މާލެ ސަރަހައްދުގައި މިއަދު ހަކަތަ ބޭނުންކުރި މިންވަރު ރެކޯޑް އަދަދަކަށް މަތިވެފައިވާ ކަމަށް ސްޓެލްކޯއިން ބުނެފިއެވެ.

މިއީ މި އަހަރުގެ ތެރޭގައި ރާއްޖެއަށް އެންމެ ހޫނުގަދަވާނެ ދުވަސްތައްކަމަށް މޫސޫމާބެހޭ ގައުމީ އިދާރާއިން ހާމަކޮށްފައިވާއިރު, މީގެކުރިއާ އަޅާބަލާއިރު މި ދުވަސްވަރު ކަރަންޓު ބޭނުންކުރާ މިންވަރު ވަނީ ވަރަށް ބޮޑަށް އިތުރުވެފައެވެ.

ސްޓެލްކޯއިން މިއަދު ބުނީ މާލެއާއި ހުޅުމާލެ ހިމެނޭހެން މާލެ ސަރަހައްދުގެ އެވްރެޖް ޕަވަރ ޔޫސޭޖް ނުވަތަ އެވްރެޖް އެނާރޖީ ކޮންސަމްޕްޝަން މިވަނީ ރެކޯޑް މިންވަރަކަށް މަތިވެފައިވާ ކަމަށެވެ. އެ ގޮތުން މިއަދު މެންދުރު ޕީކްލޯޑް 102 މެގަވޮޓަށްވުރެ މައްޗަށް އަރާފައިވާކަމަށް އެ ކުންފުނިން ބުންޏެވެ.

“2023 އޭޕްރީލް 24 ވަނަ ދުވަހުގެ މެންދުރު 14:10 ގައި އަޅުގަނޑުމެންގެ ޕީކްލޯޑް 102 މެގަވޮޓަށްވުރެ މައްޗަށް އަރާފައިވާކަން ފާހަގަ ކުރެވޭ. މިއާއެކު، ހުރިހާ ފަރާތްތަކުންވެސް ކަރަންޓު އިގުތިސާދު ކުރުމަށް ޚާއްސަ ސަމާލުކަމެއް ދިނުމަށް އިލްތިމާސް ކުރަން. 

އެގޮތުން އާންމު ގޭބީސީ ތަކާއި، ދައުލަތުގެ އިދާރާތަކާއި، ސަރުކާރުގެ ވުޒާރާތަކާއި، އޮފީސްތަކާއި، ސުކޫލުތަކުގެ އިތުރުން، ބޮޑެތި އަދި ކުދި ވިޔަފާރިތަކުންވެސް ކޮންމެހެން ބޭނުންވާ މިންވަރަށް ކަރަންޓު ބޭނުން ކުރުމަށް ސްޓެލްކޯއިން ވަނީ އިލްތިމާސް ކޮށްފައެވެ.

ދިރާސާތަކުން ދައްކާގޮތުން، އާންމު ގޭބީސީތަކުގެ ކަރަންޓު ބިލްގެ 40 އިންސައްތަ ހިއްސާ ކުރަނީ ފިނިކުރުމަށް ގެންގުޅޭ އެއާރކޮންޑިޝަން ފަދަ އާލާތްތަކުންނެވެ. 

އެހެންކަމުން ހުރިހާ ފަރާތްތަކުންވެސް 25 ޑިގްރީއަށްވުރެ ދަށް ނުވާނެހެން އެއާރކޮންޑިޝަން ބެހެއްޓުމަށާއި ކޮންމެހެން ދިއްލަންޖެހޭ ދިއްލުންތަކާއި ބޭނުން ކުރަންޖެހޭ ކަރަންޓު އާލާތްތައް ފިޔަވައި އިތުރު އާލާތްތައް މި ދުވަސްވަރު ބޭނުން ނުކުރުމަށް ވެސް ސްޓެލްކޯއިން ވަނީ އިލްތިމާސް ކޮށްފައެވެ.

“މީގެ އިތުރުން މިދުވަސްވަރު ޕީކް ހޭންޑްލް ކުރުމަށްޓަކައި، ހުރިހާ ފަރާތްތަކެއްގެވެސް އެއްބާރުލުމާއި، އެހީތެރިކަން މިކުންފުންޏަށް ބޭނުންވާ ކަމުގައި ދަންނަވަން.“ ސްޓެލްކޯއިން ބުންޏެވެ.

މީގެކުރިން މިއަހަރު މާލޭ ސަރަހައްދުގައި އެންމެ ގިނައިން ކަރަންޓު ބޭނުންކުރީ މި މަހުގެ 11 ގައެވެ. އެ ދުވަހު ކަރަންޓު ބޭނުންކުރި މިންވަރު 92.5 މެގަ ވޯޓަށްވުރެ މައްޗަށް ދިޔައެވެ.

ސްޓެލްކޯގައި 120 މެގަ ވޯޓުގެ ކަރަންޓް އުފެއްދުމުގެ ގާބިލުކަން ހުރެއެވެ.