ޕްރޮގްރެސިވް ކޮންގްރެސް ކޯލިޝަނުގެ ލީޑަރު ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް އަންނަ ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލޭ ގޮތަށް ސަރުކާރުން އަމަލު ކުރައްވަމުން ގެންދަވާކަމަށް ބުނެ އެ ކަންބޮޑުވުންތައް ޔޫރަޕްގެ ޤައުމުތަކުގެ ސަފީރުންނަށް ހުށަހަޅުއްވައިފިއެވެ.

އިދިކޮޅު ކޯލިޝަންގެ ވަފުދު ސްރީލަންކާގެ ވެރިރަށް ކޮލަމްބޯގައި ތިއްބަވާ ޔޫރަޕިއަން ޔޫނިއަން (އީޔޫ) ގެ ޤައުމުތަކުގެ ސަފީރުންނާ ބައްދަލުކުރައްވާފައިވަނީ އިއްޔެގައެވެ.

އިދިކޮޅުގެ ވަފުދުގައި ހިމެނިވަޑައިގަންވަނީ:

ރައީސް ޔާމީންގެ ވަކީލު ޑރ.މުޙައްމަދު ޖަމީލު.

ޕީއެންސީގެ ނައިބު ރައީސް މުޙައްމަދު ސަޢީދު.

ޕީޕީއެމްގެ ރައީސް އަޙްމަދު ޝިޔާމް.

ކޯލިޝަންގެސެނެޓަރ ހަމްދާން ޝަކީލު.

ރައީސް ޔާމީންގެ ދަރިކަލުން ޒެއިން ޢަބްދުﷲ ޔާމީން.

މި ވަފުދުން ބައްދަލުކުރެއްވީ އިޓަލީ, ޖަރުމަނު, ފްރާންސް, ނެދަލޭންޑްސް, ރޫމޭނިޔާގެ ސަފީރުންނާއެވެ. 

އެ ބައްދަލުވުމާ ގުޅިގެން އިދިކޮޅު ކޯލިޝަނުން މިއަދު ނެރުނު ބަޔާނެއްގައި ބުނެފައިވަނީ, ޤާނޫނާ ޚިލާފަށް ރައީސް ޔާމީން ޖަލަށްލައި ސަރުކާރުން އެ މަނިކުފާނުގެ ޝަރީޢަތަށް ނުފޫޒު ފޯރުވާތީ މިނިވަން އިންސާފުވެރި ޝަރީޢަތެއް ނުލިބޭނެކަމުގެ ކަންބޮޑުވުން ވަފުދުގެ ބޭފުޅުން ފާޅުކުރެއްވި ކަމަށެވެ.

ބަޔާނުގައި އިތުރަށް ބުނެފައިވަނީ ކޯލިޝަންގެ ރިޔާސީ ކެންޑިޑޭޓަކީ އަބަދުވެސް ރައީސް ޔާމީން ކަމަށެވެ. އަދި އެ މަނިކުފާނު ޖަލުން މިނިވަންކުރަން ކުރާ މަސައްކަތް ހުއްޓާނުލާނެކަމަށް ވެސް ބުންޏެވެ.

ވ.އާރަށް ކުއްޔަށް ދޫކުރުމުގެ މުޢާމަލާތުގައި ކޮރަޕްޝަން ހިންގި ކަމުގެ ތުހުމަތުގައި ރައީސް ޔާމީންގެ މައްޗަށް އުފުލި ދެ ދަޢުވާ ސާބިތުވާކަމަށް ނިންމަވައި 11 އަހަރަށް އެ މަނިކުފާނު ޖަލަށްލުމަށް ކްރިމިނަލް ކޯޓުން ޙުކުމްކުރީ މިދިޔަ މަހުގެ 25 ގައެވެ.