އަންނަ ރިޔާސީ އިންތިޚާބުގައި ޖުމްހޫރީ ޕާޓީން ކެންޑިޑޭޓަކު ނެރުމަށް އެ ޕާޓީގެ ކައުންސިލުގެ އިއްތިފާގުން ފާސްކޮށްފިއެވެ.

ޖޭޕީގެ މައި މަރުކަޒުކަމަށްވާ މާފަންނު ކުނޫޒުގައި މިއަދު ހަވީރު ބޭއްވި އެ ޕާޓީގެ ކައުންސިލު ބައްދަލުވުމުގައި ބައިވެރިވި މެންބަރުންގެ އިއްތިފާގުން ފާސްކުރީ އެ ޕާޓީން ކެންޑިޑޭޓަކު ނެރެ, ކޯލިޝަން ހަދަން ބޭނުންވާ ޕާޓީތަކާއެކު އިންތިޚާބު ކާމިޔާބު ކުރުމަށެވެ.

“ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނެއްގެ ތެރެއިން ވާދަކުރުމަށް ޕާޓީގެ 151 ވަނަ ކައުންސިލް ބައްދަލުވުމުގައި ވަނީ ނިންމާފަ. މި ނިންމުން ނިންމާފައިވަނީ ކައުންސިލް ބައްދަލުވުމުގައި ބައިވެރިވި މެމްބަރުންގެ އިއްތިފާގުން.“ ޖޭޕީން ބުންޏެވެ.

ޖޭޕީން މި ނިންމުން ނިންމާފައިވާއިރު, އެމަނިކުފާނާއެކު ކޯލިޝަން ހެދުމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙް ވަނީ އެދިވަޑައިގެންފައެވެ.

މި ނިންމުމާއެކު ޖޭޕީގެ މޯހިރު މައްޗަށް އަރައި އިންތިޚާބަށް ކޯލިޝަން ހަދަން ބޭނުންވާ ޕާޓީތަކަށް ވަނީ އެ ފުރުސަތު ހުޅުވާލައިފައެވެ.

ބެލެވޭ ގޮތުން އެމްޑީޕީގެ ރިޔާސީ ޕްރައިމަރީން ނާކާމިޔާބުވެވަޑައިގެންނެވި ރައީސް މުޙައްމަދު ނަޝީދުގެ “ފިކުރެއްގެ ދިރުން“ ހަރަކާތުން ތާއީދު ކުރާނީ ޖޭޕީއަށެވެ. މީގެއިތުރުން ރައީސް މައުމޫން ޢަބްދުލްޤައްޔޫމުގެ މޯލްޑިވްސް ރިފޯމް މޫވްމަންޓުން ވެސް ތާއީދުކުރާނީ ޤާސިމަށް ކަމަށް ބެލެވެއެވެ.

މާޒީގައި ކަން ހިނގި މަގަށް ބަލާއިރު ދެން ވެސް ޖޭޕީގެ ރިޔާސީ ކެންޑިޑޭޓަކަށް ވާނީ ޤާސިމެވެ. ނަމަވެސް އެކަން އަދި ފައިނަލެއް ނުކުރެއެވެ

އާ ޤާނޫނު އަސާސީ އުފަންވި ފަހުން ބޭއްވި ކޮންމެ ރިޔާސީ އިންތިޚާބެއްގައި ވެސް ޖޭޕީގެ ރިޔާސީ ކެންޑިޑޭޓެއްގެ ގޮތުގައި ޤާސިމް ނުކުންނަވައެވެ. އެ ގޮތުން 2018 ވަނަ އަހަރުގެ ރިޔާސީ އިންތިޚާބުގައި ވެސް ޖޭޕީގެ ކެންޑިޑޭޓަކަށް ހަމަޖައްސާފައިވަނިކޮށް އޭރު ސިޔާސީ މަސްރަހު އޮތް ގޮތުން ފަހުން ނިންމެވީ ޕާޓީތަކާ އިއްތިހާދުވެ އިބްރާހިމް މުޙައްމަދު ޞާލިޙް ވެރިކަމަށް ގެންނެވުމަށެވެ.

ސިޔާސީ މަސްރަހު އޮތް ގޮތަށް ބަލާއިރު މިހާތަނަށް ރައީސް ޞާލިޙަށް ބައިއަތު ހިފީ އަދާލަތުންނާއި އެމްޑީއޭއިންނެވެ. އެމްއާރްއެމްއިން ވެސް ޤާސިމަށް ތާއީދު ކުރާނެ ކަމަށް ބެލެވޭއިރު ރައީސް ޞާލިޙާއެކު ނިކުންނާނެ އިތުރު ޕާޓީއެއް ދެން އޮތް ކަމަކަށް ނުބެލެވެއެވެ.

ރިޔާސީ އިންތިޚާބުގައި ޕީޕީއެމް ވާދަކުރާނީ ވަކިންނެވެ. އެ ޕާޓީގެ ރިޔާސީ ކެންޑިޑޭޓެއްގެ ގޮތުގައި ހަމަޖައްސާފައިވަނީ ރައީސް ޔާމީން ޢަބްދުލްޤައްޔޫމެވެ. ނަމަވެސް ދަށު ކޯޓުން އިއްވި 11 އަހަރުގެ ޖަލު ހުކުމާއެކު އިންތިޚާބުގައި ވާދަކުރެއްވުމުގެ ފުރުސަތު ވަނީ ހަނިވެފައެވެ. އެހެންވެ އެ ހުކުމް ބާތިލުކުރުމަށް މިހާރު ވަނީ ހައިކޯޓަށް ހުށަހަޅައިފައެވެ.

ރާއްޖޭގެ އެންމެ ހަގު ސިޔާސީ ޕާޓީން ވެސް ވަނީ އިންތިޚާބުގައި ވާދަކުރަން ނިންމައިފައެވެ. އެމްއެންޕީގެ ރިޔާސީ ކެންޑިޑޭޓަކީ އެ ޕާޓީގެ ރައީސް އަދި ކުރީގެ ޑފެންސް މިނިސްޓަރު ކާނަލް ރިޓަޔާޑް މުޙައްމަދު ނާޒިމެވެ. ނަމަވެސް ނާޒިމަށް އިންތިޚާބު ކާމިޔާބު ކުރެއްވެވޭނެ ކަމީ މުސްތަހީލު ކަމެކެވެ.