މިއަދުގެ ސިއްހީ ސިޔާސަތުތައް ހުރީ އަލުން ގައުމު އަޅުވެތިކުރުމުގެ މިސްރާބަކަށް ކަމަށް ކުރީގެ ހެލްތު މިނިސްޓަރު ޢަބްދުﷲ ނާޒިމް ވިދާޅުވެއްޖެއެވެ.
’ބަލިކަށިވަމުންދާ ސިއްހީ ޚިދުމަތް“ މި މަ މައުޟޫއުގައި ޗެނަލް 13 ރޭ ގެނެސްދިން ޕެނަލް ޑިސްކަޝަންގައި, ކުރީގެ ރައީސް ޔާމީން ޢަބްދުލްޤައްޔޫމްގެ ދައުރުގައި ރާއްޖޭގެ ސިއްހީ ނިޒާމަށް ލިބިފައިވާ ކުރިއެރުންތަކާ ގުޅޭ ގޮތުން ސުވާލު ދެންނެވުމުން ދެއްކެވި ވާހަކަފުޅުގައި ނާޒިމް ވިދާޅުވީ ކުރިއެރުމާއި ތަރައްގީއަކީ ކޯއްޗެއްތޯ އެބަ ވިސްނަންޖެހޭ ކަމަށެވެ. އާދައިގެ މީހަކަށް މަތިމަތިން ބަލާއިރު ތަރައްގީއަކީ އެ މީހުންނަށް ފެންނަން ހުންނަ އެއްޗެއް ކަމަށާއި އަނެއް ބައި މީހުންނަށް ތަރައްގީއަކީ ޚިދުމަތަކަށް އަންނަ ލުއިފަސޭހަ ކަމެއް ކަމަށް ނާޒިމް ވިދާޅުވިއެވެ.
“މި ދެ އޭންގަލުން ވިސްނަމާ ހިނގާ. މުޅި ސިސްޓަމެއް ކްރިޓިކަލީ އެނަލައިޒް ކުރާ މީހަކަށް ތަރައްގީއަކީ ކުރިއެރުމަކީ ޚިދުމަތް ފޯރުކޮށްދިނުމުގަ ޚިދުމަތް ލިބިގަތުމުގަ ލުއިފަސޭހަކަން އޮތުން. އޭގެ ފެންވަރު ރަނގަޅު ޚިދުމަތެއް ލިބިގެންދާ ތަން ފެނުން. އަނެއް ބައި މީހުންނަށް ތަރައްގީއަކީ, މިކަމާ ނުވިސްނާ ކްރިޓިކަލީ އެނަލައިޒް ނުކުރާ މީހުންނަށް ތަރައްގީއަކީ ފެންނަން ހުންނަ އެއްޗެއް. އަތްލެވޭ އެއްޗެއް.“
އެ ދެ އޭންގަލުން ވިސްނާއިރު ދަރުމަވަންތަ ހޮސްޕިޓަލު ވަރަށް ރަނގަޅަށް ފެންނަން އެބަހުރި ކަމަށް ނާޒިމް ވިދާޅުވިއެވެ. ނަމަވެސް މި ގޮތަށް ފެންނަން ހުރި ސިއްހީ ޚިދުމަތެއް މި ސަރުކާރަށް މާލޭގައި ކުރެވިފައި އެބައޮތްތޯ ނާޒިމް ސުވާލު ކުރެއްވިއެވެ.
އެއަށްފަހު ނާޒިމް ވިދާޅުވީ ބުއްދި ސަލާމަތުން ހުރި, ލޮލަށް ހަމައަށް ފެންނަ އެއްވެސް މީހަކު މިކަމަށް ދޭނެ ޖަވާބެއް ނޯންނާނެ ކަމުގައެވެ.
ދެވަނަ ކަމަކީ ރައީސް ޔާމީންގެ ދައުރުގައި ޚިދުމަތްތަކަށް އައި ލުއިފަސޭހަކަން ކަމަށާއި ރާއްޖެ ކުދިކުދި ރަށްތަކަކަށް ބެހިފައި އޮތްއިރު, ކޮންމެ ރަށެއްގައި ވެސް އެ ރަށެއްގެ އާބާދީއަށް ބެއްލެވުމެއް ނެތި މެޑިކަލް ޑޮކްޓަރެއް ހުންނަން ޖެހޭނެކަމަށް ނިންމެވީ ރައީސް ޔާމީން ކަމަށް ނާޒިމް ވިދާޅުވިއެވެ. އަދި ކޮންމެ ރަށެއްގައި ބޭސްފިހާރައެއް ހުންނަންޖެހޭނެ ކަމަށް ނިންމެވީ ވެސް ރައީސް ޔާމީން ކަމަށާއި ސީ އެމްބިއުލާންސްގެ ޚިދުމަތް ވެސް ފެށްޓެވީ ވެސް އެމަނިކުފާނު ކަމަށް ނާޒިމް ވިދާޅުވިއެވެ.
