ޖެނީވާއިން ރޮއިޓާސް ޚަބަރުދޭގޮތުގައި ތުރުކީއާއި ސީރިޔާއާދެމެދު މިހާރު ދެކެވެމުންދާ ވާހަކަތަކުން ރަނގަޅު ނަތީޖާއަކާ ހަމަޔަށް ދެވިއްޖެނަމަ ސީރިޔާގެ އުތުރުން ތުރުކީގެ ބާރުގެ ދަށުގައި އޮތް ސަރަޙައްދު އަނބުރާ ސީރިޔާއަށް ދޭނެކަން ޔަގީން ކޮށްދީފައިވާ ކަމަށް ސީރިޔާގެ އިދިކޮޅަށް ނިސްބަތްކުރެވޭ ވަރަށް އިސް ސިޔާސީ ބޭފުޅަކު ވިދާޅުވެއްޖެއެވެ.
ސީރިޔާގެ ފަރާތުން މިވާހަކަތަކުގައި ބައިވެރިވެ ވަޑައިގަންނަވާ އިދިކޮޅުގެ ރައީސް ބަދުރު ޖަމޯސް ތަރުޖަމާނު މެދުވެރިކޮށް ވިދާޅުވީ “ ތުރުކީގެ ޚާރިޖީ ވަޒީރާއި އަދި ސަލާމަތީ ބާރުތަކާ އަހަރެން ބައްދަލު ކޮށްފީމެވެ. މިހާރު ދެކެވެމުންދާ ވާހަކަތަކުން ރަނގަޅު ނަތީޖާއެއް ލިބިއްޖެނަމަ ތުރުކީން އެސަރަހައްދުން ފައިބާނެކަން ކަށަވަރު ކޮށްދީފައިވެއެވެ. “ މިކަމާގުޅޭގޮތުން އަންކާރާގެ ސިދާ ޖަވާބެއް މިވަގުތު ނުލިބުނު ކަމުގައިވިޔަސް ދިމިޝްގާއިއެކު ދެކެވޭ ވާހަކަތަކުގައި ރަނގަޅު ނަތީޖާއަކަށް އާދެވިއްޖެނަމަ ތުރުކީގެ ސިފައިން އެ ސަރަހައްދުން ފައިބާނެ ކަމުގެ ވަރަށްބޮޑުއުންމީދެއް އޮތީ ލިބިފައެވެ.
ސީރިޔާގެ ދިހަ ބާރަ އަހަރުވީ ދާޚިލީ ހަނގުރާމައިގާ ތުރުކީގެ ތާއީދު އޮތީ އިދިކޮޅުގެ ފަރާތްތަކަށެވެ. ސީރިޔާގެ ހަނގުރާމަވެސް މިހާރު އޮތީ ކޮންމެވެސް ވަރަކަށް މައިތިރި ވެފައެވެ. އެހެންނަމަވެސް ދޭތެރެ ދޭތެރޭން ސީރިޔާ ކުރުދީންގެ ނަމުން މުޚާތަބު ކުރެވޭ ވައި. ޕީ. ޖީ. ގެ ހަނގުރާމަވެރިންނާއި ކުރިމަތިލުން ހިނގައެވެ.
އަންކާރާއާއި ޔޫރަޕިއަން ޔުނިއަން އަދި ވޯޝިންގޓަނުންވެސް ތުޙުމަތު ކުރާގޮތުގައި ވައި. ޕީ. ޖީ.އަކީ ތުރުކީގެ އިރު ދެކުނުގައި ހަރަކާތްތެރިވަމުން ގެންދާ ޕީ. ކޭ. ކޭ. ޓެރަރިސްޓް ޖަމާއަތުގެ ގޮތްޕެކެވެ. އެހެންނަމަވެސް ސީރިޔާ ހަނގުރާމައިގާ އިސްލާމިކް ސްޓޭޓާއި ދެކޮޅަށް އެމެރިކާއިން ދެމުންގެންދިޔަ ޙަމަލާތަކުގައި ވައި. ޕީ. ޖީ. ގެ އެއްބާރުލުން އެމެރިކާއަށް ލިބުނެވެ.
ސީރިޔާއިން ދެކޭގޮތުގައި ތުރުކީ ސިފައިން އެ ގައުމުގެ އުތުރުގައި އެތިބެނީ ގަދަބާރުންނެވެ. މާލަސްތަކެއްނުވެ އެކަމަށް ރަނގަޅު ޙައްލެއް ލިބޭނެކަމަށް ބެލެވެއެވެ.
