ސައްތައިން ސައްތަ މުސްލިމް ގައުމެއްގެ ތެރޭގައި ޚިޔާލު ފާޅު ކުރެވޭނީ އިސްލާމީ އުޞޫލުތައް ހިފެހެއްޓޭނެ ފަދަ މިންވަރަކަށެވެ. ތުންތުންމަތިން ދެކެވޭ ވާހަކަތައް އެ ވާހަކަތަކުގެ ޙަގީގަތް ނުހޯދާ ނޫސްތަކުގައާއި ސޯޝަލް މީޑިއާގައި ހާމަކުރުމަކީ ހެޔޮ އެއްވެސް މުސްލިމަކު ކޮށްގެންވާނޭ ކަންތައްތަކެއް ނޫނެވެ.

      ރައީސުލް ޖުމްހޫރިއްޔާ އާ ދައުލަތުގެ 3 ބާރުގެ ވެރީންނާ ދައުލަތުގެ ވަޒީރުންނަކީ ރައްޔިތުން މުސާރަދީގެން ދައުލަތް ހިންގާން ޙާވާލު ކުރެވިފައިވާ ފަރާތް ތަކެވެ. މިއިން ފަރާތަކުން ރައްޔުތުންގެ މުދަލާފައިސާއަށް ޚިޔާނާތްތެރި ވެއްޖެ ނަމަ އެކަންކަން ބަލާ އެކަން ކަމުގެ މަޢުލޫމާތު ރައްޔިތުންނާ ހަމައަށް ފޯރުކޮށްދޭނެ ފަރާތްތައްވެސް ރައްޔިތުން ވަނީ ކަނޑައަޅާފައެވެ.

     އަދި ހަމައެހެންމެ ދިވެހި ރައްޔިތަކު ދީނުންބޭރުވާފަދަ ޢަމަލެއް ކޮށްފިނަމަ އެކަން ކަމާބެހޭ ފަރާތްތަކަށް ހުށަހަޅާ އެއީ އެރައްޔިތަކު ކޮށްފައިވާ ކަމެއްތޯ ބެލެން ޖެހެއެވެ. މިގޮތުން ކުރާ ތަޙުގީގަކަށްފަހު އެކަން އެރައްޔިތެއްގެ މައްޗަށް ސާބިތު ނުކުރެވޭހާ ހިނދަކު އެރައްޔިތު މީހާގެ އަބުރަށް އަރައިގަނެވިގެން ނުވާނެއެވެ. އެއްޖިންސުން ގުޅުން ހިންގުމާ ޒިނޭ ކުރުމާ ރާބުއިމާ ހަކުރުބުއިމާ ގަނޖާބުއިން ފަދަ ކަންކަމަކީ އިސްލާމް ދީނުގެ ބޮޑެތި ފާފަތަކެކެވެ. 

ސާބިތުނުހިފޭ ކަން ކަމުގެމައްޗަށް ތުހުމަތުކޮށް އެއްވެސް މުސްލިމަކު ކިސަޑުގައި ދެމުމަކީ ޚިޔާލު ފާޅު ކުރުރުމުގެ މިންގަނޑުން ބޭރުވާނެ ކަންކަމެވެ.

     ސިޔާސީ ފަރާތްތަކުގެ އަގުވައްޓާލާ އެމީހަކު ނުކުރާ ކަންކަމުގެ ވާހަކަ ދެއްކުމަކީ އިސްލާމް ދީނުގައި ހުއްދަވެގެން ކަންކަމެއް ނޫނެވެ. ރައީސުލް ޖުމްހޫރިއްޔާ އަކީ ވަގެއްކަމަށް ބުނެވޭނީ އެމަނިކުފާނު ވައްކަން ކުރައްވާފައި ވާނަމައެވެ. ރައީސުލް ޖުމްހޫރިއްޔާއަކީ ދައުލަތުގެ އެންމެ އިސް ވެރިޔާއެވެ. ގައުމުގެ ޢަދުލު އިންޞާފަ ހަމަހަމަކަން ރައްޔިތުން ނަށް ކަށަވަރު ކޮށްދިނުމަށް ރައްޔިތުން ކަނޑައަޅާފައިވާ ފަރާތެވެ. އެހެންކަމުން އެމަނިކުފާނުގެ ޢިއްޒަތާ ކަރާމަތަށް އުނިކަން ލިބޭ ފަދަ އެވެސް ވާހަކަ އެއް ރައްޔިތަކަށް ދެއްކިގެންނުވާނެއެވެ. އެއީ ޚިޔާލު ފާޅު ކުރުމުގެ މިނިވަން ކަމެއް ނޫނެވެ.

