ވައިގެ މަގުން އިތިއޯޕިއާއިން ރާއްޖެއައި އިންޑިއާގެ ފަސިންޖަރެއްގެ އަތުން ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސްއިން އަތުލައިގެންފިއެވެ. 

ކަސްޓަމަސްއިން މިއަދު ބުނީ ގިނަ އަދަދެއްގެ މަސްތުވާތަކެތި އަތުލައިގަތީ މި މަހުގެ 12 ވަނަ ދުވަހު އިތިއޯޕިއާއިން ރާއްޖެއައި އިންޑިއާގެ 56 އަހަރުގެ އަންހެނަކު ބަލައި ފާސްކުރުމުގެ ތެރޭގައި ކަމަށެވެ. 

ކަސްޓަމްސްއިން ބުނީ އޭނާގެ އަތް ދަބަހުން ފެނުނު ތަކެތި މަސްތުވާތަކެތީގެ ބާވަތެއްކަމަށްވާ ކޮކެއިންއަށް އަދި ލަޖެޖުން ފެނުނު ތަކެތި މަސްތުވާތަކެތީގެ ބާވަތެއްކަމަށްވާ ހެރޮއިންއަށް ޕޮޒިޓިވްވެފައިވާ ކަމަށާއި އެ ތަކެތީގެ ބަރުދަނުގައި 5.3 ކިލޯ ހުރި ކަމަށެވެ. 

މި މައްސަލަ އިތުރަށް ތަހުގީގު ކުރުމަށް ފަސިންޖަރާއި އެ ތަކެތި ފުލުހުންނާ ހަވާލުކޮށްފައިވާ ކަމަށް ކަސްޓަމްސްއިން ބުންޏެވެ.