އެމްޑީޕީގެ އިސްވެރިންގެ ތެރެއިން ރާ ބޮއެ، ޒިނޭކުރާކަން އެމަނިކުފާނަށް އެނގިވަޑައިގަންނަވާ ބޭފުޅުންގެ ނަންތައް ހާމަކުރައްވަން ތައްޔާރަށް ހުންނެވިކަމަށް ރައްޔިތުންގެ މަޖިލީހުގެ ރައީސް އަދި ރާއްޖޭގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ، ބަންގުލަދޭޝަށް ނިސްބަތްވާ އެމްޑީ އަލަމްގިރިއާއެކު އެއްޖިންސުން ގުުޅުންހިންގިކަމުގެ ތުހުމަތުގައި އެމަނިކުފާނުގެ ކޮއްކޮ ނާޒިމް ސައްތާރު ހައްޔަރުކުރުމާ ގުޅިގެން، އެމްޑީޕީގެ އެޑްވައިޒަރީ ކޮމިޓީގެ ވަޓްސްއަޕް ގުރޫޕަށް ފޮނުއްވި މެސެޖުތަކެއްގައެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ބޮޑެތި ތުހުމަތުތަކެއް ކުރައްވައި އެ މެސެޖުތަކުގައި ނަޝީދު ވިދާޅުވީ، އެމަނިކުފާނުގެ ކޮއްކޮ، ނާޒިމް ހައްޔަރުކީ ސިޔާސީ ނުފޫޒު ފޯރުވައިގެން ކަމަށެވެ. އަދި އެ މައްސަލައަށް ސިޔާސީ ނުފޫޒު ނުފޯރުވިނަމަ ނާޒިމަށް އިންސާފު ލިބޭނެ ކަމަށް ގަބޫލުކުރައްވާ ކަމަށެވެ.

ނަޝީދު ވިދާޅުވީ، އެހެން ބައެއް މައްސަލަތަކުގައިވެސް ރައީސް ސޯލިހުގެ ސީދާ ނުފޫޒު ފޯރުއްވައިގެން ތަހުގީގުތައް ވަކި ގޮތަކަށް ގެންދެވިކަމަށެބެ. އެގޮތުން މަޖިލީހުގެ ވަކި މެންބަރެއްގެ މަސްލަހަތު އޮތް މައްސަލައެއްގައިވެސް ރައީސް ސޯލިހު ނުފޫޒު ފޯރުވައިފައިވާ ކަމަށް ވިދާޅުވިއެވެ.

ނަޝީދު ވިދާޅުވީ، އެމްޑީޕީގެ ހުރިހާ މަސްއޫލުވެރިންނަށް ތުހުަތުވާ އަހުލާގުއްޔަތާ ފުށުއަރާ މައްސަލަތަކުގެ ލިސްޓެއް ހަދަންޖެހޭ ކަމަށެވެ. އަދި ޒިނޭކޮށް ރާބޮއެ ރިޝްވަތު ނަގާކަން އެމަނިކުފާނަށް އެނގިވަޑައިގަންނަވާ އެމްޑީޕީގެ ހުރިހާ މަސްއޫލުވެރިންގެ ނަންތައް ހާމަކުރައްވަން ތައްޔާރުކަމަށްވެސް ނަޝީދު ވިދާޅުވިއެވެ.

އެމްޑީޕީގެ އިސްވެރިންގެ ތެރެއިން ރާ ބޮއެ، ޒިނޭކުރާކަން އެމަނިކުފާނަށް އެނގިވަޑައިގަންނަވާ ބޭފުޅުންގެ ނަންތައް ހާމަކުރައްވަން ތައްޔާރަށް ހުންނެވިކަމަށް ނަޝީދު ވިދާޅުވިއިރު، އެމްޑީޕީގެ ގައުމީ މަޖިލީހަށް އެމަނިކުފާނު މިރޭ ފޮނުއްވި މެސެޖެއްގައި ވަނީ ރައީސް ސޯލިހު އަންހެން ކުއްޖަކާއެކުގައި ޒިނޭކުރާ މަންޒަރު ފެންނަ ފޮޓޯތަކެއް އެމަނިކުފާނަށް ލިބިވަޑައިގެންފައިވާ ކަމަށް ވިދާޅުވެފައެވެ. ނަމަވެސް ސަރުކާރުން ވަނީ އެ ތުހުމަތުތައް ދޮގުކޮށްފައެވެ.