ބަނގުރާ ބޭނުންކޮށް އެތަކެތި ގެންގުޅުމުގެ ކުށުގައި މިދިޔަ މަހު ހައްޔަރުކުރި އިންޑިއާގެ ދެ މީހަކު ޑީޕޯޓްކޮށްލަން މަޝްވަރާކުރަން ފަށައިފިއެވެ.
ބަނގުރާ ބޭނުންކޮށް އެތަކެތި ގެންގުޅުމުގެ ކުށުގައި މިދިޔަ އޭޕްރީލް 25 ވަނަ ދުވަހު ހައްޔަރުކުރީ ސިލްވަރާޖް ނަތަޔަސަން (53އ) ނަމަކަށް ކިޔާ މީހަކާއި ޗިންނާސަމީ ގޮވިންދަސަމީ (36އ) ކިޔާ މީހެކެވެ.
ތިލަފުށީ އައިމާ ސައިޓުގައި އުޅޭ އެ ދެ މީހުންގެ ބަންދާމެދު ގޮތެއް ނިންމުމަށް ފުރަތަމަ ކްރިމިނަލް ކޯޓަށް ހާޒިރުކުރުމުން, ކޯޓުން އެ ދެ މީހުންގެ ބަންދަށްޖެހީ 10 ދުވަހެވެ. އެ މުއްދަތު ހަމަވުމާއެކު އިއްޔެ ކޯޓަށް ހާޒިރު ކުރުމުން އެ ދެ މީހުންގެ ބަންދަށް ވަނީ 15 ދުވަސް އިތުރުކޮށްފައެވެ.
އެ ދެ މީހުން ވަނީ ބަނގުރާ ބޭނުންކޮށް އެތަކެތި ގެންގުޅުނު ކަމަށް އިއުތިރާފުވެފައެވެ. ކޯޓުގައި އެ މީހުން ބުނީ ކުށް ކުރެވުނީ އެއީ ގާނޫނީ ގޮތުން ކުށެއްކަން ނޭނގޭތީ ކަމަށާއި ދެން އެފަދަ ކަމެއް ތަކުރާރު ނުކުރާނެ ކަމަށެވެ.
ކޯޓު އަމުރުގައި ބުނެފައިވާ ގޮތުން އެ ދެ މީހުން މަސައްކަތް ކުރާ ކުންފުނިން އެ މީހުން ޑީޕޯޓުކޮށްލަން ބޭނުންވާކަމަށް ފުލުހުންނަށް އަންގާފައިވާތީ އެކަމާ ގުޅިގެން ޕްރޮސެކިއުޓާ ޖެނެރަލްގެ އޮފީހާ ފުލުހުން ދަނީ މަޝްވަރާ ކުރަމުންނެވެ.
