިވާ ކުންފުންޏެއް ނޫން ކަމަށް ވެސް މިނިސްޓަރުގެ ވިދާޅުވެފައިވެއެވެ.

“ވަޒީރު ވިދާޅުވެފައިވަނީ، އެ ބޭފުޅާޔާ ބެހޭ ކަމެއް ނޫން ކަމަށް. ދެން އަޅުގނޑު މިހާރު ބަލަމުން މި ދަނީ އެ ބޭފުޅާޔާ މި މަޖިލީހުން ހަވާލުކޮށްފައި އޮތީ ކޮން މަސައްކަތެއްތޯ. އެ ބޭފުޅާޔާބެހޭ ކަންތަކާ ނުބެހޭ ކަންތައް ކަނޑައަޅުއްވާނީ އެބޭފުޅާއެއް ނޫން. ވަޒީރު އަމިއްލަފުޅަށް ކުރައްވާ ކަމެއް ނޫން އެއީ. އެއީ މި ތަނން ކޮންމެ ވުޒާރާއަކަށް އޮންނާނެ، ވާނެ އެ ވުޒާރާގެ މަސައްކަތް ހަވާލު ކުރެވިފަ.“ މިނިސްޓަރުގެ ޖަވާބާ ގުޅިގެން ނުރުހުން ފާޅުކުރައްވައި ނަޝީދު ވިދާޅުވިއެވެ.

ނަޝީދު ވިދާޅުވީ ތަފާސްހިސާބު ބެެލެހެއްޓުން އެ މަސައްކަތްތަކުގެ ތެރޭަގައި ހިމެނޭ ކަމަށް ވާނަމަ ވަޒީރަށް އެ ހުންނެވެނީ “ނުބައި މަަގެއްގައި“ ކަމަށެވެ. 

ބޮންޑޭގެ ދެވަނަ ސުވާލު: ފާއިތުވި ތިން އަހަރު މިފްކޯއިން ތައިލެެންޑަށް ވިއްކާފައިވާ ގަނޑުކުރި ކަޅުބިލަމަހާއި ކުދި ކަންނެލި މަހުގެ ރިޖެކްޝަން ލެވެލަކީ ނުވަތަ ޝިޕްމަންޓުތަކުގެ އިންސަންތައަކީ ކިހާވަރެއްތޯ؟ 

މި ސުވާލަށް ވެސް މިނިސްޓަރު ދެއްވީ ކުރިން ދެއްވި ޖަވާބެވެ.

ނަޝީދު ވިދާޅުވީ ރިޖެކްޓް މަސް އެއީ ކޮރަޕްޝަނަށް މަގުފަހިވާ ގޮތަށް ހިންގޭ އަމަލެއްގެ ގޮތުގައި މީގެ ކުރީގައި ރާއްޖޭގެ މަސް އެކްްސްޕޯޓްކުރުމުގެ މައްސަލަތައް މަޖިލީހުން ބެލިބެލުމުގައި ވަރަށް ސާފުކޮށް ފާހަަގަވެފައިވާ ކަމަށެވެ. ފިޝަރީޒް ޕްރޮޖެކްޓް އިމްޕްލިމެންޓޭޝަން ޑިިވިޒަންގެ މައްސަލަތަކުން ފެށިގެން މަސް އެކްސްޕޯޓް ކުރުމުގައި ރިޖެކްޓް ކުރީ ކަމަށް ބުނެ ނާޖާއިޒު ފައިދާ، ކޮރަޕްޝަންގެ އަމަލު ހިންގާފައި ވަރަށް ގިނައިން ހުންނަ ކަމަށް ވެސް ނަޝީދު ވިދާޅުވިއެވެ.

“އަޅުގަނޑަށް ފެންނަ ފެނުމުގައި މި ބާވަތުގެ މައުލޫމާތު ރިޖެކްޓްވާ މިންވަރުގެ މައުލޫމާތަކީ ކޮންމެހެން ވެސް ބަލަހައްޓަންޖެހޭނެ މައުލޫމާތެއް. ދެން އެ މައުލޫމާތު ތަފާސްހިސާބުތަކުގައި ނުބެލެހެއްޓި ވާ ކަމަށް ވަނީވިއްޔާ ގާނޫނާ ޚިލާފު ކަމެއް ހިނގަމުން އެ ދަނީ.“ ނަޝީދު ވިދާޅުވިއެވެ.

ބޮންޑޭގެ ތިންވަނަ ސުވާލު: ތައިލެންޑް ބަނދަރާ ހިސާބުން ނުވަތަ ގަންނަ ފަރާތުގެ ކޯލްޑް ސްޓޯރޭޖާ ހިސާބުން ރިޖެކްޓްވާ ަގަނޑުކުރި ކަޅުބިލަމަހާއި ކުދި ކަންނެލި މަހަށް ހައްދަވަނީ ކިހިނެއްތޯ؟ 

ކުރިން ދެ ސުވާލަށް ދެއްވި ޖަވާބު ދެއްވުމުން ނުރުހުން ފާޅުކުރައްވަމުން ނަޝީދު ވިދާޅުވީ ރިޖެކްޓް މަހުގެ ތަފާސްހިސާބު ބެލެހެއްޓުމަކީ ކަނޑައެޅިގެން އެ މިނިސްޓްރީން ކުރަންޖެހޭ ކަމެއް ކަމަށާއި އެއީ ހަމައެކަނި ވިޔަފާރީގެ މައުލޫމާތެއް ނޫން ކަމަށެވެ. 

“ރިޖެކްޓްމަހާގުޅޭ ގޮތުންނާއި އަދި ރާއްޖޭން ބޭރު ކުރާ މަހާއި، އެ މަހުގެ އެންމެހައި ތަފާސްހިސާބުތައް އެއްކޮށް ބެލެހެއްޓުމަކީ އިލްމީ ގޮތުން ވެސް، އަދ ދިރާސީ ހުރިހާ މަަގަކުން ބަލާއިރުގައި  ވެސް މިނިސްޓްރީން ބަލަހައްޓަންޖެހޭ މައުލޫމާތު.“

ނަޝީދު ވިދާޅުވީ “މިނިސްޓަރު އެ ގެންދަވަނީ މަޖިލީހުގެ މަސައްކަތަށް ހުރަސް އަޅުއްވަމުން“ ކަމަށެވެ.