އަންނަ ރިޔާސީ އިންތިޚާބުގައި ވާދަކުރަން ނިންމަވާފައިވާ ކުރީގެ ރައީސް އަދި ޕްރޮގްރެސިވް ކޮންގްރެސް ކޯލިޝަނުގެ ލީޑަރު ޔާމީން ޢަބްދުލްޤައްޔޫމުގެ ރިޔާސީ ކެމްޕޭން ހަރަކާތްތައް ފެށުމަށް ބާއްވާ މަހާސިންތާ އަންނަ މަހު ފަށަން ހަމަޖައްސައިފިއެވެ.
ޕީޕީއެމްގެ ރިޔާސީ ޓިކެޓު އަރުވާފައިވާ ރައީސް ޔާމީން މިހާރު ގެންދަވަނީ 11 އަހަރުގެ ޖަލު ޙުކުމެއް ތަންފީޒު ކުރައްވަމުންނެވެ. ރައީސް ޔާމީންގެ ވަކީލުން މިހާރު ގެންދަވަނީ އެ ޙުކުމް އިސްތިއުނާފު ކުރުމުގެ މަސައްކަތް ކުރައްވަމުންނެވެ.
އެއީ މަތީ މަރުހަލާގެ ކޯޓަކުން ދަށު ކޯޓުގެ ޙުކުމް ބާތިލު ނުކުރާހައި ހިނދަކު ރައީސް ޔާމީނަށް ރިޔާސީ އިންތިޚާބުގައި ވާދަކުރެއްވުމުގެ ފުރުސަތު ނޯންނާނެތީއެވެ. އިދިކޮޅު ކޯލިޝަނުން ބުނާާ ގޮތުން ރައީސް ޔާމީން ޖަލުން މިނިވަންވެވަޑައިގަންނަވާނެއެވެ. އަދި އެ ކޯލިޝަންގެ ރިޔާސީ ކެންޑިޑޭޓަކީ ވެސް ރައީސް ޔާމީން ކަމަށާއި އެކަން ބަަދަލެއްނުވާނެކަމަށް ވެސް ދަނީ ބުނަމުންނެވެ.
ޕީޕީއެމްއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ތަރުޖަމާނު ހީނާ ވަލީދު ވިދާޅުވީ ރައީސް ޔާމީންގެ ރިޔާސީ ކެމްޕޭން ރަސްމީކޮށް ފެށުމަށް ބާއްވާ މަހާސިންތާ އޮންނާނީ އަންނަ ފެބްރުއަރީ ދެވަނަ ދުވަހުން ހަތަރުވަނަ ދުވަހުގެ ނިޔަލަށް ކަމަށެވެ.
“ރައީސް ޔާމީން 2023“ ގެ ނަމުގައި ބާއްވާ އެ މަހާސިންތާގެ މައިގަނޑު މަގުސަދަކީ ރައީސް ޔާމީނަށް އިންތިޚާބު ކާމިޔާބު ކޮށްދިނުމަށް ކުރެވެން ހުރި ކަންކަމާ ގުޅޭ ގޮތުން މަހާސިންތާގައި މަޝްވަރާ ކުރުމެވެ.
އެ މަހާސިންތާގައި ކޯލިޝަންގެ ދާއިރާތަކުގެ ރައީސުންނާއި, ނައިބު ރައީސުންނާއި, ސްޓިއަރިން ކޮމިޓީތަކާއި, ކައުންސިލަރުންނާއި, އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުން ބައިވެރިވާނެ ކަމަށް ހީނާ ވިދާޅުވިއެވެ.
ހީނާ ވިދާޅުވީ މިހާތަނަށް 500 އަށްވުރެ ގިނަ ބޭފުޅުން މަހާސިންތާގައި ރަޖިސްޓްރީކޮށްފައިވާ ކަމުގައެވެ.
ހީނާ އިތުރަށް ވިދާޅުވީ ދަރުބާރުގޭގައި މަހާސިންތާ ބޭއްވުމަށް އެ ތަން ހޯދަން ހުށަހަޅާފައިވާނެ ކަމުގައެވެ.
