އިދިކޮޅުގެ ލީޑަރު އަދި ކުރީގެ ރައީސް ރައީސް ޔާމީން ޢަބްދުލްޤައްޔޫމްގެ މައްޗަށް އަނިޔާވެރިނުވެ, އިންތިޚާބު ކާމިޔާބުނުކުރެއްވެނީތޯ ޑރ.މުޙައްމަދު ޖަމީލް އަޙްމަދު ސުވާލު ކުރައްވައިފިއެވެ.
11 އަހަރުގެ ޖަލު ޙުކުމެއް ތަންފީޒު ކުރައްވަމުން ގެންދަވާ ރައީސް ޔާމީންގެ ވަކީލު ޑރ.ޖަމީލް މި ސުވާލު ކުރެއްވީ މިއަދު ކުރެއްވި ޓުވީޓެއްގައެވެ.
އެ ގޮތުން ޑރ.ޖަމީލް ވަނީ ޤާނޫނު ހިންގެވުމުގައި ތަފާތުކުރައްވަނީ ކީއްވެތޯ ރައީސް އިބްރާހިމް މުޙައްމަދު ޞާލިޙާ ސުވާލު ކުރައްވައިފައެވެ. އަދި ރައްޔިތުންގެ މެދުގައި ތަފާތު ކުރައްވާ ވެރިޔަކު ރައްޔިތުންގެ ޚާދިމަކަށް ކަމުދާނީ ކިހިނެއްތޯ ވެސް ވަކީލު ސުވާލު ކުރެއްވިއެވެ.
“ރައީސް ޔާމީންގެ މައްޗަށް އަނިޔާވެރި ނުވެ، އިންތިޚާބު ކާމިޔާބުނުކުރެއްވެނީތޯ.“ ޑރ.ޖަމީލު ވިދާޅުވިއެވެ.
ޑރ.ޖަމީލް އިތުރަށް ވިދާޅުވީ ވެރިކަމަށް ވިޔަސް މަސައްކަތު މީހަކަށް ވިޔަސް “ބުއްދި ހަމަ މީހަކަށް“ ވާންޖެހޭ ކަމަށެވެ.
“ސުނާމީފަދަ ބޮޑުކޮންމެ ތާރީޚެއް ހަމަ ގަނޑު ބަލާފައި މި ކިޔާލަނީ. ދުނިޔެއިން ބޭރުވެދާނެ.“ ރައީސް ޞާލިޙް ކެމްޕޭން ޖަލްސާއެއްގައި ވާހަކަފުޅު ދެއްކެވި ގޮތަށް ފާޑުވިދާޅުވެ ކުރެއްވި ޓުވީޓުގައި ޑރ.ޖަމީލު ވިދާޅުވިއެވެ.
މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ރައީސް ޔާމީނަށް އިއްވެވި ޙުކުމާއެކު އަންނަ ރިޔާސީ އިންތިޚާބުގައި ވާދަކުރެއްވުމުގެ ފުރުސަތު ވަނީ ހަނިވެފައެވެ.
އެ މަނިކުފާނުގެ ވަކީލުންގެ ޓީމުން މިހާރު ގެންދަވަނީ އެ ޙުކުމް ހައިކޯޓުގައި އިސްތިއުނާފު ކުރެއްވުމުގެ ތައްޔާރީތައް ވަމުންނެވެ.
ދާދިފަހުން ޖަމީލު ވިދާޅުވީ އިސްތިއުނާފީ ކޯޓުގެ ކުރިމަތީގައި އޮތީ އެތައް ރައްޔިތުންގެ ޙައްޤު ކަމަށާއި ދާދި އަވަހަށް ރައީސް ޞާލިޙްގެ ވެރިކަން ނިމި އަނިޔާވެރިކަމުގެ މައްޗަށް ޢަދުލުވެރިކަން ފާޅުވާނެ ކަމަށެވެ.
One Response
ޔާމިނު ތިބުނާހެން ނަޝީދައްވެސް ހެދީ. ދެރަކަމެއް. ކަލޭވެސް ޔާމިނޭ ކިޔާފަ ނުގޮވާ ހަޔާތެއް ނެތް. ކަލޭމެންގެ ވައްތަރު އެނގި ވަރަށް ފޫހި.