ޖިނާއީ ކުށްތަކުގެ މައްސަލަތަކުގައި ތުހުމަތުކުރެވޭ މީހުންނަށް އަނިޔާކުރާ މީހުންގެ މައްސަލަތައްވެސް ބަލައި ފިޔަވަޅު އަޅާނެކަމުގެ އިންޒާރު ފުލުހުން ދީފިއެވެ.

ހުޅުމާލޭ ދެ ވަނަ ފޭސްގައި ރޭގެ ވަގުތެއްގައި ފިރިހެން ޓީޗަރަކަށް ވަރަށް ބޮޑަށް އަނިޔާކޮށްފައެވެ. އޭނާއަށް އަނިޔާކުރީ ފިރިހެން ދަރިވަރަކަށް ޖިންސީ ގޯނާ ކުރިކަމަށް ތުހުމަތުކޮށެވެ.

އެކަމާ ގުޅިގެން ފުލުހުން މިރޭ ކުރި ޓުވީޓެއްގައި ބުނީ، ކުށްތަކަށް އަރައި ގަންނަ ފަރާތްތަކާއި މައްސަލަތަކުގައި ތުހުމަތު ކުރެވޭ ފަރާތްތަކުގެ މައްސަލަތައް ތަހުގީގުކޮށް އެ ފަރާތްތަކަށް އަދަބު ދެވޭނެ ގޮތްތައް ގާނޫނުތަކާއި ގަވާއިދުތަކުގައި ކަނޑައެޅިގެން ބަޔާންކޮށްފައިވާ ކަމަށާއި އިންސާފު ހޯދުމަށް ކަމަށްބުނެ، ޖިނާއީ މައްސަލަތަކުގައި ތުހުމަތު ކުރެވޭ މީހުންނާމެދު ގާނޫނުތަކާ ހިލާފަށް އަނިޔާވެރި އަމަލުތައް ހިންގުމަކ މުޖުތަމައުގެ މަސްލަހަތު ގެލިގެން ހިނގައިދާނެފަދަ އަމަލުތަކެއް ކަމަށެވެ.

”އެހެންކަމުން މިފަދަ ކަންތައްތައް ތަކުރާ ނުކުރުމަށް މި ހިދުމަތުން އިލްތިމާސްކުރަން. އަދި މިފަދަ ކުށްތައް ހިންގާ ފަރާތްތަކުގެ މައްސަލަ ތަހުގީގުކޮށް ގަނޫނީ ފިޔަވަޅު އަޅާނެ ވާހަކަ އެންމެހާ ފަރާތްތަކުގެ ސަމާލުކަމަށްޓަކައި ދަންނަވަން،“ ފުލުހުން ބުންޏެވެ.

ކުށްތަކުގެ ތުހުމަތުވާ މީހުންނަށް އާއްމުން ނުކުމެ އަނިޔާކުރުމަކީ ވަރަށް އާއްމުކަމެކެވެ. އެގޮތުން މިފަހުން ކ. ދިއްފުށީގައިވެސް ވަނީ ގއ. ވިލިނގިލީ މީހަކަށް ވަރަށް ބޮޑަށް އަނިޔާކޮށްފައެވެ. އޭނާއަށް އަނިޔާކޮށްފައިވަނީ ކުޑަ އަންހެން ކުއްޖަކަށް ޖިންސީ ގޯނާކުރިކަމަށް ބުނެއެވެ.