އެމްއެންޑީއެފަށް 34 އަހަރު ޚިދުމަތް ކުރައްވާފައިވާ މޭޖަރ ޢަލީ ސަލީމް ނިޔާވެއްޖެއެވެ.
އެމްއެންޑީއެފްގެ ފަޔަރ އެންޑް ރެސްކިއު ސަރވިސްގައި އިސްކޮށް މަސައްކަތް ކުރެއްވި މޭޖަރ ޢަލީ ސަލީމް ނިޔާވީ ސިއްހީ ހާލަތު ގޯސްވެގެން މިއަދު އައިޖީއެމްއެޗަށް ގެންގޮސް ފަރުވާދެމުން ދަނިކޮށެވެ.
މޭޖަރ ޢަލީ ސަލީމަކީ ސިފައިންގެ ޔުނިޓެއްގެ ގޮތުގައި 1990ވަނަ އަހަރުގެ މޭމަހުގެ 01 ވަނަ ދުވަހު ”އެންއެސްއެސް ފަޔަރ ސަރވިސް“ އުފެއްދެވިއިރު ތިއްބެވި ފަސް ބޭފުޅުންގެ ތެރެއިން އެއް ބޭފުޅެވެ.
ސަލީމް ނިޔާވިއިރު ވެސް މަސައްކަތް ކުރައްވަމުން ގެންދެވީ
ފަޔަރ އެންޑް ރެސްކިއު ސަރވިސްގައެވެ.
އެމްއެންޑީއެފްގައި ސަލީމާ އެކުގައި ވަރަށް ގިނަދުވަހު ވަރަށް ގާތްކަމާއެކު މަސައްކަތް ކުރެއްވި ބޭފުޅަކު ވިދާޅުވި ގޮތުގައި ސަލީމަކީ ހިތްހެޔޮ ސަމާސާ މިޒާޖެއްގެ ބޭފުޅެކެވެ.
އެމްއެންޑީއެފްގައި މިހާރު ވަރަށް އިސްކޮށް މަސައްކަތް ކުރައްވާ އެހެން ބޭފުޅަކު ވިދާޅުވި ގޮތުގައި ސަލީމަކީ ވަރަށް ހިތްވަރުގަދަ, އަޒުމް ވަރުގަދަ ބޭފުޅެކެވެ. އާލާސްކަންފުޅާ އުޅުއްވި ނަމަވެސް މިއަދު ވެސް އޮފީހަށް ނުކުމެވަޑައިގެންނެވި ކަމަށް އޭނާ ވިދާޅުވިއެވެ.
އޭނާ ވިދާޅުވި ގޮތުގައި ސަލީމަކީ ސިފައިންގެ އަލިފާން ނިއްވުމުގެ ޚިދުމަތުގައި މިވަގުތު ހުންނެވި އެންމެ ދުވަސްވީ ތަޖުރިބާކާރެވެ.
