މިއަހަރު ރާއްޖެއިން ހައްޖަށް މީހުން ގެންދިއުމަށް 03 ކުންފުންޏަކަށް އިސްލާމިކް މިނިސްޓްރީން ހުއްދަ ދެއްވައިފިއެވެ.
މިނިސްޓްރީން މިއަދު ވަނީ ހުއްދަ ދެއްވާފައިވާ ކުންފުނިތަކާއި އެ ކުންފުނިތަކަށް ހުއްދަ ދެެއްވާފައިވާ އަގުތަކާއި ކޯޓާގެ ތަފްސީލު ހާމަކުރައްވައިފައެވެ.
އެ ކުންފުނިތަކަކީ އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑާއި ސިސިލްފަރު ޙައްޖު އެންޑް ޢުމްރާ ޕްރައިވެޓް ލިމިޓެޑާއި އަލްމަނާސިކް ޕްރައިވެޓް ލިމިޓެޑެވެ.
ހުއްދަ ދެެއްވާފައިވާ އަގުތަކާއި ކޯޓާގެ ތަފްސީލު:
އަލްޙަރަމައިން ޙައްޖު އެންޑް ޢުމްރާ: 75250 ރުފިޔާ, 90 ކޯޓާ
ސިސިލްފަރު ޙައްޖު އެންޑް ޢުމްރާ: 75465 ރުފިޔާ, 90 ކޯޓާ
އަލްމަނާސިކް: 75000 ރުފިޔާ, 90 ކޯޓާ
ރާއްޖެއިން ހައްޖަށް މީހުން ގެންދިއުމާބެހޭ އުސޫލުގައިވާ ގޮތުގެ މަތިން މި ކުންފުނިތަކަށް ދީފައިވާ ހުއްދައިގެ މުއްދަތަކީ އެއް އަހަރެވެ.
ހުއްދަ ދީފައިވާ އަގަށްވުރެ އިތުރަށް ކުންފުނިތަކުން ފައިސާ ނެގުމާއި, ކުންފުނިތަކަށް ފައިސާ ދެއްކުމާއި, ހުއްދަ ދީފައިވާ ކޯޓާއަށްވުރެ އިތުރަށް މީހުން ހައްޖަށް ގެންދިޔުމަށް އެއްވެސް ފަރާތަކުން ފައިސާ ނެގުމަކީ އުސޫލުގެ ދަށުން މަނާކަމެއްކަން މިނިސްޓްރީން ވަނީ ފާހަގަ ކުރައްވައިފައެވެ.
ސަޢޫދީ ސަރުކާރުން ރާއްޖެއަށް މިއަހަރު ރަސްމީކޮށް ހަމަޖައްސައިދީފައިވަނީ 1,000 ކޯޓާއެވެ. އޭގެތެރެއިން ބާކީ 730 ކޯޓާ ދޭން ނިންމަވާފައިވަނީ ހައްޖު ކޯޕަރޭޝަނަށެވެ.
