ރާއްޖެއިން ނައްތާލައިފައިވާ ބައްޔެއް ކަމަށްވާ މެލޭރިއާއަށް ރާއްޖޭގައި ހުރި އިންޑިއާ މީހަކު ޕޮޒިޓިވްވެއްޖެއެވެ.
ހެލްތު މިނިސްޓްރީން ވިދާޅުވީ މެލޭރިއާ މި ބަލި ޖެހިފައިވާ މީހަކު ރާއްޖެއިން ފެނުނު ކަމުގައި ވިޔަސް ބަލި ފެތުރުމުގެ ބިރެއް ނެތް ކަމަށެވެ. މިނިސްޓްރީން ވިދާޅުވީ ބަލިޖެހިފައިވާ މީހާއަށް ފަރުވާދިނުމުގެ މަސައްކަތް ކުރަމުންދާ ކަމަށެވެ.
މެލޭރިއާގެ ކޭސްއެއް ބިދޭސީއެއްގެ ގައިން ފެނުނީ އަލަށް ނޫން ކަމަށާއި މަދުން ނަމަވެސް ބޭރުން އަންނަ މީހުންގެ ގައިން މި ބަލީގެ ކޭސްތައް ފެންނަ ކަމަށް މިނިސްޓްރީން ވިދާޅުވިއެވެ.
ރާއްޖެއިން މެލޭރިއާ ބަލި ނައްތައިލެވިފައިވާ ކަމަށް ދުނިޔޭގެ ސިއްހަތު ޖަމްއިއްޔާއިން ކަނޑައެޅީ 2015 ގައެވެ.
ދެކުނު އިރުމަތީ އޭޝިއާގެ ޑަބްލިޔުއެޗްއޯގެ މެންބަރު ގައުމުތަކުގެ ތެރެއިން މެލޭރިއާ ނައްތައިލެވުނު ފުރަތަމަ ގައުމަކީ ވެސް ރާއްޖެއެވެ.
