މި އަހަރުގެ ރަމަޟާން މަހު ފިޠުރު ޒަކާތުގެ ގޮތުގައި 09 މިލިއަން ރުފިޔާ ލިބުނު ކަމަށާއި އެ ފައިސާ ފަގީރުންގެ ދަފްތަރުގައިވާ ފަރާތްތަކުގެ އެކައުންޓްތަކަށް ޖަމާކޮށްފައިވާ ކަމަށް މިނިސްޓްރީ އޮފް އިސްލާމިކް އެފެއާޒުން މިއަދު ވިދާޅުވެއްޖެއެވެ.
މިނިސްޓްރީން ވިދާޅުވީ 1444ވަނަ އަހަރުގެ ރަމަޟާން މަހުގެ 29 ވަނަ ދުވަހުގެ ނިޔަލަށް ފިޠުރު ޒަކާތް ދައްކާފައިވަނީ 175485 މީހުން ކަމުގައެވެ.
އެ ގޮތުން ފިޠުރު ޒަކާތުގެ ގޮތުގައި ޖުމްލަ 9,003,324.05 ލިބުނު ކަމަށް މިނިސްޓްރީން ވިދާޅުވިއެވެ.
“ފަގީރުންގެ ލިސްޓްގައި ހިމެނިފައިވާ 8446 މީހުންގެ ތެރެއިން، މާލެ ސިޓީން 1736 މީހުންނަށް، ބޮލަކަށް 3450 ރުފިޔާގެ ރޭޓުން ވަނީ 20 އެޕްރިލް 2023 ގައި އެފަރާތްތަކުގެ އެކައުންޓްތަކަށް ޖަމާކޮށްފައި.“ މިނިސްޓްރީން ވިދާޅުވިއެވެ.
މި ރަމަޟާންމަހުގައި ފިޠުރު ޒަކާތުގެ ގޮތުގައި ގޮވާމުން ލިބިފައިވަނީ ޖުމްލަ 12989.3 ކިލޯގެ ތަކެއްޗެވެ. 20 އެޕްރީލްގެ ނިޔަލަށް އެ ތަކެތި ބަހައި ނިންމާފައިވާކަމަށް މިނިސްޓްރީން ވިދާޅުވިއެވެ.
