އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ކުރީގެ ރައީސް ޔާމީން ޢަބްދުލްޤައްޔޫމާއެކު ކޯލިޝަން ހައްދަވާފާނެކަމުގެ ބިރުހީވާ ކަމަށް އެމްޑީޕީގެ ކުރީގެ ޗެއާޕާސަން އަދި ޑިފެންސް މިނިސްޓަރު މާރިޔާ އަޙްމަދު ދީދީ މިރޭ ވިދާޅުވެއްޖެއެވެ.

އާޓިފިޝަލް ބީޗުގައި މިރޭ ބާއްވަމުންދާ ރައީސް އިބްރާހިމް މުޙައްމަދު ޞާލިޙްގެ ކެމްޕޭން ޖަލްސާގައި ދެއްކެވި ވާހަކަފުޅުގައި މާރިޔާ ވިދާޅުވީ މިހާރަކަށް އައިސް އިވެނީ ރައީސް ނަޝީދު ރައީސް ޔާމީނަށް ތަޢުރީފު ކުރައްވާ އަޑު ކަމަށާއި އިދިކޮޅު ކޯލިޝަނަށް ނިސްބަތްވާ ބޭފުޅުން އެ މަނިކުފާނާ އެއްކޮށް ތިއްބެވި ކަމަށް ރައީސް ނަޝީދު ވިދާޅުވާ އަޑު ކަމަށެވެ.

“މިހާރަކަށް އައިސް މި އިވެނީ ރައީސް ނަޝީދު ވިދާޅުވާ އަޑު ރައީސް ޔާމީނާ އެމަނިކުފާނާ އެއްގޮތޭ. އިންޑިއާ އައުޓް ފިޔަވައި އެ މަނިކުފާނާއި ރައީސް ޔާމީންގެ ސިޔާސަތުތައް ކަމުދާ ވާހަކަ. އަޅުގަނޑުމެންނަށް މި އިވެނީ ރައީސް ޔާމީނަކީ ވިޝަނަރީ ވިދާޅުވަމުން ރައީސް ނަޝީދު ވަޑައިގަންނަވާ ތަން. ރަށްރަށަށް ވަޑައިގަތީމާ އެ ވަޑައިގަންނަވާއިރަށް ތަން ތައްޔާރު ކުރުމަށްޓަކައި ޕީޕީއެމްގެ އެކްޓިވިސްޓުން ނުކުމެ ޕޯސްޓަރުތަކާއި ބެނާތަކާ ދަމާ ތަން. އަދި ރައީސް ނަޝީދު ރަށްރަށަށް އަރާވަޑައިގަންނަވާއިރު ޕީޕީއެމްގެ ހަރަކާތްތެރިން އެ މަނިކުފާނުގެ އިސްތިގުބާލުގައި ހުންނަ ވާހަކަ.“

“އެ މަނިކުފާނު އެބަދައްކަވާ ކޯލިޝަނެއްގެ ވާހަކަ ވެސް. އެހެންކަމާއެކު މިއަދު އަޅުގަނޑަށް ހަމަގައިމު ވެސް އެންމެ ބިރުހީވަނީ އެމަނިކުފާނު ވެރިކަމަށް ވަޑައިގަތުމަށްޓަކައި ރައީސް ޔާމީނާއެކީ ކޯލިޝަނެއް ހައްދަވާފާނެތީ.“ މާރިޔާ އިތުރަށް ވިދާޅުވިއެވެ.

މާރިޔާ ވިދާޅުވީ ރައީސް ޔާމީންގެ ދައުރުގައި އޭރުގައި ތިއްބެވި ސިޔާސީ ލީޑަރުން ޖަލަށް ލެއްވި ކަމަށާއި ނުވިތާކަށް ބޭބޭފުޅު ކުރީގެ ރައީސް މައުމޫން ޢަބްދުލްޤައްޔޫމް ވެސް ޖަލަށްލެއްވި ކަމަށެވެ. އަދި ރައްޔިތުން މަޖިލީހުގެ ބައެއް މެންބަރެއްގެ ގޮނޑި ގެއްލުވާލައި މަޖިލީހުގެ ތެރެއިން އެތައް ހާސް ރައްޔިތުންނެއްގެ އަޑުކަނޑުވައިލި ކަމަށާއި ރައްޔިތުންގެ މަޖިލިސް ވެސް ހިޞާރު ކުރެއްވި ކަމަށެވެ.