      ދައުލަތުން ވައްކަން ކުރާވާހަކަ އަކީ ޢާންމު ވާހަކައެކެވެ. މިސާލަކަށް ވެންޓި ލޭޓަރު ގަތުމުގެ ޚިޔާނާތުގެ ވާހަކަ އެމް.އެމް.ޕީ.އާރުސީގެ ޚިޔާނާތް 800 މިލިއަން ޑޮލަރުގެ ތެލުގެ ވަގު ވިޔާފާރި، އެއަރމޯލްޑިވްސްގެ ޚިޔާނާތް، އެފްޕީ އައިޑީގެ ޚިޔާނާތް، މިކަންކަމަކީ ދައުލަތުގެ ކަމާބެހޭ އިދާރާތަކުން ހާމަކޮށްފައިވާ ވާހަކަތަކެވެ.

     މީގެ އިތުރުން ދެންވެސް ވެރިން ވައްކަން ކުރަމުން ދާ ނަމަ އެކަން ކަމަކީ ދައުލަތުގެ ކަމާއި ބެހޭފަރާތްތަކުން ބައްލަވަން ޖެހޭ އެފަރާތް ތަކުގެ ޒިންމާއެކެވެ.     ސާބިތު ނުހިފޭ ތުހުމަތު އެއްވެސް ރައްޔިތެއްގެ ބޮލުގައި އެޅުވުމަކީ ކުށެކެވެ. އިސްލާމުންނަކީ އިސްލާމުންގެ މައްޗަށް ސާބިތު ނުހިފޭ ދޮގު ވާހަކަ ދައްކާ އެ މުސްލިމުންގެ އަބުރަށް އަރައި ގަތުމުގެ މިނިވަންކަން އޮންނަ ބައެއްނޫނެވެ.

     ތިމާ މީހަކު ދެކެ ނަފުރަތު ވިއަސް އެމީހަކާ ބެހޭ ގޮތުން ހިތަށް އެރިހާ އެއްޗެއް ހަގީގީ މުސްލިމަކު ނުކިޔުމަކީ ކޮށްގެން ވާނޭކަމެއް ނޫނެވެ.

    މިސްމީހުންނާއި މުޚާތަބުކޮށް ލާދީނީ މީހެކޭ ބުނާ މީހާވެސް ވާނީ ލާދީނީ މީހަކަށެވެ. ނަމާދު ނުކޮށް ރޯދަވެސް ނުހިފާ ބައެއްމީހުން އަނެކާގެ ލާދީނީ ވާހަކަ ދައްކާ އަބުރަށް އަރައިގަންނަ ތަން އެބަފެނެއެވެ. މީ ލަދުވެތިވާންޖެހޭ ކަމެކެވެ. ޚިޔާލު ފާޚުކުރަންވާނީ އިސްލާމްދީނުގެ ތަރަހައިގެ ތެރޭގައިކަމަށް ދެކެމެވެ.

    މިފަހަކަށް އައިސް ދިވެހީންގެ މެދުގައި ކުރިން އޮތް އެކުވެރިކަމާ އެއްބައިވަން ތަކަން މިވަނީ އުވިގޮސްފައެވެ. ފިތުނަ އުފެއްދުމާ ނެތިނުބައިމޮށުމާ ދެބައޮޑުވުމާއިި އަބުރަށް އަރައިގަތުން ފަދަ ނުބައި އާދަތަށް މިވަނީ ދިވެހި އުންމަތުގެ ތެރޭގައި ޢާންމުކޮށްފައެވެ. މި އާދަތަކުން ދިވެހި އުންމަތް ސަލާމަތް ކުރަން އެބަޖެހެއެވެ. ދިނީ ނަޞޭހަތާ ކައުންސެލިންގ ދީގެން ނަމަވެސް މި އުންމަތުގެ ކަރާމާތާއި ޝަރާފަތު ދަމަހައްޓަން ޖެހޭނެއެވެ.