އެމެރިކާގެ އިގްތިސާދަށް މެދުވެރިވާ ކޮންމެ ނުރަނގަޅު ބަދެލެއްގެ ބުރަ މުޅިދުނިޔެއިން އުފުލަން ޖައްސާނެއެވެ. މި މަޢުލޫމާތު ކިއުންތެރިންނަށް ފޯރުކޮށްދޭން ބޭނުންވަނީ މިކަމާދޭތެރޭ ވިސްނާ ފިކުރު ކުރުމަށް ޓަކައެވެ. މިޙާލަތުގައި ބިލިއަނަރ ޖެފް ބެޒޯސްގެ އިރުޝާދަކީ ކޮންމެހެން ބޭނުން ޖެހިއްޖެ ޚަރަދެއްނޫނީ ނުކުރާށެވެ. ކުރިއަށް އޮތީ ގޮތްނޭންގޭ ދަތި ދުވަސްތަކެއް ކަމަށް ގަބޫލުކުރާށެވެ.                               

ދުނިޔެއަށް ކުރިމަތިވަމުން މިދާ އިގްތިސާދީ ހީނަރުކަމުގެ ތެރޭގައި އެމެރިކާގެ ފެޑެރަލް ސަރުކާރުންވެސް އެމީހުންގެ ދަރަނިތައް އަދާ ނުކުރެވިދާނެ ކަމުގެ ބިރު ބޮޑުވަމުން ދިއުމުގެ ސަބަބުން ވޯލްސްޓްރީޓްގެ ވިޔަފާރިވެރިން 2023 ގައި ރަނާ ރިހިން އަގުއަދާ ކުރާގޮތަށް ވިސްނުން ގެންގުޅެން ފަށައިފިއެވެ. 

އެންމެ ފަހުގެ އިންފްލޭޝަން ޑޭޓާ ތަކުން އެނގިގެން ދިޔައީ އާންމުކޮށް ބޭނުންކުރަންޖެހޭ މުދަލާއި ޚިދުމަތުގެ އަގުތައް ކޮންމެ އަހަރަކު %6.5 އުފުލެމުން ދާކަމަށާއި އަދި މިދިޔަ ބުރާސްފަތި ދުވަހު އެމެރިކާގެ ދަރަނި 31.4 ޓްރިލިއަން ޑޮލަރަށް އަރައިފި ކަމަށެވެ.        

ފާއިތުވެގެން މިދިޔަ ތިން މަސްދުވަހުގެ ތެރޭގައި ރަނުގެ އަގު %15 އަދި ރިހީގެ އަގު %21 އަށް ވަނީ އުފުލިފައެވެ. ހަމައެއާއިއެކު އެމެރިކާ ޑޮލަރުގެ އަގު އުޅެނީ އިނގިރޭސި ޕައުންޑަކަށް 0.81 އަދި ޔޫރޯ އަކަށް 0.92ގައެވެ.

ޖެނެސިސް ގޯލްޑް ގްރޫޕްގެ ޗެއަރމަން ޖޮނަތަން ރޯސް ފޮކްސް ބިޒްނަސް އަށް ދިން ބަސްދީގަތުމެއްގައި ވިދާޅުވެފާވަނީ ރަނާއި ރިހީގެ އަގު އުފުލެން މެދުވެރިވި މައިގަނޑު ސަބަބަކީ އެމެރިކާ ޑޮލަރުގެ އަގު ވެއްޓެމުންދާ ދިއުން ކަމަށާއި އެމެރިކާގެ އިންފްލޭޝަން މައްޗަށް ދިއުމާއި އެމެރިކާ ސަރުކާރުގެ ނުރަނގަޅު މަނިޓަރީ ސިޔާސަތެވެ. ސަރުކާރުގެ ޚަރަދުތައް ބޮޑުވުމުގެ ސަބަބުން ސަރުކާރުން މިވަނީ ދަރަނިތައް އަދާކުރުމަށް ނުކުޅެދިފައެވެ. 

