ދުނިޔޭގެ ވިޔަފާރީގެ ބާޒާރުގައި އެމެރިކާ ޑޮލަރުގެ ބޭނުން ކުޑަކުރަން އޭޝިޔާގެ ގައުމުތަކުން ކުރަމުން ގެންދާ މަސައްކަތް ފުޅާވެ އެމަސައްކަތގެ ނަތީޖާ އޭޝިޔާގެ އަސްދަނޑިން ނިކުމެ ޔޫރަޕްގެ ގޮނޑުދޮށުގައި ބަނދަރުކޮށްފިއެވެ. 

ދުނިޔޭގެ ބާޒާރުގައި އެމެރިކާ ޑޮލަރަށް ހިޔަނި އެޅެމުންދާ ބާރުގަދަ 6 ކަމެއް ބިޒިނަސް އިންސައިޑަރ ގައި ބުނެފައިވެއެވެ. އޭގެ ތެރޭގައި އެންމެ ފުރަތަމަ ފާހަގަކޮށްފައިވަނީ ގިނަ ގައުމުތަކަކުން އެމެރިކާ ޑޮލަރ އެއްފަރާތް ކުރުމަށްފަހު އެ ގައުމުތަކުގެ ފައިސާއިން ވިޔަފާރިކުރަން ބޭނުން ވެފައި ތިބުމެވެ. 

ދެވަނަކަމަކަށް ފާހަގަކޮށްފައިވަނީ އީރާނާއި ރަޝިޔާއިން ރަނުގެ މައްޗަށްބިނާކޮށް ބައިނަލް އަގްވާމީ ވިޔަފާރިތަކަށް ގޮތެއް ނިންމުމުގެ މަސައްކަތާއި ފަރަންސޭސި ވިލާތުން ޗައިނާއާއެކު ކުރާ ވިޔަފާރީގެ އަގު ޔުއާނުން އަދާކުރުން ހިމެނެއެވެ. 

އޭގެ އިތުރުން ޔޫރަޕްގެ ގައުމުތަކުންވެސް އެމެރިކާ ޑޮލަރަށް ބަރޯސާވުން ކުޑަކުރުމުގެ ވިސްނުން ފުޅާވަމުން ދާކަމާއި އެމެރިކާ ޑޮލާރުގެ މައްޗަށް ލެނބިގެން ނުތިބުމަށް ދާދި މިދާކަށް ދުވަހު ފަރަންސޭސި ރައީސް މެކްރޯން ކުރެއްވި އިންޒާރަށްވެސް އަލިއަޅުވާލާފައިވެއެވެ.                                   

އެސެޓް މެނޭޖްމުންޓްގެ ޔުރިޒޯން ބުނެފައިވާ ފަދައިން ފާއިތުވެގެން މިދާ ވިއްސަކަށް އަހަރުދުވަހު އެމެރިކާޑޮލަރަށް ފިއްތުން ކުރިމަތި ނުވާމިންވަރަށް އަދި އޭގެ ދިހަގުނަ އިތުރަށް ދުނިޔޭގެ ރިޒާވް ފައިސާއެއްގެ ގޮތުގައި އެމެރިކާ ޑޮލަރު އޮތުމާއި ދެކޮޅަށް 2022 ވަނައަހަރު އެކަނިވެސް މަސައްކަތް ކުރެވިފައިވެއެވެ.                    

އެތައް ޒަމާނެއްވަންދެން ދުނިޔޭގެ ބަޒާރުގައި ރަސްކަން ކުރަމުންގެންދިޔަ ބާރުގަދަ އެމެރިކާ ޑޮލަރުގެ މިއަދު ޙާލަތާއި ބޭހޭގޮތުން އެސެޓް މެނޭޖްމެންޓުގެ  އިސް ފަރާތްތަކުން ބުނެފައިވާ ގޮތުގައި 2021 ވަނައަހަރު ދުނިޔޭގެ ރިޒާވުގެ %55 ގައި ހުރި އެމެރިކާ ޑޮލަރު 2022 ވަނައަހަރު އޮތީ %47 އަށް ވެއްޓިފައެވެ. 2022 ވަނަ އަހަރުގައި ކޮންމެވެސް މިންވަރެއްގެ ކުރިއެރުމެއް ލިބިނުކަމުގައިވިޔަސް މިހާރު އަނެއްކާވެސް ޑޮލަރަށް ކުރެވޭ އިތުބާރު ކުޑަވަމުންދާކަމުގެ ހެކިތައް ހާމަވެގެން އެބަދެއެވެ.

