ނަމާދުގައި ޚުޝޫޢަތްތެރިވާން އެދޭ ކޮންމެ މީހަކުވެސް މިލިޔުން ކިޔައިލާށެވެ.އަދި އެކުވެރިންނާވެސް ހިއްޞާ ކޮށްލާށެވެ.
ވަރަށް ރަނގަޅަށް މިކަމާއިމެދު ވިސްނުން ވަރަށް ބޭނުންތެރިއެވެ. ހަނދާން ކުރަންވީ ތިބާ ހުއްޓިހުރީ ﷲ ތަޢާލާގެ ކުރިފުޅުމަތީގައެވެ. ﷲ ތަޢާލާ ތިބާއަށް ބައްލަވައިވޮޑިގެން ވެއެވެ. ނަމަވެސް ތިބާގެ ކިބައިގައި އެކަމާއިމެދު އެއްވެސް ސަމާލުކަމެއް ނެތެވެ. ތިބާގެ ވިސްނުމުގައި ﷲ ތައާލާއެއް ނެތެވެ. ސިކުނޑީގައި ދައުރުކުރަމުން ގެންދަނީ މުޅިން ތަފާތު ފިކުރުތަކެކެވެ. ދުނިޔެއިން ތިބާ އެދޭ ކަންތައްތަކެކެވެ. ހެޔޮވާނެ ހެއްޔެވެ!
ނިކަން ބުނެބަލާށެވެ! އެ ޙާލަތުގައި ތިބާގެ ދަރަޖައަކީ ކޮބައިހެއްޔެވެ؟ ތިބާގެ ހިތުގައި ﷲ ތަޢާލާއަށް ދެވިފައިވަނީ ކޮން ދަރަޖައެއްހެއްޔެވެ؟ ﷲ ތަޢާލާއަށް ލޯބިކުރެވޭ ހެއްޔެވެ؟ ސިކުނޑިއަށް ތިއަ ގެންނަ ކަންކަންވެސް ޙާޞިލުކުރެވޭނީ ﷲ ތަޢާލާ މިންވަރު ކުރެއްވެވުމުންކަން އެނގޭ ހެއްޔެވެ؟
މީސްތަކުންނޭވެ! ތިބާ ނަމާދުކުރަން ޤިބުލައަށް ކުރިމަތިލައި ހުއްޓޭ ވަގުތުން ފެށިގެން ތިބާއަށް އެހުރެވެނީ ﷲ ތަޢާލާގެ ކުރިފުޅުމަތީގައެވެ. ތިބާއަށް ﷲ ތަޢާލާ ބައްލަވައި އަދި އަޑުއައްސަވާ ވޮޑިގެންވެއެވެ. ނަމަވެސް ތިބާގެ ސަމާލުކަން ﷲ ތަޢާލާއަށް ނުދެވޭނަމަ ތިބާއަކީ ﷲ ތަޢާލާ ދެކެ ލޯބިވާ ކިޔަމަންތެރިއަކު ކަމުގައިވާނެ ހެއްޔެވެ؟ ވިސްނަވާށެވެ. އަމިއްލަ ނަފްސާއި ސުވާލުކޮށްލައްވާށެވެ.
މީސްތަކުންނޭވެ! ނަމާދާއިމެދު މިމޭރުމުން ވިސްނާށެވެ. ނަމާދުކުރާ ވަގުތުކޮޅު ﷲ ތަޢާލާއަށް ސަމާލުކަން އިތުރުކުރާށެވެ. ޚުޝޫޢަތްތެރިވާން ގަދައަޅައި މަސައްކަތްކުރާށެވެ.
އާނއެކެވެ! ޚުޝޫޢަތްތެރި ވެވޭނީ ﷲ ތަޢާލާ އެކަން މިންވަރު ކުރެއްވެވުމުންނެވެ. ﷲ ތަޢާލާ އެކަން މިންވަރު ކުރައްވަވާނީ އެކަމަށް ތިބާ އެކަމަށް އެދިގެން މަސައްކަތް ކުރުމުންނެވެ. ވީމާ ވިސްނާށެވެ. ބިރުވެތިވާށެވެ. ﷲ ތަޢާލާގެ ޙަޟްރަތުގައި ތިބާއަށް ހުއްޓި ހުންނަން ޖެހޭނެ އެ ދުވަހަށެވެ. ނަމާދުގައި ޚުޝޫޢަތްތެރި ވުމަށް އެންމެ ބޮޑަށް ބޭނުންވާ އެއްކަމަކީ އެވަގުތާއިމެދު ބިރުވެތިވުމެވެ. މަރަކީ ވަގުރާއި ތަން އެނެގޭ އެއްޗެއްނޫނެވެ. މާދަމާކަމުގައިވެސް ވެދާނެއެވެ.
ދުޢާއަކީ އަހަރެމެން އެންމެންނަކީ ޚުޝޫޢަތްތެރި ކަމާއިއެކު ނަމާދުކުރެވޭ ބައަކު ކަމުގައި ލެއްވެވުމެވެ. އަހަރެމެންކުރާ ނަމާދުތައް ﷲ ތަޢާލާ ޤަބޫލުފުޅު ކުރެއްވެވުމެވެ. ޢާމީން!
– އެންމެންވެސް އާމީން ކިޔާށެވެ! ހެޔޮކަންތަކަށް އެކަކު އެނެކާއަށް ވާގިވެރިވާށެވެ. ހުރިހާ އެކުވެރިންނަށް މި މެސެޖް ހިއްޞާކޮލުމުގެ ސަވާބުވެސް ހޯއްދަވާށެވެ. އެކަމުގެ ސަބަބުން އެންމެ މީހަކު ނަމަވެސް ނަމާދުގައި ޚުޝޫޢަތްތެރިވާން މަސައްކަތްކޮށްފިނަމަ އަދި ނުކުރި ނަމަވެސް ތިބާކުރި މަސައްކަތުގެ ޘަވާބު ތިބާއަށް ދެއްވަވާނެތެވެ! އިން ޝާ ﷲ .