“ޚާއްސަކޮށް ތެލަސީމިއާ ކުދިންފަދަ ޚާއްސަކޮށް މިފަދަ އޭރިއާތަކަށް ބޭނުންވާ ކުދިންނަށް ބޭސްފަރުވާގެ ޚިދުމަތް އަތޮޅުތެރެއިން ލިބޭނެ ގޮތް ރައީސް ޔާމީން ހަމަޖައްސަވައިދެއްވި. 67 ސްޕެޝަލިސްޓުން ކިޔެވުމަށްޓަކައި ރާއްޖެއިން ބޭރަށް ސަރުކާރުގެ ފުލް ސޮކްލަރޝިޕްގަ އިނގޭތޯ. މި އަދަދު ބައެއް ބޭފުޅުންނަށް ހީވެދާނެ ވަރަށް ކުޑަ އަދަދެއްހެން. ތިބޭފުޅުން ހިސާބު ބައްލަވާލައްވާ އެއީ 10 އަހަރު ދުވަހުން ވެސް ރާއްޖޭގަ ނުފޮނުވޭހާ ގިނަ އިނގޭތޯ އެއް އަހަރުން ފޮނުވުނީ. 150 އަށްވުރެ ގިނަ އެމްބީބީއެސް ޑޮކްޓަރުކަން.“
މީގެއިތުރުން ރައީސް ޔާމީންގެ ދައުރުގައި 3000 ނަރުުހުން ތަމްރީނުކުރުމުގެ ޕްރޮގްރާމެއް ފެށްޓެވިކަން ވެސް ނާޒިމްގެ ވާހަކަފުޅުގައި ފާހަގަކުރެއްވިއެވެ.
“ޓްރާންސްފޮމޭޝަނަލް ލީޑަރުންނަކީ ތާރީޚު ލިޔުއްވާ ލީޑަރުން. ރައީސް ޔާމީން ވަޑައިގެންނެވީ ރާއްޖޭގެ މިޒަމާނުގެ ސިއްހީ ނިޒާމުގެ ތާރީޚު ލިޔުއްވާފަ. ދަރުމަވަންތަ ހޮސްޕިޓަލު. ސީ އެމްބިއުލާންސް. ދިވެހިރާއްޖޭގަ ފުރަތަމަ ފަހަރަށް ޑޮކްޓަރުކަން ކިޔަވައިދެއްވަން ފެށްޓެވީ ވެސް ރައީސް ޔާމީން 2018 ނޮވެމްބަރުގަ.“ ނާޒިމް ވިދާޅުވިއެވެ.
ނަމަވެސް ރައީސް އިބްރާހިމް މުޙައްމަދު ޞާލިޙްގެ ސަރުކާރަށް މިފަދަ ބަދަލެއް ނުގެނެވުނު ތަނުގައި ސިއްހީ ޚިދުމަތްތަކަށް ލޮޅުން އަރާފައިވާ ކަމަށް ނާޒިމް ވިދާޅުވިއެވެ.
ޚިދުމަތެއް ދިނުމަށް ބޭނުންވާ އެންމެ މުހިންމު ކަމަކީ އެ ދާއިރާއަކަށް ބޭނުންވާ މީހުން ތަމްރީން ކުރުންކަން ފާހަގަކުރައްވައި ނާޒިމް ވިދާޅުވީ މީހުން ތަމްރީނު ކުރުމުގެ ވިސްނުމެއް ނުގެންގުޅޭ ބަޔަކަށް ނިޒާމެއް ޚިދުމަތެއް ދިނުމުގެ ވިސްނުމެއް ނުގެންގުޅެވޭނެ ކަމުގައެވެ.
މިއަދު އިވެނީ ރައީސް ޔާމީން ފަށްޓަވައިދެއްވި އެސްޓީއޯ ފާމަސީތަކުގައި ބޭސް ނެތް ވާހަކައާއި ފާމަސިސްޓުން ނެތް ވާހަކައާއި އައިޖީއެމްއެޗަށް އިންޑިއާ މީހުން އަޅައި ފުރާލައިިފި ވާހަކަ ކަމަށް ވެސް ނާޒިމް ވިދާޅުވިއެވެ.
ނާޒިމް ވިދާޅުވި ގޮތުގައި ވަކި ބަޔަކަށް ފައިދާ ހޯދައިދިނުމަށް ބޭނުންކުރާ ވަސީލަތެއްގެ ގޮތުގައި އައިޖީއެމްއެޗު ވެސް ދަނީ ބޭނުންކުރަމުންނެވެ. އެ ގޮތުން މިއަދުގެ ސިއްހީ ސިޔާސަތުތައް ހުރީ އަލުން ގައުމު އަޅުވެތިކުރުމުގެ މިސްރާބަކަށްކަމަށް ވެސް ނާޒިމް ވިދާޅުވިއެވެ.
“މިއަދުގެ ސިއްހީ ސިޔާސަތުތައް ހުރީ އަލުން ގައުމު އަޅުވެތިކުރުމުގެ މިސްރާބަކަށް.“ ނާޒިމް ވިދާޅުވިއެވެ.
ނާޒިމް ވިދާޅުވީ އިގުތިސާދީ މިނިވަންކަމާއި ސިއްހީ ޚިދުމަތެއް ފޯރުކޮށްދިނުމުގެ މިނިވަންކަމެއް ނެތް ގައުމަކީ މިނިވަން ގައުމެއް ނޫން ކަމަށާއި އަޅުވެތި ސިއްހީ ނިޒާމެއްގައި ދެމި ނުތިބެވޭނެ ކަމުގައެވެ.