މިފަހަރު ޑޮލަރުގެ މައިދާނުން  6 ގައުމެއްގެ ފައިސާއާއި ކުރިމަތިލާން ޖެހިފައިވަނިކޮށް އެންމެފަހުން މިފެނުނީ ފަރަންސޭސި ވިލާތުގެ ރައީސް މެކްރޯން ޕޮލިޓިކޯއަށް ދެއްވި ބަސްދީ ގަތުމެއްގައި އެމެރިކާ ޑޮލަރުގެ މައްޗަށް ލެނބިގެން ނުތިބުމަށް ދުނިޔެއަށް ގޮވާލިތަނެވެ. އެމެރިކާއަށް އަޑުއަހަން ވަރަށް ދަތި ގޮވާލެއްވުމެކެވެ.

އެމަނިކުފާނުގެ ބަސްދީގަތުމުގައި ޔޫރަޕަށް އިންޒާރުދެއްވީ އެމެރިކާއާއި ޗައިނާގެ ދެމެދުގައި ފިތި ތާށި ނުވުމަށެވެ. މި ދެބާރުގެ ކުރިމަތިލުމެއްގައި ޔޫރަޕްގެ އިގްތިސާދު ފުނޑިގެންދާއިރު އަލުން ނަގަހައްޓަން ޔޫރަޕަށް ފުރުސަތެއް ނުލިބޭނެއެވެ.

މެކްރޯންގެ ބަސްދީ ގަތުން މިއައީ ފްރާންސުގެ ޓޯޓަލް އެނަރޖީއާއި ޗަހިނާގެ ނޭޝަނަލް އޮއިލް ކޮމްޕެނީއާ ދެމެދު ޔުއާނުން އަގު އަދާކުރާގޮތަށް އެންމެފުރަތަމަ ކުރެވުނު ލިކުވިފައިޑް ނެޗުރަލް ގޭސްގެ ވިޔަފާރީގެ މުޢާމަލާތަށް ފަހުގައެވެ. 

ޗައިނާއިން ބޭނުންވީ ޑޮލަރުގެ ބަދަލުގައި ޔުއާނުން އަގުއަދާ ކުރުމަށެވެ. މިއީ 1970 އިންފެށިގެން ތެލުގެ އަގު ޑޮލަރުން އަދާ ކުރުމަށް އަޅާފައިވާ ބިންގަލަށް އައި ބާރުގަދަ ލޮޅުމަކަށް ވެގެން ދިޔައީއެވެ. 

މިއީ ރަޝިޔާއިން ޔޫކްރެއިންގައި ”ޚާއްސަ މިލިޓެރީ އޮފަރޭޝަން“ ފެށި ދުވަހުން ފެށިގެންޑޮލަރުގެ ބޭނުން ކުޑަކުރުމަށް ރަޝިޔާއާއި އެކު ޗައިނާއިން ފަށާފައިވާ ކެމްޕޭނުގައި ކުރިއަށް އެޅުނު މުހިންމު ފިޔަވަޅަކާއިއެކު ލިބުނު ވަރަށްބޮޑު ކުރިއެރުމެކެވެ.                                   

ބިލިއަނަރ ރޭ ޑެލިއޯ ބުނެފައިވާގޮތުގައި މިހާރަކަށް އައިސް ދުނިޔޭގެ ބާޒާރުގައި ޗައިނާގެ ވިޔަފާރި  ބާރުގަދަ ކުރަމުންގެންދިއުމުގެ ސަބަބުން ވަރަށް ގިނަ ގައުމުތަކެއްގެ މަރްކަޒީ ބޭންކުން އެމެރިކާ ޑޮލަރަށް ދެމުން ގެންދިޔަ އަހަންމިއްޔަތު ވަރަށް ދަށްވެއްޖެއެވެ. ޗައިނާއިން ބޭނުންވަނީ ޔުއާނުން އަގުއަދާކުރާށެވެ.                

