ޗައިނާގެ ރައީސްކަމުގެ މަގާމަށް 03 ވަނަ ދައުރަކަށް އިންތިޚާބުވެވަޑައިގެންނެވި އެ ގައުމުގެ ރައީސް ޝީ ޖިންޕިންއަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް މަރުހަބާ ވިދާޅުވެއްޖެއެވެ.
ރާއްޖޭގައި ހުންނަ ޗައިނާ އެމްބަސީއިން މިއަދު ކުރި ޓުވީޓެއްގައި ބުނެފައިވަނީ އެ ގައުމުގެ ރައީސް ޝީ ޖިންޕިން ރައީސް ކަމަށާއި އަސްކަރިއްޔާގެ ވެރިއަކަށް އަނެއްކާވެސް އިންތިޚާބުވެވަޑައިގަތުމުން އެކަމަށް މަރުހަބާ ވިދާޅުވެ ރައީސް ޞާލިޙް އިއްޔެ ތަހުނިޔާގެ މެސެޖެއް ފޮނުއްވާފައިވާ ކަމަށެވެ.
ޗައިނާ އެމްބަސީން ބުނި ގޮތުގައި ރައީސް ޞާލިޙްގެ މެސެޖުގައި ވަނީ ދެ ގައުމުގެ ދެމެދުގައި އޮތް ޒަމާންވީ ގުޅުން ބަދަހިކުރުމަށް އެދިވަޑައިގަންނަވައިފައެވެ.
ޗައިނާގެ ރައީސްކަމަށް ޝީ ޖިންޕިން އެންމެ ފުރަތަމަ އިންތިޚާބުވެވަޑައިގަތީ 2013 ވަނަ އަހަރުގެ މާޗުމަހުގެ 14 ވަނަ ދުވަހުއެވެ. ދެވަނަ ދައުރަކަށް އިންތިޚާބުވެވަޑައިގަތީ 2018 ވަނަ އަހަރުގެ މާޗުމަހުގައެވެ.
ޗައިނާގެ ގާނޫނު ހަދާ މަޖިލިސް, ޕީޕަލްސް ނެޝަނަލް ކޮންގްރެސްގެ 3000 އެއްހައި މެންބަރުންގެ އިއްތިފާގުން 5 އަހަރުގެ 3 ވަނަ ދައުރަކަށް ޝި ޖިންޕިން އިންތިޚާބުކުރީ އިއްޔެގައެވެ.
3 ވަނަ ފަހަރަށް ޝީ ޖިންޕިން ރައީސްކަމަށް ހޮވަން މަޖިލީހުން ނިންމީ އެ ގައުމުގެ ގާނޫނުގައި ކުރިން އޮތް ދެ ދައުރުގެ ލިމިޓް މިދިޔަ އަހަރު އުވައިލުމަށްފަހުއެވެ.
