މޫސުން ގޯސްވާނެކަމަށް ލަފާކޮށް މެދުރާއްޖެތެރޭގެ ބައެއް އަތޮޅުތަކަށް މޯލްޑިވްސް ތ ސަރވިސްއިން ރީނދޫ ސަމާލު ނެރެފިއެވެ.
ރީނދޫ ސަމާލު ނެރެފައިވަނީ ކ.އަތޮޅުން ފެށިގެން މ.އަތޮޅުގެ ސަރަހައްދުތަކަށެވެ. އެއީ ދަންވަރު 01:00 އާ ހަމައަށެވެ.
އެ އިދާރާއިން ބުނީ އެ ސަރަހައްދުތަކަށް ބާރަށް ގުގުރުމާއެކު ވާރޭވެހޭނެ ކަމަށް ލަފާކުރެވޭ ކަމަށެވެ.
އެ އިދާރާއިން ހާމަކޮށްފައިވާ ގޮތުން ދެކުނުގެ އެކި ހިސާބަށް ވެސް ވިއްސާރަ ކުރުމާއެކު ގުގުރާނެއެވެ. އުތުރުގެ އަތޮޅުތަކަށް ކެރީގެ އަސަރު ފޯރި ނަމަވެސް އާންމު ގޮތެއްގައި އެ ސަރަހައްދުގެ މޫސުން ރަނގަޅުވާނެކަމަށް ވަނީ ލަފާކޮށްފައެވެ. އަދި ކަނޑުތައް މަޑުވާނެކަމަށް ވެސް ވަނީ ލަފާކޮށްފައެވެ.
ރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ގަވާއިދު ގޮތުން މޫސުމީ ސަމާލުގެ ތެރެއިން ރީނދޫ ސަމާލާއި އޮރެންޖް ސަމާލާއި ރަތް ސަމާލު ނެރެފައިވާ ސަރަހައްދެއްގައި ނުވަ މީޓަރުން ފެށިގެން ދަށުގެ އުޅަނދުފަހަރުގައި ފަސިންޖަރުން އުފުލުމަކީ މަނާކަމެކެވެ. އެހެންނަމަވެސް ސަރުކާރުގެ އިދާރާއަކުން ހުއްދަ ލިބިގެން ކުރާ އިމަރޖެންސީ ދަތުރުތައް ކުރުމަށް ހުރަހެއް ނެތެވެ.