އެމެރިކާއަށް އެމީހުންގެ ދަރަނިތައް ނުދެއްކޭ ވަރުވީމާ އިންވެސްޓް ކުރާމީހުންގެ އިތުބާރު ގެއްލޭނެކަމާއި އެމެރިކާ ޑޮލަރުގެ އަގު ވެއްޓޭނެކަން މީހަކު ކިޔާނުދިނަސް އެނގޭނެއެވެ. އެހެންވީމާ އެމެރިކާ ޓްރެޝަރީ ޑިޕާރޓްމެންޓުން ކޮންމެ ގޮތެއްހަދާފައިވެސް ސަރުކާރުން އެ ދަރަނި ދައްކަން މަޖްބޫރު ކުރުވާނެއެވެ. ޖޮނަތަން ރޯސްގެ ވާހަކަ ކުރިއަށް ގެންދަމުން ބުންޏެވެ. މިޙާލަތުގައި ރަނާއި ރިހީގެ އަގު މައްޗަށް ދިއުމަކީ ނުވެ ނުދާނެ ކަމެކެވެ.         

ކިޓްކޯ ނިއުސްގެ އޮންލައިން ސަރވޭއަކުން ހާމަވެގެން ދިޔަގޮތުގައި 2023 ވަނަ އަހަރު ނިމޭއިރު ރިހީގެ އަގު އައުންސެއް 38 އެމެރިކާ ޑޮލަރަށް އަދި ރަން އައުންސެއް 2100 އެމެރިކާ ޑޮލަރަށް އުފުލޭނެއެވެ.

ރޯސް ދެކޭގޮތުގައި މުސްތަގްބަލްގައި އިންވެސްޓް ކުރުމަށް ތަޖްރިބާކާރުން ރިހީގެ މައްޗަށް ބުރަވަމުންދާލެއް ބޮޑުކަން ފާހަގަ ކުރެވެއެވެ. ސަބަބަކީ ރިހި ބޭނުންކުރެވޭ ސިނާޢީ ދާއިރާތައް ފުޅާވަމުން ދިއުމެވެ.

ސޯލާ ސިސްޓަމަށް އިލެކްޓްރިކަލް ބޭނުންތައް ބަދަލުވެގެން ދާއިރު ސޯލާ ޕެނެލްތަކާއި އަދި އެއްގަމު ދަތުރުތަކަށް ބޭނުންކުރާ އުޅަނދުފަހަރު އުފެއްދުމުގައިކޮންޑަކްޓަރަށްވެސް ރިހި ބޭނުން ކުރެވޭނެތީއެވެ. ފާއިތުވެގެން މިދާ ބާރަ ވަރަކަށް މަސްދުވަހުގެ ތެރޭގައި މީގެ ކުރިން ދުވަހަކުވެސް ރިހީގެ ބޭނުން ނުކުރެވޭ ވަރަށް ރިހީގެ ބޭނުން ދަނީ ކުރެވެމުންނެވެ.

އެމެރިކާގެ އިގްތިސާދަށް އަންނަ ކޮންމެ ނުރަނގަޅު ބަދަލެއްގެބުރަ މުޅިދުނިޔެ އުފުލަން ޖައްސާނެއެވެ. އެމެރިކާގެ އިކޮނޮމިކް އެޑްވައިޒަރުންގެ ކައުންސިލުން ހާމަކޮށްފައިވާ ގޮތުގައި އެމެރިކާގެ ދަރަނިތައް އަދާ ނުކުރެވިއްޖެނަމަ މުޅި ގައުމަށް އެކަމުގެ ނިކަމެތިކަން ފޯރާނެއެވެ. ގައުމުގެ އާންމެ ސިއްޙަތާއި ދިފާޢީ ނިޒާމުވެސް އޭގެތެރޭގައި ހިމެނޭނެއެވެ. އެމެރިކާގެ މާލީ ނިޒާމާއިމެދު މިވަނީ ސުވާލު އުފެދިފައެވެ.