މިއަދުން ފެށިގެން ކޮންމެ ދުވަހަކުވެސް މަންޓާ އެއާގެ ޓާޗަރު ދަތުރުތައް ހއ ހޯރަފުށީ އެއާޕޯޓަށް އޮންނާނެ ކަމަށް އެ އެއާ ލައިނުން ބުނެފިއެވެ.
މަންޓާ އެއަރއިން ބުނީ މިއަދުން ފެށިގެން ކޮންމެ ދުވަހަކުވެސް އެ އެއާލައިންގެ ޓާޗަރު ދަތުރުތައް ހޯރަފުށީ އެއަރޕޯޓަށް ކުރާނެކަމަށާ މި ދަތުރުތަކުގައި އެ އެއަރލައިނުން ބޭނުންކުރާނީ އެންމެ ފަހުން އެ ކުންފުނިން ގެނައި ބީޗް ކްރާފްޓްގެ ބޯޓްތައް ކަމަށެވެ.
ހޯރަފުށި އެއާޕޯޓަށް ދަތުރު ފެށުމަށް އިއްޔެ ޓެސްޓް ފްލައިޓެއް އެ އެއާޕޯޓަށް ޖައްސާފައިވާއިރު ހޯރަފުށީ އެއަރޕޯޓާއި ރީޖަނަލް އެއަރޕޯޓްސްއިންވަނީ ޓެސްޓް ފްލައިޓަށް ހޫނު މަރުހަބާއެއް ކިޔާފައެވެ.
ވެލާނާ އިންޓަނޭޝަނަލް އެއާޕޯޓާއި ހޯރަފުށްޓާ ދެމެދު މަންޓާ އިން ދަތުރުތައް ފަށާފައި މިވަނީ އެރަށާ މާދުރު ނޫން ހިސާބެއްގައި އޮންނަ ޖޭއޭ މަނަފަރު ރިސޯޓާ އަދި ހޯރަފުށި އެއާޕޯޓް ހިންގާ ރީޖަނަލް އެއާޕޯޓްސްއާ އެކު ސޮއި ކުރެވުނު އެއްބަސްވުމެއްގެ ތެރެއިންނެވެ.
މަންޓާއިން ދެ ދަތުރު ކުރަން ނިންމާފައިވާއިރު މި ދަތުރުތަކުގެ ސަބަބުން އެ ސަރަހައްދައް ފތުރުވެރިން އަދި ދިވެހިންނަށް ދަތުރު ކުރުމަށް އިތުރު ލުއިތަކެއް ލިބޭނެ ކަމަށް މަންޓާއިން ބުނެއެވެ. މަންޓާއިން ބުނީ ޑިމާންޑަށް ބަލާފަ ފްލައިޓްތައް އިތުރުކުރުމުގެ ވިސްނުންވެސް ގެންގުޅޭ ކަމަށެވެ.
މަންޓާ އެއާ އިން ހޯރަފުއްޓަށް ދަތުރުތައް ފަށާފައިވާއިރު އެ އެއާލައިނުން މިހާރު ދަތުރުތައް ކުރަމުންދަނީ ބ. ދަރަވަންދޫއާއި، ދ. ކުޑަހުވަދޫގެ އިތުރުން އައްޑޫ ސިޓީގެ ގަމަށެވެ.