މެލޭޝިޔާއިން މިހާރު މަސައްކަތް ކުރަމުން ގެންދަނީ އޭޝިޔާގެ ގައުމުތަކަށް ނިސްބަތްކުރެވޭ މަނިޓަރީ ފަންޑެއް ވުޖޫދު ކުރުމަށެވެ. ބުލޫމްބާރގު ޚަބަރުދޭ ގޮތުގައިޗައިނާއާއި މެލޭޝިޔާއިން މިވާހަކަތައް މިހާރު ކުރިއަށް އެބަ ގެންދެއެވެ. 

މިމަހުގެ ކުރީކޮޅު މެލޭޝިޔާގެ ބޮޑުވަޒީރު އަންވަރު އިބްރާހިމް ވިދާޅުވެފައިވަނީ އަހަރެމެން އެމެރިކާ ޑޮލަރަށް ބަރޯސާވެގެން ތިބެންޖެހޭ އެއްވެސް ސަބަބެއް ނެތްކަމަށާއި ޗައިނާއާއެކު ކުރެވޭ ވިޔަފާރީގައި މެލޭޝިޔާގެ ރިންގިޓް ބޭނުންކުރުމުގެ މަޝްވަރާ މިހާރުވެސް ކުރިއަށް އެބަ ގެންދެވާ ކަމަށެވެ. އަންވަރު ވިދާވެފައިވަނީ 1990 ގައި އޭޝިއަން މަނިޓަރީ ފަންޑެއް ވުޖޫދު ކުރުމަށްޓަކައި ކުރެވުނު ޚިޔާލުތައް ވައިގާ ހިފާ ގޮތް ނުވިޔަސް މިހާރު މުޅި ވެށި ތަފާތުވެ ޗައިނާއާއި ޖަޕާން އަދި އެހެން ގައުމުތަކުގެ ވިސްނުންވެސް އޭޝިއަން މަނިޓަރީ ފަންޑަކާ ދިމާލަށް މިސްރާބު ޖަހައިފިއޭ ބުނެވިދާނެއެވެ.

މިދިޔަ އަހަރު ޗައިނާއާއި ރަޝިޔާއިންވެސް ބްރިކްސްގެ ނަމުގައި ރިޒާވް ފައިސާއެއް ކަނޑައެޅުމުގެ ވިސްނުންވަނީ ހާމަކޮށްފައެވެ. ދެކުނު އެމެރިކާގެ ގައުމުތަކުގެ ވެރިން މިހާރު ގެންދަވަނީ އެ ގައުމުތައް ހިމެނޭ އާންމު ފައިސާއެއް ތައާރުފް ކުރުމާމެދު މަޝްވަރާ ކުރަމުންނެވެ. 

އެބޭފުޅުން ދެކިވަޑައިގަންނަވާ ގޮތުގައި އާންމު ފައިސާއެއް ވުޖޫދު ކުރެވުނީމާ އެމެރިކާ ޑޮލަރް އެކްސްޗޭންޖުން ލިބޭ ގެއްލުމާއި އެމެރިކާއަށް ދޭންޖެހޭ ކަމިޝަން ސަލާމަތް ކުރެވުމުން މުދަލުގެ އަގު ހެޔޮ ވެގެންދާނެއެވެ.

ބްރެޒިލް އާއި އާރޖެންޓީނާއިން “ ސޫރް “ ގެ ނަމުގައި އާންމު ފައިސާއެއް ބޭނުންކުރަން ފެށުމުގެ އެންމެ ފަހުގެ ތައްޔާރީތައް މިހާރު ދަނީ ކުރެވެމުންނެވެ. އިންޓަރޏޭޝަނަލް މަނިޓަރީ ފަންޑުން ހާމަކޮށްފައިވާ ގޮތުގައި ދުނިޔޭގެ މަރުކަޒީ ބޭންކުތަކުންވެސް އެމެރިކާ ޑޮލަރުގެ ބަދަލުގައި ޔުއާން އާއި ސްވެޑިޝް ކްރޯނާއާއި ދެކުނު ކޮރެޔާގެ ވޯންގެ އަށް ދެމެންގެންދާ އަހަންމިއްޔަތު ބޮޑުވަމުންދާކަން ފާހަގަކޮށްފައިވެއެވެ.