“އެ ބޭފުޅާ އެދިވަޑައިގަންނަވާ ގޮތަށް ނޫން ގޮތަށް ޙުކުމެއް ލިބުނީމާ ދިވެހިރާއްޖޭގެ އުއްތަމަ ފަނޑިޔާރާއި ދެން ހުންނެވި ދެ ފަނޑިޔާރުން ހައްޔަރުކުރެއްވި. 2018 ގައި ރައްޔިތުން ނުކުމެ ރައީސް އިބޫ ރައީސުލްޖުމްހޫރިއްޔާ ކަމަށް އިޚްތިޔާރުކޮށް ބޮޑު އަޣްލަބިއްޔަތަކުން ނެގީމަ ވެސް ސްޕްރީމް ކޯޓަށް ވަޑައިގެން އެ ރައްޔިތުން ބުނި ބަސް ބޭކާރުކޮށްލެވޭތޯ ވެސް މަސައްކަތްޕުޅު ކުރެއްވި.“

“މިއަދު އަޅުގަނޑުމެންގެ ޕާޓީގެ އަޅުގަނޑުމެން ނުހަނު ލޯބިވާ ރައީސް ނަޝީދު ނުކުމެވަޑައިގެން ރައީސް ޔާމީނަކީ ވިޝަނަރީ ލީޑަރެކޭ ވިދާޅުވީމާ އަޅުގަނޑުމެން ހިތަށް އުނދަގޫވޭ. އަޅުގަނޑުމެން ޖަޒުބާތުގައި ޖެހިގެން ވެސް އެ މަނިކުފާނު އެފަދަ މޮޔައެއް އެކަހަލަ ކަމެއް ކުރެއްވިޔަ ދީގެން ނުވާނެ. އަޅުގަނޑު ދަންނަވާނީ ރައީސް ނަޝީދާ އެކު ވެސް ތިއްބެވި އެމްޑީޕީ ބޭފުޅުންނަށް 28 ޖެނުއަރީ 2023 ވާ ހޮނިހިރު ދުވަހު ނުކުމެވަޑައިގެން ރައީސް އިބޫ ކެންޑިޑޭޓް ނަންބަރަށް ވޯޓެއް ދެއްވާށޭ.“ މާރިޔާ ވިދާޅުވިއެވެ.

ދާދިފަހުން ބޭއްވެވި ނޫސްވެރިންގެ ބައްދަލުވުމެއްގައި ރައީސް ނަޝީދު ވިދާޅުވީ އެ މަނިކުފާނާއި ޕީޕީއެމްއާއި ދެމެދު އޮތް ޚިޔާލުތަފާތުވުމަކީ އެ ޕާޓީން އިންޑިއާއާމެދު ގެންގުޅޭ ވިސްނުން ކަމަށެވެ.

“އަޅުގަނޑު ތަކުރާރުކޮށް ޕީޕީއެމް ބޭފުޅުން ކައިރީގަ އެބަ ދަންނަވަން އަޅުގަނޑާ ތިބޭފުޅުންނާ އޮތް ހަމައެކަނި ޚިޔާލު ތަފާތުވާ ތަނަކީ މިއީއޭ. އިންޑިއާ އައުޓު ދޫކޮށްލައްވާށޭ. އަޅުގަނޑު ރައީސް ޔާމީން އަރިހުގަ ވެސް ތަކުރާރުކޮށް އެބަ ދަންނަވަން އެވިސްނުން ދޫކޮށްލައްވާށޭ.“

އެއަށްފަހު ރައީސް ނަޝީދު ރައީސް ޔާމީނަށް ތަޢުރީފު ކުރައްވައި ވާހަކަފުޅު ދެއްކެވިއެވެ. އެ ގޮތުން ރައީސް ނަޝީދު ވިދާޅުވީ ޔާމީނަކީ ވަރަށް އިންޓަލެކްޗުއަލް ބޭފުޅެއް ކަމަށާއި ޔާމީނަކީ ވަރަށް އެކަޑެމިކް ބޭފުޅެއް ކަމަށެވެ. އަދި އެއީ ތަންދޮރު ދަންނަ ވިޝަނެއް އޮތް ބޭފުޅެއްކަމަށް ވެސް ރައީސް ނަޝީދު ވިދާޅުވިއެވެ.