ސްރީލަންކާގެ ކުރީގެ ބޮޑުވަޒީރުކަމުގެ މަގާމް އަދާކުރައްވާފައިވާ އުމުރުން 73 އަހަރުގެ ރަނީލް ވިކްރެމެސިންގް އެ ގައުމުގެ ރައީސް ކަމާ ހަވާލުވެލައްވައި މިއަދު ރަސްމީކޮށް ހުވާކުރައްވައިފިއެވެ.
ގައުމުގެ އިގްތިސާދު ދަށަށް ގޮސް ރައްޔިތުން ހާލުގައި ޖެހުމާ ގުޅިގެން އެ ގައުމުގެ ރައްޔިތުން ވަނީ މުޒާހަރާކޮށް ކުރީގެ ވެރިކަން ވައްޓާލާފައެވެ. ގައުމުގެ ވެރިކަމާއި ރަނީލް ހަވާލުވެލެއްވުމުން ސްރީލަންކާގެ ރައްޔިތުންގެ ހިތްތައް ވަނީ މާޔޫސްކަމާއި ޝަކުވާއިން ފުރިފައެވެ. އެ ގައުމުގެ ގިނަ ބަޔަކު ރާޖަޕަކްސާސްގެ ވެރިކަމާއި ދެކޮޅޭވެ. ރަނީލް އަކީ ރާޖަޕަކްސާސްގެ ގާތް އެކުވެރިއެކެވެ.
ރަނީލް ވެރިކަމާއި ހަވާލުވެލައްވަމުން ވަނީ ރާޖަޕަކްސާސް އާއި ގުޅުން ކަނޑާލިކަމަށް ވައުދުވެލައްވާފައެވެ. އޭނާ ވަނީ ރައްޔިތުން އެދޭ ގޮތައް ގައުމު ހިންގަން ތައްޔާރަށް ހުރިކަމަށް ރައްޔިތުންނަށް ސާބިތުކޮށްދޭނެކަމަށް ވިދާޅުވެފައެވެ.
ރަނީލް ވެރިކަމާއި ހަވާލުވެލެއްވުމަށް ފަހު އެންމެ ބޮޑު އަމާޒަކީ ގައުމުގައި އަމަން އަމާންކަން އަލުން ގާއިމްކޮށް ގައުމުގެ އިގްތިސާދު އަލުން ކޮޅަށް ޖެހުމެވެ. މިކަމަށްޓަކައި އިންޓާނެޝަނަލް މޮނެތެރީ ފަންޑުން ތިން ބިލިއަން ޑޮލަރު ނެގުމަށް ވާން ޖެހޭ ތައްޔާރީތައް އެ ގައުމުން މިހާރު ދަނީ ކުރަމުންނެވެ.
